Mwegesa 11 - Ebibulia 2001

Eby'omumanyi akora

¹ Naga ekyakulya kyawe aha mugera, kuba n'orwo ebiro biliba byakeire bingi bingi olishuba okibone.

² Eky'oinakyo okibegane n'abantu mushanju anga munana, okuba tolikumanya naku ziligwera nsi.

³ Ebichwi kabiiragura, bigwa enjura. Omuti gulikagwera kasi anga bikara, mbali gwagwera niho gwikara.

⁴ Ayaikara alebire omuyaga tabiba, n'ayaikara ahangire ebichwi amaisho tagesha.

⁵ Nk'okwo otamanya muhanda gwa muyaga, anga nk'okwo oburora butaha omu mwana akyali omu nda ya nyina, nikwo na byona ebyo Ruhanga akora otakubishobokerwa.

⁶ Bwankya obibe embibo zawe, kandi bwaigoro otagwisa mukono, okuba tolikumanya n'ehai eraija, egi anga elinya, anga nka zirashemera.

⁷ Omushana guba gurungi, mara n'omuntu k'abona eizoba ashemelerwa.

⁸ Omuntu alikarora myaka nyingi etai, agishemelerwe yona. Kyonkai aijuke orwo aliba yafire emyaka egyo eliba nyingi kushagaho. Ebibaho byona bushai.

Omuhano aha basigazi

⁹ Iwe musigazi, shemelerwa orwo okyali musigazi, ogire ebyera omu busigazi. Kora okwo wayenda n'okwo wabona. Ebi byona obikore kyonkai omanye okwo Ruhanga alikuramura.

¹⁰ Otalikunda kintu kyona kyona kukujunaza anga kukushasa, kuba rwona obuto n'obusigazi byona bushai.