Mwegesa 9 - Ebibulia 2001

Endekelero ya bona eb'emoi

¹ Byona ebi nkabitekeleza, naleba buli kantu, nabona okwo omurungi n'omumanyi Ruhanga niwe abagelera nangu n'ebikorwa byabo. Kyonkai taliho muntu amanya nk'aligonzibwa anga nk'alinobwa. Ahali bonene buli kantu tikaina mugasho.

² Bona endekelero yabo eba emoi. Omurungi n'omubi, alikwera n'omuhagare, abatamba ebitambo n'abatabitamba, bona kumoi. Okwo omuntu omurungi aba n'omufakare nikwo aba. Anahira niwe omoi n'olinya atenda n'akake kunahira.

³ Ako niko kabi k'ebintu byona ebikorwa omu nsi. Abantu bona endekelero yabo eb'emoi. Ekindi, orwo abantu bakyarora bagonza muno okukora kubi mara bashusha abararu. Kandi ahanyuma bafa.

⁴ Kyonkai omurora ashubira, kuba embwa elikurora ekira entare efire.

⁵ Enshonga abarora bamanya okwo balifa, kyonkai abafire tibakimanya, tibakiinayo mperwa yona yona mara bayebekire.

⁶ Okugonza kwabo n'okunoba kwabo n'okuchuba kwabo byachwekire. Kandi ebilikukorwa omu nsi bonene tibakibikora.

⁷ Ogende olye akakulya kawe n'amashemelerwa, onywe n'akadivai kawe n'ebyera, enshonga eby'olikukora Ruhanga yabisiimire.

⁸ Buli kanya ojwarega ebilikwera, kandi otujuta tutalikubura mu mutwe.

⁹ Orore kurungi na mukazi wawe omugonzibwa wawe, ebiro byona eby'oburora obu obutagira mugasho obwo yakuhaire omu nsi omu. Manyasi ogwo nigwo mugabo gwawe omu burora obu n'omu milimo yawe ekuchwazikanisa omu nsi omu.

¹⁰ Kyona kyona eky'oragobyagaho emikono okikore n'amani, ahakuba Sheoli mbali olikugya tabayo mulimo anga kitekelezo anga magezi anga bumanyi.

¹¹ Kandi nkabona ekintu ekindi omu nsi omu, abamanya kwiruka tibasinga mu kwiruka, anga ab'amaani kuba nibo basinga endashana, anga kugir'oti abamanyi nibo bagira ekyakulya, anga ab'amagezi kuba nibo babona eitunga, anga abegire kuba nibo baronkwa, kuba eibanga n'obushango bibonwa bona.

¹² Omuntu tamanya ibangalye. Abantu bazangiranwa omw'izoba libi orwo libagobera kibandagara nk'enfuru ezikwatwa omutego.

¹³ Kwakwo omu nsi omu nkabona obulebero bw'obumanyi, mara nabona okwo obulebero obwo buli bw'amani.

¹⁴ Akaba haliho ekigo kike nikiturwamu abantu batali bangi. Omukama w'amani atabalira ekigo ekyo akibunda, akitera ensinde zihango.

¹⁵ Kyonkai hakaba halimu omuntu munaku naho ali mumanyi, aha rw'obumanyibwe agya arokora ekigo ekyo. Nawe omunaku ogwo taliho muntu yamwijukire.

¹⁶ Nirwo nagambire nti, “Obumanyi nibushaga amani.” N'orwo obumanyi bw'omunaku bugahywa, n'ebyo agamba tibabyetaho.

¹⁷ Eby'omumanyi agamba omu buchulezi kabihulilizibwa bikira eyombo y'omutwazi omu bafera.

¹⁸ Obumanyi nibukiza ebikwato by'endashana omugasho, kyonkai omufakare omoi aita ebirungi bingi.