Nehemia 2 - Ebibulia 2001

Nehemia nagya Yerusalemu

¹ Omu mwezi gwa Nisani omu mwaka gwa 20 gw'Omukama Aritashasita, orwo bamubonekize edivai, ngikwata, ngimubonekya. Nkaba ntakajunaraga mu mabonage.

² Omukama ambaza ati, “Nk'oshobeirwe okwo otarwaire? Eki ti kindi, oshobeirwe aha mutima.” Aho ntina muno.

³ Mugambira nti, “Omukama n'akarame! Kubaki ntashoberwe, orwo ekigo mbali enziiko za batata zili kili ndaara, n'ebihigi byakyo bikasosotorwa omuliro?”

⁴ Omukama ambaza ati, “Noshabaki?” Aho nshoma enshara ahali Ruhanga ow'omw'iguru.

⁵ Ngambira omukama nti, “Rugaba olikasinga osingire, bantaishure ngye Yuda omu kigo ky'enziiko za batata nkyombeke buhya.”

⁶ Omukama ambaza, (muk'omukama amushuntamire aha rubaju) ati, “Oramarayoki? Oragaruka maki?” Akunda kuntaishura; nanye mulengera mbali ndiizira.

⁷ Mugambira nti, “Rugaba olikasinga osinge ompe ebarua nzitwalire abagavana b'omukoa gwa Buseli bwa Efurati, banjubure ndabemu ngobe Yuda;

⁸ n'ebarua y'okutwalira Asafu omukumilizi w'ekibira ky'omukama, ampe emiti y'okusharamu embaho z'ebihigi by'eboma ya Rwensinga, n'eboma y'ekigo, n'enju eyo ndaturamu.” Omukama antunga ebyo nashaba, kuba Ruhanga akaba anyemiremu.

⁹ Aho ngoba Abagavana b'omukoa gwa Buseli bwa Efrati mbaha ebarua z'omukama. Omukama akaba antaishwire n'abakuru b'eihe n'ab'efarasi.

¹⁰ Kyonkai Sanibalati owa Betihoroni na Tobia omuramata omu mukoa gwa Amoni, bahulira ekigambo eki kibatama muno kumanya okwo haliyo ayaija kuhigira Abaisiraeli obuge.

¹¹ Nyija Yerusalemu maramu ebiro bishatu.

¹² Aho nyimukya omu kiro n'abashaija bake abo nabaire nyinabo. Tinagambiire muntu n'omoi ekyo Ruhanga yabaire angambiire kukolera Yerusalemu. Nkaba ntaina kitunganwa kindi shana endogobe eyo nabaire nkuubire.

¹³ Omu kiro omwo nshohora ndaba aha Kihigi ky'Oruhanga nyija aha Iziba ly'Omushega ngoba n'aha Kihigi ky'Orubungo, ndeba kurungi eboma za Yerusalemu ezabaire zikambwirwe n'ebihigi byayo ebyabaire bisosotoirwe omuliro.

¹⁴ Ngendera kimoi ngoba aha Kihigi ky'Enchuro n'aha Kanyanja k'Omukama. Kyonkai endogobe eyo nabaire nkuubire tiyaboine burabo.

¹⁵ Ahanyuma omu kiro ekyo ntemba ndaba aha ruhanga ndeba eboma kandi nkubuka ntahire omu Kihigi ky'Oruhanga, mba nikwo nshubayo ntyo.

¹⁶ Abakuru tibamanyire mbali nabaire ngiire anga ekyo nabaire ninkora, kandi nkaba ntakagambire Bayahudi, abakuhani, abakungu, n'abakuru n'abandi ababaiire baragirwe kukora omulimo ogwo.

¹⁷ Aho mbagambira nti, “Nimubona enaku ezo tulimu n'okwo Yerusalemu eli ndaara, n'okwo ebihigi byayo bihire. Mwije twombeke eboma ya Yerusalemu, tulekere kwikara tugahirwe.”

¹⁸ Kandi mbagambira okwo Ruhanga omushobora yabaire anyemiremu ebiro byona, kwakwo n'eby'Omukama Aritashasita yabaire angambiire. Bagamba bati, “Katwimuke twombeke!” Kityo bemera kukora eikora lirungi elyo.

¹⁹ Kyonkai orwo Sanibalati owa Betihoroni, na Tobia omuramata omu mukoa gwa Amoni, na Geshemu Omwarabu bahuliire ekigambo ekyo, batujamya, batugaya nibagamba bati, “Eki kintu nyabaki ekyo mulikukora? Nimwenda kushenga Omukama Aritashasita?”

²⁰ Aho mbahorora nti, “Ruhanga w'omw'iguru wenene aratugoshora, ichwe abairube turabanza elyombeka; kyonkai inywe timwina mugabo anga haki anga kyomwakutonga kili kyanyu omuli Yerusalemu.”