Mika 3 - Ebibulia 2001

Mika nayanga abakuru ba Isiraeli

¹ Ahanyuma nkabagambira nti, Hulira inywe bakuru ba baijukuru ba Yakobo, nainywe batwazi b'eihanga lya Isiraeli mutege amatwi! Nimuragirwa kumanya okukoza amazima.

² Mutamwa ebirungi, mugonza ebibi; abantu bange mubaihyaho orushushu, mubagugumbura enyama aha magufa.

³ Abantu bange mubalya, orwo mumara kubashushuburaho orushushu, mukabachwagachwagura amagufa, mukabatematema nk'enyama ezo balikwija kuta omu nyungu, mubahindura nyama omu nyungu y'entango.

⁴ Ebiro bilija orwo mulitakira Omukama, kyonkai talibahorora. Alibesheleka, mukozire kubi.

⁵ Nikwo Omukama alikugamba aha barangi abalikuhabisa abantube nibagamba bati, “Milembe,” orwo baina eby'okulya, kyonkai ayaburwa eky'okubaha kulya bamurwanisa.

⁶ Inywe barangi inywe, eizoba lilibagwaho, na nyemishana elibahindukira mwilima. Omu kiro timulibonekerwa, kandi tililitobera mukaragura.

⁷ Ababonekerwa baligoka, n'abafumu enshoni zilibaita. Bona balita engaro aha munwa bashoberwe, kuba Ruhanga talibaha mpororo.

⁸ Kyonkai inye orwo nyina Mwoyo wa Mukama, nyijwire amani g'okukora eby'amazima, n'okushobora kugambira baijukuru ba Yakobo entambara zabo, AbaIsiraeli aba kubagambira amafu gabo.

⁹ Inywe bakuru ba baijukuru ba Yakobo, muhulire ekigambo eki, inywe nywenene batwazi b'eihanga lya Isiraeli abatamwa amazima mukagaita gona.

¹⁰ Ebyo mwombekesa Sioni mubibona omu kwita abantu; ebyo mwombekesa Yerusalemu mubihya omu kukora kubi.

¹¹ Abatwazi bayo nibaramura emishango baliire rushwa. Abakuhani bamwo tibakwegesa batashashwirwe. Abarangi bayo baragura kuhiga empiha, bashuba besigayo Omukama bati, “Taliho kabi karatugwera, kuba Omukama asingiire omuli ichwe.”

¹² Nikyo Sioni baligilimira nk'endimiro nezira inywe. Yerusalemu eliba ntuumo y'amatongo aha rw'enshonga yanyu. Kandi eibanga lya Rwensinga y'Omukama lilihinduka kibira lizire inywe.