Mika 5 - Ebibulia 2001

¹ Iwe Yerusalemu kigo ky'eihe, tekateka abaisherukare bawe, tubunzirwe! Nibateza omutwazi wa Isiraeli enkoni aha matama.

Ruhanga naraga omutwazi kuruga Betelehemu

² Iwe Betelehemu eya Efurati, omu nganda za Yuda oba muke. Kyonkai olirugwamu alimbera mutwazi wa Isiraeli, abaho kwema amakiro gona, akarai aka karai.

³ Aha rw'ekyo Isiraeli eliikara enagirainwe kuhika orwo omukazi alirumwa akazara omwana, aho barumuna omwana ogwo baliruga omu buzahe bahikane omu babo AbaIsiraeli.

⁴ Omukama alimuha amani agume alise obuhyobwe bw'entaama, aligira ekitinwa nk'eky'Omukama Ruhangawe. Abantube baligira emilembe, kuba aliba muhango w'ensi zona,

⁵ mara alileta emilembe. Orwo Abaasiria balitabalira ensi yaitu bakataha n'omu boma zaitu, tulisindika abebembezi baitu ab'amaani muno babatere.

Ekibonabonyio n'okurokoka

⁶ Asiria na Nimurodi balizitwaza embanda, bashube batwihye omu mikono y'Abaasiria orwo balitabalira ensi yaitu kugijungilira.

⁷ Baijukuru ba Yakobo abaliba basigaireho, omu mahanga gangi balishusha orume orw'Omukama atweka kuholereza ensi, baliba nk'enjura egwa aha bunyasi. Orume orwo n'enjura egyo Omukama niwe alibigwisa, ti bantu.

⁸ Baijukuru ba Yakobo abaliba basigaireho, omu mahanga agali gangi balishusha entare omu nyamaishwa, baliba nk'ekyana ky'entare omu buhyo bw'entaama ekizirabamu nikizilibatilira, kikazitagatagura, ow'okuzijuna akabura.

⁹ Isiraeli elisinga ababisha bayo ebaite bona.

¹⁰ Omukama nagamba ati, “Bir'ebyo efarasi zanyu ndizitwara, amagali ganyu g'endashana ngaite.

¹¹ Ebigo omu nsi yanyu ndibiita, n'eboma zanyu nzikambure.

¹² Engisha zanyu ndiziita, kandi timulisigara na mbandwa n'emoi.

¹³ Ebihuku byanyu n'enyomyo ndibyata, timulishuba kufukamira bikorano.

¹⁴ Ebishushani bya Ashera ndibichwa omu nsi yanyu, n'ebigo byanyu mbirandure.

¹⁵ Kandi amahanga agatampulira ndigatamwa, nganigalire ngehoroze.”