Mwegesa 8 - Ebibulia 2001

Omuhuliro aha Mukama

¹ N'ohai alikushusha omuntu omumanyi? N'ohai alikumanya kwitoitora ebigambo? Omuntu obumanyibwe bumushanyukya aha maisho, n'emikanya emuhwa omu buso.

² Inye nyekomya omuhango gw'Omukama, kandi ekyo ndaganisize Ruhanga tikimpwahwanisa mutima.

³ Oruge omu mabona g'omukama otamuzebazebeera mu maisho, kuba wenene akora okwo yashanga.

⁴ Manti ekigambo ky'omukama kiba imaragona, n'ohai ayakumubaza ati, “Iwe nokoraki?”

⁵ Omuntu ahulira omuhango tagubwaho kabi, kandi omumanyi amanya mbali arahikiza omuhango ogwo n'okwo araguhikya.

⁶ Buli kigambo kigira omwanya gwakyo ogw'okukolerwaho n'okwo kirakorwa, kyonkai omuntu enakuze tizimubonesa ebyo.

⁷ Ahakuba aba atalikumanya bilikwija kubaho, mara n'ow'okumugambira ebilikwija kubaho taliho.

⁸ Tabaho muntu agira bushobora bwa kukwata mwoyo anga kutanga rufu kiro ekyo ruraliire kwija. Okwo endashana etangatanga buli muntu nikwo n'entambara zitangatanga abazikora, omubi n'omurungi.

⁹ Ebi byona nkabilebage orwo nabaire nimpiga kushobokerwa buli kantu akakorwa omu nsi, nimbona abantu nibatekelera abandi kwenaga omu naku.

¹⁰ Ahanyuma mbona nibaziika abantu ababi. Bagyaga Rwensinga hati hati, nibahaisilizibwa omu kigo mbali bakoleraga ebyab'ebi. Ekyo nakyo bushai.

¹¹ Aha rw'ababi kutanguha kubona kibonabonyio, niyo nshonga emitima y'abantu eikara nerokonkwa kukora kubi.

¹² N'orwo omufakare akora kubi emirundi kikumi mara akarora oburora burai, nimanya okwo abatina Ruhanga baligira emilembe aha rw'okumutina.

¹³ Kyonkai omubi taligira mirembe. Oburorabwe tibuliraihya nka kinyumanyumi, tatina Ruhanga.

¹⁴ Haliho n'ekintu ekindi ekibaho omu nsi kyonkai tikigira nshonga, abantu abarungi kugwerwa ebyaba bisanire ababi, kandi ababi bakabona ebyaba bisanire abarungi. Eki nakyo ninkigamba okwo kitaina nshonga.

¹⁵ Ahanyuma nasiima okushemelerwa oburora. Omu nsi omu omuntu tagiramu kantu karungi shana okulya, okunywa n'okushemelerwa. Aho aragiraga ebyera omu byo arakakoraga omu burorabwe bwona obwo Ruhanga yamuhaire omu nsi.

¹⁶ Kanalengire kumanya obumanyi, nkabona n'emilimo ekakorwa omu nsi omu, okwo na kiro na mushana omuntu tanagira,

¹⁷ nirwo naboine byona ebyo Ruhanga yakozire. Taliho muntu yakushobokerwa ebikorwa mu nsi. N'orwo omuntu yakutaho atai amani kubishobokerwa, taina kubona nshonga yabyo. N'orwo omumanyi yakugamba okwo wenene alikumanya, taina kubishobokerwa kwokwokwo.