Mika 1 - Ebibulia 2001

¹ Omu makiro ga Yotamu, Ahazi na Hezekia abakama ba Yuda, Omukama akagambira Mika ow'ekigo kya Moresheti ekigambo ahali Samaria na Yerusalemu.

Samaria na Yerusalemu nibichulirwa

² Inywe mahanga inywena muhulire ekigambo eki, nainywe abakatura omu nsi mukihulire. Omukama Ruhanga abakwate omushango, Omukama ayemire Rwensingaye entakatifu.

³ Leba Omukama yaruga mbali asingiire, asongoke arabe aha mitwe y'amabanga.

⁴ Amabanga agalibate gagilire, n'empanga zigangabuke, okw'obona enta aha muliro, nk'amaizi nigashesheka aha bulengo.

⁵ Ebyo byona nshonga y'entambara za Yakobo, nshonga y'amafu g'eihanga lya Isiraeli. Omushango gukwat'ohai aha rw'entambara za Yakobo? Ti Samaria? Isi omushango gukwat'ohai aha rw'amafu ga Yuda? Ti Yerusalemu?

⁶ Aha rw'ekyo Samaria ndigihindura ntuumo y'amatongo omw'ishwa, ngihindure bulimo bw'emizabibu. Amabare gayo ngasheshe omu ruhanga, n'emisingi y'amaju gamwo ngishurure.

⁷ Ebishushani byamwo mbihondagure, ebyo bahonga abamalaya ba rwensinga yamwo mbiteho omuliro, n'ebihuku byayo mbitaite. Ebintu ebi Samaria akabihya omu byo bahongeire abamalaya, biligarukayo bihongwe abamalaya bonene.

⁸ Ekyo nikyo kilinchuza nkatongya, nkagenda ndi bushai ntajwete. Nditongya nimboigora nk'emiha, nchure nk'embuni.

⁹ Obuhuta bwayo tibwakutambwa; Yuda nayo ekwetwe obuhuta obwo, bukwete na Yerusalemu ekigo ky'abantu bange.

Omubisha nagoba Yerusalemu

¹⁰ Mutakugambira babisha baitu ba Gati okwo tuteirwe; mutaziza kulira. Inywe aba Betileafura mwezilinge omw'itaka.

¹¹ Inywe banyansi ba Shafiri, mugye omu buzahe mutajwete mara mushonaire. Inywe banyansi ba Zaanani mutaturuka. Orwo mulihulira aba Betheli nibachura mulimanya okwo obuhungiro butaliho.

¹² Aba Maroti emitima ebemeleire bategeleize obujuni, kuba Omukama ateize Yerusalemu akabuta.

¹³ Inywe banyansi ba Lakishi mukome amagali aha farasi, n'inywe mwabandize kufakaza Sioni, kuba mukarondora emize ya Isiraeli.

¹⁴ Aha rw'ekyo oliragiza Moreshetigati, kandi abakama ba Isiraeli balibona obujuni kuruga omu kigo kya Akizibu.

¹⁵ Inywe banyansi ba Maresha ndibanaga omu mikono y'ababisha, kandi abatwazi b'ekitinwa ba Isiraeli baligenda kwesheleka omu mpako ya Adulamu.

¹⁶ Aba Yuda mumoise emitwe yanyu muchulire abana banyu abagonzibwa. Mwekunyumure emitwe eshushe ey'enkwaju, kuba abana banyu balibabaihyaho babatware omu buzahe.