Nehemia 12 - Ebibulia 2001

Abakuhani n'Abalevita

¹ Aba nibo bakuhani n'Abalevita abazahe abagarukire na Zerubabeli eya Shealisieli na Yeshua: Seraya, Yeremia, Ezira;

² Amaria, Maluki, Hatushi;

³ Shekania, Rehumu, Meremoti;

⁴ Ido, Ginetoni, Abiya;

⁵ Miyamini, Maazia, Biligai;

⁶ Shemaya, Yoyaribu, Yedaya;

⁷ Salu, Amoki, Hilikia na Yedaya. Aba bakaba bali bakuru b'abakuhani n'abanyaruganda babo omu biro bya Yeshua.

⁸ Abalevita ni Yeshua, Binui, Kadimieli, Sherebia, Yuda na Matania ayalebeleraga empoya z'okusima wenene n'abanyarugandabe.

⁹ Bakibukia na Uno barumuna babo bahoyaga balebangaine nabo.

¹⁰ Yoshua akazara Yoyakimu, Yoyakimu yazara Eliashibu, Eliashibu yazara Yoyada;

¹¹ Yoyada yazara Yonatani, Yonatani yazara Yadua.

Abakuru b'amahiga g'abakuhani

¹² Omu makiro ga Yoyakimu hakaba haliho abakuhani abakuru b'amahiga: Melaya mukuru w'eihiga lya Seraya, Hanania w'elya Yeremia;

¹³ Meshulamu w'elya Ezira, Yohanani w'elya Amaria;

¹⁴ Yonatani w'elya Maluki, Yozefu w'elya Shebania;

¹⁵ Adina w'elya Harimu, Helikai w'elya Merayoti;

¹⁶ Zekaria w'elya Ido, Meshulamu w'elya Ginetoni;

¹⁷ Zikiri w'elya Abiya, ondijo w'elya Miyamini, Pilitai w'elya Moadia;

¹⁸ Shamua w'elya Biliga, Yonatani w'elya Shemaya;

¹⁹ Matenai w'elya Yoyaribu, Uzi w'elya Yedaya;

²⁰ Kalai w'elya Salai, Eberi w'elya Amoki;

²¹ Hashabia w'elya Hilikia, Netaneli w'elya Yedaya.

Eby'eka z'abakuhani n'Abalevita

²² Omu makiro ga Eliashibu na Yoyada na Yohana na Yadua, amakuru g'abakuru b'amahiga g'Abalevita n'ag'abakuhani gakahandikwa kuhika orwo Dario Omwajemi yatwete.

²³ Amakuru g'ab'amahiga g'Abalevita gakaba gahandikirwe omu Kitabo ky'Amakiro kulemwa kugoba omu biro bya Yohanani eya Eliashibu.

Emiruka y'Abalevita omuli Rwensinga

²⁴ Abakuru b'Abalevita ni Hashabia, Sherebia na Yeshua eya Kadimieli na barumuna babo nibahoya balebangaine kuhaisiliza n'okusiima nk'okwo Daudi omushaija wa Ruhanga yaragiire, ebyo babikoraga nibaihyangana.

²⁵ Abakumilizi abalindaga aha sitoa z'aha bihigi ni: Bakibukia, Obadia, Meshulamu, Talumoni na Akubu.

²⁶ Aba bakaba baliho omu biro bya Yoyakimu eya Yeshua, Yeshua eya Yozadaki, n'omu biro bya Nehemia gavana na Ezira omukuhani mara omuhandiki.

Nehemia naha omugisha eboma ya Yerusalemu

²⁷ Omu biro by'okuha eboma ya Yerusalemu omugisha, bakahiga Abalevita omu mbaju zona babaleta Yerusalemu, bakora amagenyi ago nibashemelerwa, nibasiima, nibahoya, nibatera enkunturo, enanga n'eningili.

²⁸ Abahoyi bahurura; baruga omu bichweka ebyataine Yerusalemu n'omu byaro by'Abanetofati,

²⁹ Betigiligali n'omu mukoa gwa Geba na Azimaweti. Abahoyi abo bakaba batwire omu byaro ebyataine Yerusalemu.

³⁰ Abakuhani n'Abalevita bakeshemeza mara bahasilira embaga n'ebihigi n'eboma.

³¹ Aho nyeta abatwazi ba Yuda ahali eboma eiguru. Ntaho ebichweka bibili bihango by'abantu abalikusiima abagenda omu maandamano. Ekichweka ekimoi kigenda obulyo eiguru y'eboma kugoba Ekihigi ky'Orubungo,

³² bahonderwaho Hoshaya n'enusu y'abatwazi ba Yuda,

³³ na Azaria, Ezira, Meshulamu;

³⁴ Yuda, Benjamini, Shemaya, Yeremia;

³⁵ n'abakuhani abandi bakwete amakondere; Zekaria eya Yonatani, Yonatani eya Shemaya, Shemaya eya Matania, Matania eya Mikaya, Mikaya eya Zakuri, Zakuri eya Asafu,

³⁶ n'abanyarugandabe: Shemaya, Azareli, Milali, Gilalai, Maai, Netaneli, Yuda na Hanani, baina ebikwato by'omuziiki ebya Daudi omushaija wa Ruhanga. Kandi Ezira omuhandiki agenda abebembeire.

³⁷ Aha Kihigi ky'Enchuro bagenda bemeleize, baraba aha matembero g'Ekigo kya Daudi aha butemba bw'eboma, eiguru y'ekikaare kya Daudi, kuhika Ekihigi ky'Amaizi oburugaizoba.

³⁸ Ekichweka ekindi eky'abasiimire bagenda obumosho, inye mbahondera n'enusu y'embaga eiguru y'eboma, n'eiguru y'Omunara gw'Ebyoto kugoba aha Boma Empango,

³⁹ n'eiguru y'Ekihigi kya Efraimu, n'aha Kihigi Ekikuru, n'aha Kihigi ky'Enfuru, n'aha Munara gwa Hanaeli, n'aha Munara gw'Ekikumi kugoba aha Kihigi ky'Entaama; bagoba aha bwemelero aha Kihigi ky'Omulinzi.

⁴⁰ Kityo ebichweka byombili eby'abasiimire byemelera Rwensinga, nanye nyemelera n'enusu y'abakuru:

⁴¹ Abakuhani: Eliakimu, Maaseya, Miyamini, Mikaya, Elioenai, Zekaria na Hanania bakaba baina amakondere;

⁴² Maaseya, Shemaya, Eleazari, Uzi, Yehohanani, Malakiya, Elamu na Ezeri. Abahoyi bahoya, Yezirahia ali mwebembezi wabo.

⁴³ Kir'ekyo batamba ebitambo bingi mara bashemelerwa, aha rw'okuba Ruhanga akabagiza ebyera bingi; abakazi n'abana nabo bashemelerwa. Amashemelerwa ga Yerusalemu ago gakahulirwa harai.

Ebihongo nibiletwa Rwensinga

⁴⁴ Aha kir'ekyo, arondwa abashaija kulinda esitoa, emichango, ekichweka kya ikumi ky'ebiraba bya mbere kubishombokezamu emishondo elikuragirwa amateka g'abakuhani n'Abalevita kuhondera n'endimiro z'ebigo. Abayahudi bakashemelerwa abakuhani n'Abalevita,

⁴⁵ kuba bakakora eikora elyo Ruhanga wabo yabaire aragiire, bahasilira n'embaga. Abahoyi n'abakumilizi nabo bakora nk'okwo Daudi n'omutabani Solomoni baragiire.

⁴⁶ Omu makiro ga Daudi na Asafu omukuru hakaba haliho omukuru w'abahoyi, n'empoya z'okuhaisiliza n'okusiima Ruhanga.

⁴⁷ Abaisiraeli bona omu biro bya Zerubabeli n'omu bya Nehemia, buli kiro balisaga abahoyi n'abakumilizi; eby'Abalevita babibiikaga; kandi Abalevita babiika ebya baijukuru ba Aroni.