Mwegesa 4 - Ebibulia 2001

¹ Nkashuba nabona akagingijanyio aka buli ngeli akalikukorwa omu nsi. Abalikugingizibwa leba nibalira, mara tibaina muntu wa kubamaramara! Orubaju rw'abalikugingiza banu rwina mani, kyonkai abalikugingizibwa hakaba hataliho muntu wa kubamaramara.

² Aho nkatekeleza okwo abafu ababaire bafire bali baberwa kushaga abalikurora abakyali oruguru,

³ kyonkai alikubakira bombili n'atakabaireho, atakabonaga mahano agakorwa mu nsi.

⁴ Aho nkabona okwo akachwazikano kona n'obubuya bwona bitabuka aha muntu kuchubira mutahiwe. Eki nakyo ni bushai mara kusa amani.

⁵ Omufera afunya emikono, ayeisa enjara.

⁶ Hakili kugira bike kyonkai okagira emilembe aha mutima kushaga okukora muno okasa amani.

⁷ Nkashuba nabona ebitaina nshonga omu nsi.

⁸ Nk'omuntu ataina babo, yaba mwana anga omurumuna, kukora emilimo akahendeka obutalekera, buli kirungi kimushemelera, kyonkai tayebaza kugira ati, “Owo mpendekera, nkeimira ebirungi, ab'ohai?” Eki nakyo ni busha mara ky'obujune.

⁹ Ababili nibakira omoi. Babona emperwa nungi aha rw'eikora lyabo.

¹⁰ K'ogu yakugwa mutahiwe amwimukya, kyonkai mushashe ogwo ali wenkai, k'alikugwa taina ondijo wa kumwimukya.

¹¹ Kandi ababili kabakubyama hamoi batagatirwa, kyonkai omoi yakutagatirwa atai ali wenkai?

¹² N'orwo omuntu yakusinga ali wenkai, ababili nibamulema. Omuguha gw'enyaishatu tigugutuka bwangu.

¹³ Hakili omusigazi omunaku kyonkai omumanyi kushaga omukama mugurusi kyonkai mufera, atakyenda kuhanulirwa,

¹⁴ n'orwo araba yarugire jera akagya aha ngoma anga araba akazalirwa mu naku akaija akaba mukama w'ensiye.

¹⁵ Nkaleba abantu bona abakatura omu nsi nabona okwo balirugwamu omusigazi akasikira omukama,

¹⁶ abantu ab'omukama atwara baba bangi muno, kyonkai k'alikuba yahoireho taliho alikumisiimira byoyakozire. Mazima byona bushai mara kusa amani.