Mwegesa 2 - Ebibulia 2001

¹ Nkatekeleza aha mutima nti, “Mbwenu leba, shemelerwa, manye amashemelerwa kiki.” Kyonkai kanalebire mbona okwo n'amashemelerwa nago bushai.

² Nkabona okwo ensheko liba iraru, mara okwo amashemelerwa tigagasha kantu.

³ Nkataho amani nahiga okwo nakunywa amarwa nkashemelerwa, mara nkaikara ndi mufera, kyonkai ebi nimbikoza amagezi ndemwe mbone eby'abantu balikuragirwa kukora omu nsi omu burora bwabo obugufi.

⁴ Nkakora eby'amaani, nayombeka amaju, nabyara n'emizabibu.

⁵ Nkalima ebusitani nabyaramu emiti y'ebiraba eya buli ngeli.

⁶ Nalima ebitunga by'okutahamu amaizi g'okwitilira emiti egyo k'ekura.

⁷ Nkagura abairu n'abazana, kandi nkaba nyinaho n'abairu abazaliirwe omwange. Nkaba ntungire amahyo gahango muno ag'ente n'ag'entaama kushaga omukama wena wena ayanyebembeire omuli Yerusalemu.

⁸ Kwakwo nakukumba efeza n'ezahabu n'eitunga ly'abakama n'emikoa, nagira abahoyi abashaija n'abakazi n'ensholeke zingi, byona eby'abantu benda.

⁹ Kityo nkakira abakama bona abanyebembeire omuli Yerusalemu, kwakwo amagezi gange nkaikara nago.

¹⁰ Ebyanshemeleraga aha maisho nabihigaga. Ebirungi nabyendaga, kuba ebyo nakoraga bikagoshoka byanshemeleraga, aga gabaga magoba g'emilimo yange.

¹¹ Aho ntekeleza byona ebyo nakozire n'amani ago nataireho kubikora, leba, byona bushai mara kusa amani, kandi omu nsi eky'okwitanira tikibamu.

¹² Kityo nyegarukana ndeba obumanyi, obutamanya n'obufera, kuba omuntu omusika w'omukama yakukoraki? Shana eby'omusikisawe yasigire akozire.

¹³ Ahanyuma mbona okwo obumanyi bukira obufera nk'okwo omushana gukira omwilima.

¹⁴ Omumanyi aina amaisho omu mutwegwe, kyonkai omufera agendera omu mwilima, n'orwo kili kityo nkabona bona okwo endekelero yabo eli emoi.

¹⁵ Nirwo natekeleize nti, ebigwera omufera nanye kwakwo bilingwera, kuba aho ntura mba mumanyi muno ntyo? Mbona okwo n'obu bushai.

¹⁶ Manyasi omumanyi n'omufera kumoi, taliho aliijukwa biro byona, kuba omu makiro agalija bona baliba bayebekire irai. Okwo omumanyi afa nikwo n'omufera afa.

¹⁷ Aho ntamwa oburora kuba ebilikukorwa omu nsi bikantama. Okuba byona ni bushai mara kusa amani.

¹⁸ Emilimo yange yona eyo nakozire omu nsi nkagitamwa orw'okuba nkabona okwo ndagiirwe kugisigira omusika wange.

¹⁹ Isi n'ohai alikumanya nka aliba mumanyi anga mufera? Kyonkai niwe aligeleera byona ebyo najweleire empiita omu nsi ninkoza obumanyi. Eki nakyo ni bushai.

²⁰ Kityo nkefuhya, nayechuza aha rw'emilimo yange yona eyo nakozire omu nsi,

²¹ okuba rundi omuntu akora n'obumanyi n'amagezi n'obubuya ogwo naija kusigaho byona bilibwe omuntu atabihendekeire. Eki nakyo ni bushai mara kibi muno.

²² Eby'omuntu akora byona akachwazikira omu nsi bimugasiraki?

²³ Okuba ebirobye byona bijwire obushasi, mara emilimoye mwaga, nangu n'ekiro omutwegwe tiguhumura. Eki nakyo ni bushai.

²⁴ Taliho kishemelera muntu kushaga okulya n'okunywa, n'okushemelerwa eby'akoleire. Eki nakyo okwo nakiboine omu bushobora bwa Ruhanga,

²⁵ enshonga k'atali wenene n'ohai ayakulya anga kugira ekyo yashemelerwa?

²⁶ Okuba omuntu ashemeleza Ruhanga amutunga obumanyi n'amagezi n'ebyera, kyonkai omufakare amuleka akumakuma ebintu abituma kwija kubiha amushemeleza. Eki nakyo ni busha mara kusa amani.