Nehemia 5 - Ebibulia 2001

Okugingiizibwa kw'abanaku

¹ Omu bir'ebyo abantu n'abakazi babo beboroboitera muno barumuna babo Abayahudi.

² Aha rw'okuba hakaba halimu abagambire bati, “Ichwe na batabani baitu na bahara baitu tuli bangi, tugye tushake engano, tulye tutafa.”

³ Haliyo n'abandi abagambire bati, “Ichwe tuliho nitukwatiliza endimiro zaitu, n'emizabibu yaitu, n'amaju gaitu tubone engano aha rw'enshonga y'eifa.”

⁴ Kandi hakaba haliho abandi abagambire bati, “Tweholize empiha kusholera omukama omushoro gw'endimiro zaitu, n'emizabibu yaitu.

⁵ Kandi naichwe tuli barumuna babo, n'abana babo ni barumuna b'abaana babo, kyonkai nitugimba batabani baitu na bahara baitu kuba bairu, kandi bahara baitu abandi babeleire kimoi bazana. Kyonkai titwina kyoturakora, orwo emisiri yaitu n'emizabibu yaitu byabaire by'abandi.”

⁶ Kanahuliire okweboroboita kwabo n'ebigambo ebi ntamwa muno.

⁷ Ntegeka nyenkai, ndwanisa abakungu n'abakuru, mbagambira nti, “Nimwenda amagoba, buli omoi nagenza omurumuna.” Mpuruza embaga nyingi mbataho omushango.

⁸ Mbagambira nti, “Ichwe omu bushobora bwaitu tunyagurwize barumuna baitu Abayahudi ababaire baguziibwe omu mahanga, kyonkai kandi inywe nimutuguza barumuna banyu!” Abakuru n'abatwazi besiza, tibaboine kya kugamba.

⁹ Ngamba nti, “Ekyo mulikukora tikyo. Nimuragirwa kutina Ruhanga waitu, kutanga abanyamahanga ababisha baitu kutushesheza.

¹⁰ Kandi nanye na barumuna bange n'abashaija bange nitubahora empiha n'engano. Amagoba aga tugaleke.

¹¹ Kir'eki mubagarulire endimiro, emizabibu, emizeituni, amaju gabo n'ekichweka kya kikumi ky'empiha, engano, edivai n'amajuta ebyo mubaire nimubenza amagoba.”

¹² Aho bagamba bati, “Ebintu ebyo turabigarura, mara titukibenza kantu. Turakora nk'okwo wagamba.” Aho nyeta abakuhani, mbanahiza kukora nk'okwo babaire baragaine.

¹³ Nshuba nkunkumura omuheko, ngamba nti, “Nikwo Ruhanga arakunkumura atyo buli muntu omwe n'aha mulimogwe; araba atahikize kiragano eki, akunkumurwe atyo mara asigare bushai.” Embaga yona egamba eti, “Amina!” Mara basingiza Omukama. Abantu bakora okwo baragana.

¹⁴ Kandi kwema omu kanya ako orwo naronzirwe kuba gavana wabo omu nsi ya Yuda kwema omu mwaka gwa 20 kuhika omu mwaka gwa 32 Omukama Aritashasita ali aha ngoma niyo myaka 12 ndi gavana, yaba inye anga barumuna bange titwaliire posho ya gavana.

¹⁵ Abagavana n'abanyebembeire bakashasa muno abantu, babenza ebyakulya n'edivai, eshekeli 40 z'efeza zitabulimu. Nangu n'abashaija babo nabo bagira eikama aha bantu. Kyonkai inye tinakozire ntyo aha rw'okutina Ruhanga.

¹⁶ Kandi nkaguma aha mulimo gw'eboma egi, tinakwete nsi. N'abashaija bange bona aha kwombeka niho bahuruliraga.

¹⁷ Kandi aha kiihuro kyange hakaba haliho abantu 150, Abayahudi n'abakuru, abanyijagaho kuruga omu mahanga agatwataine batabulimu.

¹⁸ Buli kiro banyitiraga enumi emoi, entama mukaga ezishaire, n'enkoko kwakwo bazinyitiraga. Kandi buli biro ikumi bandeteraga enfulebe zingi muno z'edivai. Kyonkai ebyo byona nkaba ntabyenza bantu nka posho ya gavana, enshonga nkaba nimanya okwo abantu abo babaire basikiliirwe muno.

¹⁹ Waitu Ruhanga wange onyijuke aha rwa byona ebyo nkoleire abantu aba.