Mwegesa 7 - Ebibulia 2001

Eibara tiligira mugasho

¹ Eibara lirungi nilikira amajuta g'eiguzi, kandi ekiro ky'okufa nikishaga ekiro ky'okuzarwa.

² Hakili kugya mbali balikuchura, kushaga kugya mbali hali obugenyi. Orufu niyo ndekelero y'abantu bona, mara ekigambo eki abantu bakite aha mutima.

³ Hakili obujune kushaga ensheko, kuba obujune bw'aha maisho bwakuleta ebyera aha mwoyo.

⁴ Omugezi agonza mbali balikuchura, kyonkai omufera agonza mbali hali obugenyi.

⁵ Hakili kuhulira omuhano gw'omumanyi, kushaga kuhulira ekizina ky'omufera.

⁶ Okwo enkwi z'amahwa zibarabarukira omu kyoto, nikwo n'omufera abarabarura ensheko. Ekyo nakyo bushai.

⁷ Omugezi kubonesa banu enaku ahinduka mufera, kandi okulya rushwa kwita omuntu amagezi.

⁸ Endekelero y'ekintu nungi kushaga embandizo yakyo, kandi ayegumisiliza ashaga ow'eikuru.

⁹ Otanguha kunigara, kuba okunigara kugirwa abafera.

¹⁰ Otaligamba oti, “Kubaki amakiro ag'eirai gabaire gali garungi kushaga aga mbwenu?” Okubaza otyo ti kigambo kya magezi.

¹¹ Obumanyi bushusha obusika, bugasira abantu.

¹² Obumanyi bumara ebyemba nk'empiya, omugasho gw'obumanyi nigw'ogu, obumanyi bulinda omumanyi.

¹³ Tekeleza ebyo Ruhanga yatonzire, ekyo wenene yalemaize ow'okukigorora n'ohai?

¹⁴ K'amakiro garashemeraga oshemelerwe, kagaratamaga otekeleze, amakiro agarungi n'agabi niwe yagataireho. Orw'ekyo omuntu taina kumanya bilimubaho mu maisho.

¹⁵ Omu burora bwange obu obutaina nshonga naboine buli kantu, haliho omurungi kufa akyali murungi, kandi haliho omubi kwikara ali mubi, mara akagira oburora burai.

¹⁶ Otaliba murungi okashagulirana, kandi otaliba mumanyi okarabyamu, otalija okeisa.

¹⁷ Otaliba mubi okashagulirana, kandi otaliba mufera, otalija okafa otagobize.

¹⁸ Oyekomye okutaba mubi okashagulirana n'okutaba mufera, aha rw'okuba omuntu atina Ruhanga ebyo abyelinda.

¹⁹ Omumanyi obumanyi bumuha amani, ashaga abatwazi ikumi omu kigo kimoi.

²⁰ Mazima omu nsi tabamu muntu murungi akora kurungi, atafakara.

²¹ Otalihuliliza buli kantu ak'abantu bagamba, otalilemwa okahulira omwiru wawe nakujuma,

²² okwo naiwe orajumire abandi emirundi nyingi.

Okwitanira obumanyi

²³ Nkakoza obumanyi omu kulebage ebintu ebi, nirwo nagambire nti, “Mbe mumanyi.” Kyonkai tinashoboire kuba ntyo.

²⁴ Obumanyi bulikaba kintuki nibuguma kububona, mara kintu kihango muno. N'ohai ow'okumanya mbali buli akabuzora?

²⁵ Kityo nkahindura ebitekelezo natekeleza nahenjuza, nahigiliza, nayebaza n'ebintu bingi, namanya n'akabi k'obufera, namanya n'okwo obufera liba iraru.

²⁶ Nkabona ekiba kibi kushaga rufu, niwe mukazi alikushusha omutego, ebitekelezobye nibishusha ekitimba, n'emikonoye neshusha empingo. Omuntu ashemeleza Ruhanga airuka omukazi ogwo, kyonkai omufakare amugwaho.

²⁷ Omwegesa nagamba ati, “Leba ekyo naboine, nkagenda nimbona ekintu kimoi kimoi, aho mpigire kumanya enshonga y'eki na kili.

²⁸ Kanabaire nkyahenjuza kyonkai ntakaboine kantu, nyija ngwamu omushaija omoi omurungi omu bantu rukumi, kyonkai omuli abo bonai omukazi tinamuboinemu.

²⁹ Nkabona ekintu kimoi kyonkai, niky'eki, Ruhanga akatonda abantu bali barungi, kyonkai bonene baija bakora agabo gangi.”