Mwegesa 1 - Ebibulia 2001

Oburora tibugira mugasho

¹ Ebigambo by'Omwegesa, mutabani wa Daudi, omukama wa Yerusalemu.

² Byona ni bushai, bushai eya bushai, nikwo Omwegesa alikugamba.

³ Omuntu agasirwaki emilimo yona, ey'akora omu nsi!

⁴ Omuzarwa ogu guhwaho kandi ogundi gwija, kyonkai ensi eikaraho eirai lyona.

⁵ Eizoba lishabuka lishuba litobera, lyanguha ligiire mbali lishabukira.

⁶ Omuyaga gwihya nigugya kasi, gushuba guhindukira bikara, omuyaga gugenda niguzingoka, mara emigendere yagwo niyo migarukire yagwo.

⁷ Emiiga yona egelera omu nyanja, kyonkai enyanja teijura, omu mwanya mbali emiiga egelera, niyo eshuba ekagelera.

⁸ Ebintu byona bilemesa muno, omuntu talikushobora kukilenga, amaisho tigahwa ibona, n'amatwi tigahwa kuhulira.

⁹ Ekirabaireho nikyo kilibaho, mara ekirakozirwe nikyo kilikorwa, kandi omu nsi talimu kintu kihya.

¹⁰ Haliho ekintu ekyakugambwaho kiti, “Leba eki kihya?” Kirabaireho omu makiro agatwebembeire.

¹¹ Ebintu eby'eirai tibijukwa, mara n'ebintu ebilija ebitakabaireho tibilijukwa, omuli balinya abalija ahanyuma.

Ebyo Omwegesa yaboine

¹² Inye Omwegesa nkaba ndi mukama wa Isiraeli omuli Yerusalemu.

¹³ Nkataho amani kuhigisa obumanyi n'okuhenjuza byona ebikorwa omu nsi. Eli ikora ly'enaku elyo Ruhanga yahaire abantu kabakora.

¹⁴ Naboine byona ebikorwa omu nsi, leba byona ni bushai mara ni kusa amani.

¹⁵ Ekilemaire tikishobora kugororwa, kandi ekitaliho tikishobora kubarwa.

¹⁶ Nkatekeleza aha mutima nti. Ngizire obumanyi bungi kushaga bona abanyebembeire kutwara omuli Yerusalemu, omutima gwange gukagira obumanyi bungi n'amagezi gangi.

¹⁷ Nkataho amani kumanya obumanyi n'okumanya eiramu n'obufera. Nkabona oku okwo kuli kusa amani.

¹⁸ Okuba omu bumanyi bungi habamu enaku zingi, kandi omuntu ayeyongera omu magezi ayeyongera omu bushasi.