Nehemia 13 - Ebibulia 2001

Okutaishukana n'abanyamahanga

¹ Kir'ekyo bashomera embaga Ekitabo kya Musa. Bashanga ahandikirwemu okwo Omuamoni n'Omumoabu batalija n'akake mu nteko ya Ruhanga,

² aha rw'okuba tibayakiliire BaIsiraeli kubaletera kyakulya na maizi, shana babetera Balaamu kwija kubarama; nawe Ruhanga waitu akaiza omuramo ogwo, yabaha omugisha.

³ Abaisiraeli kabahuliire Amateka ago babinga abanyamahanga bona omu nteko.

⁴ Ebyo kabyabaire bitakabaireho, omukuhani Eliashibu ayabaire atairweho kulebelera ebiyumba bya Rwensinga ya Ruhanga waitu, akaba ali mutahi wa Tobia.

⁵ Atekatekera Tobia ekiyumba kihango mbali babaire bataire ekihongo ky'emyaka, obunuma, ebikwato n'ekichweka kya ikumi ky'emyaka ebyo babaire baragiirwe kuha Abalevita, abahoyi n'abakumilizi n'emichango y'abakuhani.

⁶ Orwo ebi bilikubaho inye nkaba ntali Yerusalemu enshoga omu mwaka gwa 32 gw'Omukama Aritashasita owa Babiloni nkaba nkurasire. Ahanyuma nshaba omukama k'antaishura,

⁷ nyija Yerusalemu, nirwo namanyire eihano elyo Eliashibu yabaire akozire, kutekatekera Tobia ekiyumba omuli Rwensinga ya Ruhanga.

⁸ Nigara muno. Ebikwato bya Tobia by'omu nju mbihya omu kiyumba mbichunkya aheru.

⁹ Nshuba ndagira kabogya ebiyumba, ahanyuma ngaruramu ebikwato bya Rwensinga, ekihongo ky'emyaka n'obunuma.

¹⁰ Kwakwo nshanga Abalevita batahabwa mishondo. Abalevita abo n'abahoyi abakoraga emilimo, bona bakaba bashubire omu mataka gabo.

¹¹ Kityo ndwanisa abakuru nti, “Kubaki Abalevita n'abahoyi basigireho Rwensinga?” Mbeta, mbagarura aha bika byabo.

¹² Aho Yuda yona baleta ekichweka kya ikumi ky'engano, edivai n'amajuta omu sitoa.

¹³ Ntaho abahanika kulebelera esitoa ezo. Bonene abo ni Shelemia omukuhani na Zadoki omuhandiki na Pedaya Omulevita, Hanani eya Zakuri, Zakuri eya Hanania ali muhwezi wabo, aha rw'okuba bakaboneka bali besigwa; mara omuruka gwabo gukaba guli kugabira barumuna babo.

¹⁴ Waitu Ruhanga wange banyijuke aha kigambo eki, batebwa bikorwa byange ebirungi ebyo nkoleire Rwensinga yawe n'omulimo ogulikukolerwamu.

¹⁵ Omu makiro ago nkabona omuli Yuda abashaija nibajunga edivai ahali Sabato, nibaleta ebiba by'engano nibabitweka endogobe, n'edivai, ezabibu, etini n'emigugu ya buli ngeli, eyo baletaga Yerusalemu ahali Sabato. Kiro kyonene ekyo nkabataisa kuguza ekyakulya.

¹⁶ Abantu ba Tiro abaturaga Yerusalemu nabo baletaga enfuru n'engeli zona z'ebintu babiguza Abayahudi omuli Yerusalemu aha kiro kya Sabato.

¹⁷ Aho ndwanisa abami ba Yuda nti, “Ihanoki eli elyo mulikukora kuhagaza ekiro kya Sabato?

¹⁸ Tikwo baisheinywe bakozire batyo, Ruhanga akasilikya ekigo eki akakiteza enaku ezi? Mbwenu nimushuba nimuhagaza Sabato kugendelera kuletera Isiraeli orushengo!”

¹⁹ Karwabaire rwashwilima aha bihigi bya Yerusalemu, Sabato etakahikire, enyigi zikingwa mara ntaho omuku zitakingurwa kuhika Sabato kuhwa. Ntaho abashaija bange aha bihigi omugugu gwona gwona gutatahamu aha kiro kya Sabato.

²⁰ Aho abatunzi n'abaguza b'engeli zona z'ebintu bashura aheru ya Yerusalemu ekiro kimoi anga bibili.

²¹ Kyonkai mbataisa, mbagambira nti, “Kubaki nimushura aha boma ya Yerusalemu? Kamurakikora orundi ndabatera.” Kwema aho tibashubire kwija eli Sabato.

²² Ndagira Abalevita kweshemeza n'okwija kulinda ebihigi, ekiro kya Sabato kitahagara. Waitu Ruhanga wange bangilire ekisha, baijuke ekigambo eki, banganyire nk'okwo obungi bw'ekisha kyawe buli.

²³ N'omu makiro ago mbona Abayahudi abashweire Abaashidodi, n'Abaamoni, n'Abamoabu.

²⁴ Enusu y'abana babo bafumoraga Oruashidodi. Tibakushoboire kufumora Ruyahudi shana orulimi rwa buli ihanga.

²⁵ Mbakunganisa, mbaraama, abandi mbatera, mbakunyura eishoke, mbanahiza omw'ibara lya Ruhanga nti, “Mutalisiigira batabani babo bahara abanyu, anga kushwelerera batabani banyu bahara babo, anga inywe kubashwera.

²⁶ Omukama Solomoni owa Isiraeli tiyafakaire atyo nazira abakazi nk'aba? Omu mahanga gangi hakaba halimu mukama nka wenene, kandi Ruhangawe akaba ali nganziye, mara yamuhindura mukama wa Isiraeli yona, kyonkai abanyamahanga bamufakaza.

²⁷ Isi aho tuhulilize inywe, tukore eihano lihango nk'eli, tushwere abanyamahangakazi kufakalira Ruhanga waitu?”

²⁸ Mutabani wa Yoyada omoi, Yoyada eya Eliashibu Omukuhani, akaba ali mukoi wa Sanibalati, ow'ekigo kya Betihoroni. Ogwo nkamubinga omu maisho gange.

²⁹ Waitu Ruhanga wange, osingire, obaijuke, aha rw'enshonga bakahagaza obukuhani, bahagaza n'endagano eyo wakozire n'abakuhani n'Abalevita.

³⁰ Nikwo nabelize ntyo nkabamaramu obunyamahanga, nkataho ezamu z'abakuhani n'Abalevita, buli muntu omu mulimogwe;

³¹ kandi naragira n'emiletere y'enkwi z'ebihongo aha kanya akaragiirwe, n'ebiraba bya mbere. Waitu Ruhanga wange, onyijuke aha rw'ebirungi ebyo.