Mika 4 - Ebibulia 2001

Obukama bw'emilembe obw'ensi yona

¹ Biro ebilija eibanga lya Rwensinga y'Omukama lilikira amabanga agandi aha mutwe, liliraihya lishage enshozi, kandi amahanga galija gangi aha ibanga elyo.

² Amahanga gangi galija gagambe gati, “Mwije tugye aha ibanga ly'Omukama, tugye Rwensinga ya Ruhanga wa Yakobo, atwegese eby'ayenda tube nibyo tukora.” Amateka galiruga Sioni, kandi Omukama wenene alitugambira ekigambo ayemire Yerusalemu.

³ Aliramura emishango y'amahanga, nangu n'ey'amahanga ag'amani agali harai. Embanda zabo baliziheshamu enfuka, amachumu baligaheshamu empabyo. Taliho ihanga lilikwatira lindi mbanda, kandi tibalyetekatekera ndashana rundi.

⁴ Buli muntu alishuntama aha muzabibugwe n'aha mutinigwe, kandi taliho alibatinisa. Eki kyaruga omu kanwa k'Omukama w'amahe.

⁵ Buli ihanga lifukamire ruhanga walyo, kyonkai ichwe tuliguma nitufukamira Omukama Ruhanga waitu amakiro gona.

AbaIsiraeli baliruga omu buzahe

⁶ Omukama nagamba ati: Omu makiro galinya ndihikanisa abalema, n'abo batatamiize, n'abo bahaire ekibonabonyio.

⁷ Abali balema ndibasigamu, n'abo batatamiize ndibahindura ihanga ly'amani. Kwema aho n'eirai lyona Omukama alibatwara ayemire aha Ibanga lya Sioni.

⁸ Kandi iwe munara gw'obuhyo bw'entaama, rushozi rw'abantu ba Sioni, oligarukirwa obukama obwa karai, engoma y'abantu ba Yerusalemu elikugarukira.

⁹ Mbwenu ekilikukuborogya kiki? Toina mukama? Omutegeki wawe afire? Kiki obushasi kukwatwa obw'omukazi alikurumwa?

¹⁰ Inywe bantu ba Sioni mwenyuke mutage nk'omukazi alikurumwa. Mbwenu aha ekigo mwaija kukirugamu mukatura aheru. Ahanyuma muligya Babiloni. Kulinya niyo mulirokokera, niyo Omukama alibachungulira omu mikono y'ababisha banyu.

¹¹ Mbwenu aha amahanga gangi gateraine kukutera, nigagira gati, “Sioni tugihagaze, tugishamalire.”

¹² Kyonkai ebitekelezo by'Omukama tibalikubimanya. Tibalikumanya ntegekaye okwo yagateraine hamoi nk'ebiba by'engano aha rwano.

¹³ Imuka mutere engano egyo inywe bantu ba Sioni, kuba ndibahindukira ihembe ly'ekyoma, mbahindure binono by'omulinga. Mulichwagachwagura amahanga gangi, amagoba ago muligaihyaho mugahongere Omukama, eitunga lyago muliheleze Omukama w'ensi yona.