Mwegesa 10 - Ebibulia 2001

¹ Okwo enshwera efire enukisa amarasi, nikwo n'ekikorwa kike ky'obugoke kikiza obumanyi n'ekitinwa obusikizi.

² Omumanyi ayolekera obulyo, kyonkai omufera ayolekera obumosho.

³ Omufera n'orwo aba ali omu muhanda nagenda tagira magezi, mara agambira buli omoi okwo atagira magezi.

⁴ K'omutwazi alikunigalira, otaliruga aha mwanya gwawe, kuba n'orwo wakuba omufakaliire muno, kawakwikiliza ekyo yayenda yakukugarulira.

⁵ Haliho ekibi ekyo naboine omu nsi omu, nikishusha okutaza kw'omutwazi,

⁶ abafera bahabwa emyanya nyingi ey'ekitinwa ey'okushuntamaho, kandi abatungi bashuntama omu myanya ey'ahansi.

⁷ Ndaboine abairu bali aha farasi kandi abatwazi nibagenza amaguru nk'abairu.

⁸ Alima ekiina niwe alikigwamu, kandi alitema ebona ekika niwe alilibwa enjoka.

⁹ Atera amabare gamutera, kandi ayasa enkwi zimuhutaza.

¹⁰ Endyamiti k'ekuruba omuntu akabura kugihyora, aragirwa kukoza amani agashagireho, kyonkai obumanyi nibwo buhwera omuntu kukora omulimogwe gukagoshoka.

¹¹ Enjoka k'etema etakazingirwe, ow'okugizinga aba atakyetagwa.

¹² Eby'omumanyi agamba bimuletera obuganzi, kyonkai omufera aisibwa kanwake.

¹³ Abanza nagamba eby'obufera, kandi aha nzindo agamba kubi oti yararuka.

¹⁴ Omufera akanyisa ebigambo. Tabaho muntu amanya bilikwija kubaho, kandi taliho yakumugambira ebilibaho yafire.

¹⁵ Eby'omufera akora bimulemesa, aba atakimanya na muhanda gwa kumugarura mu kigo.

¹⁶ Wakagwamu iwe nsi elikutwarwa omukama akyali mwana, n'abatwazi bawe nibaimukira omu kunywa.

¹⁷ Oli muberwa iwe nsi, orwo omukama wawe alikutabuka omu ruganda rw'abakama, n'abatwazi nibanywera omw'ibanga elisaine, kubona amani rutali rwa tamiiro.

¹⁸ Obunafu bubandiza omu rushwi rw'enju, bugwisa enju enjura.

¹⁹ Ekyakulya kichumbwa k'abantu bashemelerwa, edivai eleta ebyera omu burora, kyonkai empiya zikora buli kantu.

²⁰ Otalikeena mukama nangu n'omu bitekelezo, n'omu kitabo kyawe otalikeena mutungi, ahakuba enyonyi yakugya egamba ebyo wagamba, ebibamanyisa.