Nahumu 2 - Ebibulia 2001

Okukambuka kwa Ninive

¹ Ninive, ow'okukukambura yakutabalira. Ta abalinzi aha boma; oteho n'ab'okulinda emihanda. Oyekomere kimoi ogume, oyetekateke.

² (Omukama ali haihi kugaruraho ekitinwa kya Isiraeli nk'okwo kyabaire kili omubisha atakagisilikize akaginyaga.)

³ Eihe ly'omubisha likwete engabo zilikutukura, n'emyendo lijwete katuku. Amagali g'endashana nigamyansa nk'endimi z'omuliro orwo bagatekatekeire endashana, efarasi niziguruka.

⁴ Amagali nigaligitira omu mbarabara, nigasilikira oku n'oku omu katare. Nigamyansa okw'obona emuli, nigarabya nk'orurabyo.

⁵ Abakuru b'eihe nibetwa, nibagenda nibasitara, nibanguha bagiire aha boma, n'eky'okwetangizayo bakitaireyo.

⁶ Ebihigi by'aha mwiga bikingukire, omu kikare emyoyo ebemeleire.

⁷ Omukama bamujwire bamutwara endore, abazanabe nibachura okw'obona ebiiba, nibatongya, nibetera ebifuba.

⁸ Ninive neshusha ekitunga ky'amaizi galikugera. Nibeta nibagira bati, “Mwemelere! Mwemelere!” Kyonkai taliho n'omoi alikugaruka.

⁹ Munyage efeza n'ezahabu! Ekigo kijwire ebintu by'eiguzi lingi muno.

¹⁰ Ninive yaranduka! Yaranduka yasilika! Abantu bona tibaina mani mu nyugunyu, amaisho gabatukwire!

¹¹ Enyanga y'entare elihai? Elihai empako y'entare zito, mbali entare yatwaraga obwite bwayo, mbali ebyana byayo byaikaraga hataliho wa kubiita kubi?

¹² Entare yaitaga obwite bwayo, eshuba ebutagulira enkazi yayo n'ebyana byayo; empako zayo ezijuza enyamaishwa zoyaita, enyanga zayo ezijuza enyama eyo yashanshamura.

¹³ Omukama w'amahe nagamba ati, “Leba, mbemire kubi. Amagali ganyu ningokya nigachunka omwika, kandi entare zanyu ezito embanda nezitema. Omu nsi timukikwatamu minyago, n'entumwa zanyu tizilihulirwa maraka rundi.”