Mika 6 - Ebibulia 2001

Omukama nakwata Isiraeli omushango

¹ Muhulire okw'Omukama alikugamba: Mwimuke mwetonganire aha mabanga, n'enshozi zihulire ebyo mulikugamba!

² Inywe mabanga nainywe misingi y'ensi eya karai, muhulire Omukama natoija. Omukama natoijera abantube, akwatangaine na Isiraeli.

³ Omukama nagamba ati, “Inywe bantu bange mbakoleireki? Mbashasizeki? Mumporore!

⁴ Nkabaihya Misiri, nabachungura omu bwiru. Nkabaha ab'okubebembera abalimu Musa, Aroni na Miriamu.

⁵ Inywe bantu bange, mwijuke ekyo Balaki omukama wa Moabu yabaire ayenzire kubakora, n'okwo Balaamu eya Beori yamuhoroire. Mutebwa ebyabaireho kuruga Shitimu kugoba Giligali, mumanye eby'Omukama yakozire kubarokora.”

Eby'Omukama alikwenda

⁶ “Omukama Ruhanga w'omw'iguru kandagya kumufukamira mugendere naki? Mugendere n'enyana z'omwaka gumoi?

⁷ Omukama aije asiime enyana z'entaama enkumi, n'emigera enkumi n'enkumi y'amajuta? Mponge omwana wange w'omuzigaijo kwatilira entambara zange, amafu gange ago dankozire?”

⁸ Chei, iwe muntu, ebili birungi Omukama yabikwolekire. Nakwenzaki shana okukora eby'amazima, kugira obufura, n'okuguma ahali Ruhanga wawe oli mwetohya!

⁹ Ky'obumanyi nyakabara kutina Omukama. Leba nagambira ekigo nti, “Muhulire inywe bantu abateraniire omu kigo.

¹⁰ Amaju g'ababi gaijwire ebintu ebyo baboine omu kwaka banu. Nibakoza ebipimo ebitagobire, ekyo kintu ekyo ndikutamwa kubi.

¹¹ Nganyire ntai ab'eminzani n'amabare ebitagobire?

¹² Abatungi omuli inywe baijwire obukatili, abanyansi nibagamba ebishuba, baina endimi z'obulyalya.

¹³ Nikyo mbandize kubatera, mbaite mbature amafu ganyu.

¹⁴ Mulye kyonkai timwigute; nangu nti enjara erabaruma. Mugire ebyo mwabiikaho kyonkai timukize kantu, n'ebyo murabiikaho ndabisa embanda.

¹⁵ Mubibe kyonkai timuligesha. Mulijunga ezeituni kyonkai amajuta timuligesiiga. Mulijunga ezabibu kyonkai edivai timuliginywa.

¹⁶ Ebi biliba bityo orwo mukwete emize y'Omukama Omuri n'omutabani, Omukama Akabu. Muzigilire emigilire yabo, nikwo ndibarandura amahanga gakabashekelera, abantu babatelere emituliza babolekangane.”