Nehemia 4 - Ebibulia 2001

Nehemia nayemangana kubi na Sanibalati n'abe

¹ Sanibalati kayahuliire okwo twabaire nitwombeka eboma, yatamwa, yanigara muno, yareerura Abayahudi.

² Agamba omu maisho g'abarumuna n'eihe lya Samaria ati, “Obuyahudi obu nibukoraki? Isi burayombeka ebintu bishubeho? Buratamba n'ebitambo bumare elyombeka kiro na mushana? Isi bwije bwihye amabare omu ntuumiro z'ejagata ehiire?”

³ Tobia Omuamoni akaba amuli aha rubaju agamba ati, “Nikwo, eboma y'amabare eyo bulikwombeka, k'emboigora yakugikuba ekuumba.”

⁴ Aho nshaba nti, “Waitu Mukama Ruhanga waitu, hulira nitujangurwa, ebijumi byabo nibakabilye, obanage omu mikono y'ababisha babanyage ebyabo babatware endore omu mahanga.

⁵ Entambara yabo otagiitiramu, kandi otabaganyira bufu bwabo; aha rw'okuba bakunigaize omu maisho g'abombeki.”

⁶ Kityo twombeka eboma, yona eiganira aha nusu y'obwemi bwayo, enshonga abantu bakaba baina ekihika ky'eikora.

⁷ Kyonkai orwo Sanibalati na Tobia n'Abaarabu n'Abaamoni n'Abaashidodi bahuliire okwo okwombeka buhya eboma za Yerusalemu kwabaire nikugendelera n'okwo ahakambukire halikushubwamu, batamwa muno;

⁸ bema hamoi banama kutabalira Yerusalemu n'okugitabangura.

⁹ Ichwe tushaba ahali Ruhanga waitu, tutaho abalinzi kubatanga ekiro n'omushana.

¹⁰ Kyonkai abantu ba Yuda bagamba bati, “Abashutuzi b'elyombeka amani gabahwa, kandi hakyaliho ejagata nyingi, titulikushobora kugendelera kwombeka boma.”

¹¹ Ababisha baitu bagamba bati, “Tibatumanye anga tibatubone, kuhika orwo turabajumbukiramu tukabaita, n'eikora tukalyemeleza.”

¹² Abayahudi ababaturaga haihi baija batugambira emirundi ikumi bati, “Nibaija kuruga buli rubaju babatabalire.”

¹³ Aha rw'ekyo nteka abantu kuhonderana n'amahiga gabo, baina embanda n'amachumu n'amata aheru, enyuma y'eboma omu busoka.

¹⁴ Ndeeba, nyimuka, ngambira abakungu n'abakuru n'abandi nti, “Mutabatina. Mwijuke Omukama okwo aba muhango n'okwo aba w'ekitinwa. Murashanire barumuna banyu, batabani banyu na bahara banyu, abakazi banyu n'amaka ganyu.”

¹⁵ Ababisha baitu kabahuliire okwo twakimanyire n'okwo Ruhanga atabangwire ebyo babaire nibenda kukora, ichwena twagaruka aha boma, buli muntu aha mulimogwe.

¹⁶ Kwema kir'ekyo n'okugendelera enusu y'abakozi bange egendelera n'elyombeka, enusu endijo ekwata amachumu, engabo, amata n'engabo z'ebyoma. Abebembezi bemelera enyuma y'eihiga lya Yuda lyona,

¹⁷ nibo babaire nibombeka eboma. Abaheleza b'elyombeka bakaba bashutwire emishutulire ey'omuntu kukoza omukono gumoi ogundi gukwete ekikwatokye ky'endashana.

¹⁸ Kandi buli mwombeki akaba aina embandaye agikomire aha kiiga orwo yayombekaga. Omutezi w'enzamba akaba anyataine.

¹⁹ Ngambira abakungu n'abatwazi n'abantu abandi nti, “Omulimo gungi kandi gurai, kandi naichwe twenaganagire aha boma, titugobangaine;

²⁰ mbali muraba muli kamurahulira enzamba yajuga, mube niyo mwirukira mutushangeyo. Ruhanga waitu araturashanira.”

²¹ Kityo tukora omulimo n'amani. Enusu y'abakozi ekwata amachumu kwema omu bwire kutaishukana kuturuka aha nyanyinyi kuzoka aha iguru.

²² Nshuba ngambira embaga omu kanya ako nti, “Buli muntu n'omwiruwe bate nibarara Yerusalemu, batulinde omu kiro, bwamushana bakore.”

²³ Kityo yaba inye anga barumuna bange anga abashaija bange anga abalinzi abamponderaga, taliho n'omoi yajwire myendo. Buli muntu yagyaga kutaha amaizi akwete ekikwato ky'endashana.