Mwegesa 5 - Ebibulia 2001

Okutanguha kuragana

¹ K'oliba nogya Rwensinga olyelinda emitambukire yawe. Okugyamu okegesibwa nikukira okutamba ebitambo nk'okwo abantu abafera bagira, ahakuba baba batalikumanya kwo balikukora kubi.

² Otanguha kugamba, kandi otaba mwangu kugira kyo waraganisa Ruhanga, kuba Ruhanga asingiire omwiguru, iwe oli omu nsi. Orw'ekyo ogambe bike.

³ Okubuyana kungi kuletera omuntu ebiroto bibi, kandi engambagambi egamba eby'obufera.

⁴ Kawaraganisa Ruhanga ekigambo, oyanguhe okigobesheleze, enshonga wenene abafera tibamushemelera. Ekyo waragana okigire.

⁵ Hakili kutaragana kigambo kushaga ekyo waragana otagobesheleze.

⁶ Otalifakaza kanwa kwija kugambira mukuhani wa Ruhanga okwo obaire otakigendeleire. Kiki kwetamisa ahali Ruhanga kwija okaita ebyo oyekoleire?

⁷ Okwo omuntu aikara natekeleza ewangaija, nikwo oragamba bingi eby'obufera. Ekikuru otine Ruhanga.

Oburora tibugira mugasho

⁸ Omu butwazi nanka k'olibona omunaku nibamushasa, nibamwaka ebilibye, ekyo kitalikutangaza. Omutwazi ogwo haliho omutwazi amukizire alikumutwara. Bombili abo haliyo abatwazi abalikubashaga.

⁹ Eby'ensi eyeza biba by'abantu bona, omukama nawe nibyo alebireho.

¹⁰ Omuntu agonza empiya tazihaga. N'agonza eitunga ebyo byona tabiguta. Ekyo nakyo bushai.

¹¹ Ebintu kabikanya n'ab'okubilya bakanya. Mukama wabyo bimugashaki shana okubishemelerwa aha maisho kushai?

¹² Enkozi y'emilimo enagira oturo oturungi, yalya bike anga bingi, kyonkai omutungi eitungalye tilimuha turo.

¹³ Omu nsi omu ndaboinemu eihano elibi muno, omuntu akatuuma ebintu byamunaga omu kabi,

¹⁴ mara ebintu ebyo bikafa omu muzano. Omuntu ogwo akasiga omwana, kyonkai omwana ogwo tiyasikire kantu.

¹⁵ Ensi egi okwo omuntu yagiziremu ali bushai nikwo agirugamu ataina kantu. Aha byoyakozire byona taliho kyo atwara.

¹⁶ Eki nakyo kigambo ekilikushasa muno, okwo omuntu yaizire nikwo aligenda. Amagoba abona gaha og'okukora ebilikutwarwa omuyaga?

¹⁷ Oburorabwe bwona ashusha alikutura omu mwilima ajurugukire omutima, nashasha mara ayetamirwe.

¹⁸ Ekyo naboine kisaine mara kili kirungi, muntu kulya akanywa eby'akozire, abibonemu amagoba omu burorabwe obugufi omu nsi omu obwo Ruhanga yamutungire. Eki nakyo kiba kyemba aha muntu.

¹⁹ Kwakwo buli muntu owo Ruhanga yahaire eitunga n'ebintu n'obushobora eby'okumushemeleza, kandi eby'akozire kubibonamu amagoba akashuba akabisigaho, egi gabo kuruga ahali Ruhanga.

²⁰ Omuntu oburorabwe tabwijuka muno, kuba Ruhanga amwikaza n'ebyera omu mwoyo.