Mwegesa 3 - Ebibulia 2001

Buli kantu na mwanya gwako

¹ Buli kintu kigira ekirumo kyakyo, kandi buli kantu kagira amakiro gako omu nsi omu.

² Amakiro g'okuzara n'amakiro g'okufa, amakiro g'okubyara n'amakiro g'okunoga ebyabairwe,

³ amakiro g'okwita n'amakiro g'okukiza, amakiro g'okukambura n'amakiro g'okwombeka,

⁴ amakiro g'okulira n'amakiro g'okusheka, amakiro g'okuchura n'amakiro g'okuzina,

⁵ amakiro g'okunaga amabare n'amakiro g'okugashomboza, amakiro g'okufumbata n'amakiro g'okweshumba okufumbata,

⁶ amakiro g'okuhiga n'amakiro g'okunaga, amakiro g'okubiika n'amakiro g'okunaganaga,

⁷ amakiro g'okutagura n'amakiro g'okubaziira, amakiro g'okwesiza n'amakiro g'okugamba,

⁸ amakiro g'okugonza n'amakiro g'okunoba, amakiro g'endashana n'amakiro g'emilembe.

⁹ Eby'omuntu ahendekeire bimugasiraki?

¹⁰ Nkabona emilimo eyo Ruhanga yahaire abantu kukora.

¹¹ Akakora buli kintu kili kirungi omu mwanya gwakyo, kwakwo akashoboza omuntu kumanya okwo eirai lyona libayo, kyonkai tiyamushoboize kumanya byo Ruhanga wenene yakozire kwema aha mbandizo kugoba aha nzindo.

¹² Nimanya okwo taliho kikilira bantu okugira ebyera n'okushemelerwa oburora bwabo bwona.

¹³ Kwakwo nimanya okwo Ruhanga yahaire buli muntu egabo y'okulya n'okunywa n'okushemelerwa byona ebyo akora bikagoshoka.

¹⁴ Nimanya okwo kyona kyona ekyo Ruhanga akora kigumaho eirai lyona, tikyakwongerwaho kantu anga kurugwaho kantu; Ruhanga akakikora atyo, abantu babone kumutina.

¹⁵ Ekiliho kirabaireho, n'ekili ky'okubaho kirabaireho, Ruhanga agaruraho ekirabaireho.

¹⁶ Kandi nkashuba nabona omu nsi omu okwo mbali hakubaire ehaki, ehaki tebaho, nangu na mbali hakubaire obugorogoki, abaho obufu.

¹⁷ N'orwo natekeleize nti Ruhanga aliramura omugorogoki n'omubi, okuba akataho omwanya gwa buli kintu na buli mulimo.

¹⁸ Aho nabona okwo Ruhanga alikulenga abantu kuboleka okwo balikushusha ebigunju.

¹⁹ Ahakuba ebigwera abantu n'ebigwera ebigunju nibyo bimoi, okwo omuntu afa nikwo n'ekigunju kifa. Okwo omuntu aikya nikwo n'ekigunju kiikya. Omuntu taina kyo alikukiza kigunju, enshonga ebintu byona ni bushai.

²⁰ Mbali omuntu agya niyo n'ekigunju kigya, omuntu aruga omu chuchu n'ekigunju kwakwo, omuntu agaruka omu chuchu n'ekigunju kutyo.

²¹ N'ohai alikumanya nk'omwoyo gw'omuntu gutemba eiguru kandi omwoyo gw'ekigunju gusongoka okuzimu?

²² Aho nkabona okwo hataliho kili kirungi kushaga omuntu kushemelerwa eby'akozire bikagoshoka, okuba ogwo nigwo mugabogwe. N'ohai ayakushobora kumugarura k'abona ebyakubaho wenene yarugireho?