Mika 7 - Ebibulia 2001

Okujanguka kwa Isiraeli

¹ Lero nabonasi! Aha rw'okuba mpindukire alikuhiga ebiraba by'ekyanda orwo baba bamazire kubinoga, n'ezabibu orwo baba bamazire kuzikenguza, hakabura orugoobe n'orumoi rw'okulya, nangu n'ekiraba n'ekimoi ky'omutini eky'omuzigaijo nkakilya nkaikya!

² Abalikutina Ruhanga omu nsi bahoiremu, n'omu bantu omurungi talimu. Bona nibazimbira abantu kubaita, buli omoi natega omurumuna omutego gw'ekitimba.

³ Nibaramiliza kukora kubi, mara nibakora kubi n'obwegendeleza. Omutwazi n'omuramuzi nibenda rushwa, n'omuntu omuhango nagamba akature ekibi ekimuli aha mutima eky'alikwenda. Nikwo balikuhangana batyo ebitekelezo.

⁴ Omurungi omuli bonene ni nk'orukwatango. Alikubakira oburungi nabashusira orugo rw'amahwa. Ekiro kilija orwo Ruhanga alibonabonyia abantu aba, nk'okwo yabatatiire karai omu kanwa k'abarangi. Mbwenu baliho nibabumbulikwa.

⁵ Otaikiliza mutahi, n'ali munywanyi wawe otamwesiga. Oyelinde akanwa kawe, nangu na mukazi wawe otamwatulira kigambo.

⁶ Aha rw'okuba omwana nakunukuruza ishe, kandi omwana muhara ayemire kubi nyina. Omukamwana ayemire kubi nyinazara, kandi omuntu omu kaye abalibe nibo babishabe.

⁷ Kyonkai inye amaisho ngahangire Omukama; Ruhanga andokora niwe ntegeleize, Ruhanga wange alimpulira.

Omukama narokora abantube

⁸ Mubisha wange otankoleza; okugwa ngwire kyonkai ndiimuka. Mbwenu aha ndi omu mwilima, nawe Ruhanga alinyakiza.

⁹ Nfakaliire Omukama, k'abanze ambonabonyie, ahanyuma alinyihya omu mwilima alindokora.

¹⁰ Byonene ebi omubisha wange alibibona, enshoni zimukwate ayagizire ati, “Omukama Ruhanga wawe ali nkahai?” Ndimuleba mukoleze, mara balimujungilira nk'eshabo omu mbarabara.

¹¹ Inywe bantu ba Yerusalemu, amakiro galija orwo mulyombeka eboma, n'ensi yanyu elihanguha.

¹² AbaIsiraeli banyu balibagarukira, kwema Asiria kuturuka Misiri; kubandiza Misiri kugoba aha Mwiga gwa Efurati; Kwihya aha nyanja kuteka nyanja eli, kwiha aha ibanga eli kuteka aha ibanga lili.

¹³ Kyonkai ensi eliba ndaara, ezire amafu g'abanyansi bayo.

Omukama nagilira Isiraeli embabazi

¹⁴ Waitu Mukama, kwata enkoni yawe oshumbe abantu bawe, obuhyo bwawe bw'entaama obwo wayeronkeire. N'orwo batwire bonkai omu kibira, ensi y'eitongo ebazingoire. Obataishure bagye balye omu malisizo ga Bashani na Gileadi nk'orwa karai.

¹⁵ Waitu Mukama, otukolere eby'okutangaza nk'ebyo watukoleire notwihya Misiri.

¹⁶ Amahanga gabibone, amani gabahwe bashonare. Bate engaro aha minwa, amatwi gabaigare.

¹⁷ Balye eitaka nk'enjoka, bashushe ebyekurura. Baliruga omu boma zabo nibajugumba, bagaruke aha Mukama Ruhanga waitu nibatina; bakutine.

¹⁸ Ni ruhangaki alikukushusha? Abantu bawe endonkwa abasigaire nobagarulira amafu gabo. Toikara onigaliire kimoi, shana oshemelerwa kutwoleka engonzi zawe ez'ebiro byona.

¹⁹ Shuba otugilire embabazi, entambara zaitu ozijungilire ozinage omu nyanja okuzimu.

²⁰ Yoleka baijukuru ba yakobo okw'oba mwesigwa, yoleka baijukuru ba Aburahamu ekisha kyawe, nk'okwo waraganisize batatenkurw'ichwe makiro aga karai.