Mariko 6 - Ebibulia 2001

Aba Nazareti nibanga Yesu

¹ Yesu aruga mbali yabaire ali, agaruka owabo. Abegesibwabe bamuhondera.

² Ahali Sabato ayegesa omu sinagogi. Bangi abamuhuliire bashoberwa, bebaza bati, “Omuntu ogu ebi byona akabiyaha? Akahabwa bumanyiki obu? Eby'alikukora by'amani bitai?

³ Ti museremara ogu? Aba mutabani wa Maria, ni murumuna Yakobo, na Yose, na Yuda, na Simoni, na banyanya tutura nabo munu.” Bamwanga.

⁴ Yesu abagambira ati, “Omurangi takaburwaga kitinwa, shana owabo n'omu banyarugandabe n'omwabo mwonene.”

⁵ Tiyakozireyo ky'amani, shana akatekaho abarwaire bake emikono mara yabakiza.

⁶ Okutesiga kwabo kukamushobeza. Yesu agya omu byaro ebindi ayegesa.

Yesu natuma abegesibwa ikumi na babili

⁷ Ayeta eikumi na babili, abatuma babili babili, abaha n'obushobora bw'okubinga Amasitani.

⁸ Abagambira kutatwara kantu kona kona omu rugendo shana enkoni. Omukate n'enshaho n'amahera omu mifuko ebyo chei.

⁹ Abajubura kujwara enkaito, kyonkai okujwara ekanzu ibili ayanga.

¹⁰ Abagambira ati, “Mbali muragyaga, enju eyo mulitahamu mwikare omwo kulemwa kugoba orwo mulirugayo.

¹¹ Hona hona mbali balibanga, bakanga n'okubahulira, kamulija kurugayo mukunkumure echuuchu aha maguru ganyu, balimanyir'aho.”

¹² Kityo bagenda barangira abantu babone kwechuza amafu gabo.

¹³ Babinga Amasitani gangi, basiiga abarwaire bangi amajuta babakiza.

Okufa kwa Yohana Omubatiza

¹⁴ Omukama Herode abihulira, aha rw'okuba eibara lya Yesu likaba niliranganwa. Abantu abandi bakaba nibagamba bati, “Yohana Omubatiza ahimbukire omu bafu, niyo nshonga aina obushobora buti.”

¹⁵ Kyonkai abandi bati, “Ni Eliya.” Abandi bati, “Murangi nk'abarangi aba karai.”

¹⁶ Herode orwo yabihuliire ati, “Yohana owo natemireho omutwe ahimbukire.”

¹⁷ Herode akaba atumire ab'okukwata Yohana, bamuboha bamufunga nibamutura Herodia, muka Filipo murumuna Herode, aha rw'enshonga Herode akaba amushweire.

¹⁸ Yohana akaba agambiire Herode ati, “Nikizira ahali iwe kushwera muramu wawe.”

¹⁹ Nikwo Herodia kumukwatirwa enzigu, akagonza kumwita, kyonkai tiyashoboire,

²⁰ kuba Herode yatinaga Yohana aha rw'okumumanya okwo ali mugorogoki mara mutakatifu, kityo yaba namulinda. Kayamazire kumuhulira yaikara nahwahwana muno omwoyo, kandi okwo yamuhuliilizaga n'amashemelerwa.

²¹ Bwija bushangwa buli bushango Herode nashemeza ekirokye ky'okuzarwa, akoleire abaramatabe n'abanyiginyabe n'abatwazi ba Galilaya obugenyi.

²² Muhara wa Herodia aija amuzinira amushemeleza hamoi n'abagenyibe. Omukama agambira omwisiki ati, “Ongambire kyona kyona eky'olikwenda, ndakikuha.”

²³ Amwenahilira ati, “Eky'oranyenza kyona kyona ninkikuha, nangu n'enusu y'engoma yange.”

²⁴ Omwisiki aturuka abaza nyina ati, “Nshabeki?” Nyina ati, “Omutwe gwa Yohana Omubatiza.”

²⁵ Achwanisa agaruka owa Herode bwangu bwangu, amushaba ati, “Ningonza mbwenu aha ompe omutwe gwa Yohana Omubatiza aha sinia.”

²⁶ Omukama ajunara ebishobeize. Kyonkai aha rw'ebyo yabaire anahiire n'enshoni z'abagenyibe, takunda kuchwa kigambo ekyo yabaire agambiire omwisiki ogwo.

²⁷ Arahuka atuma omwisherukare omulinzi, kuleta omutwe gwa Yohana. Omwisherukare agenda jela atema Yohana omutwe,

²⁸ aguleta aha sinia aguheleza omwisiki. Omwisiki agutwalira nyina.

²⁹ Abegesibwa ba Yohana babihulira, baija batwara omubiligwe baguziika omu nyanga.

Yesu nalisa abantu enkumi itaanu

³⁰ Entumwa zigaruka owa Yesu zimubaruulira ebyo zakozire byona n'ebyo zayegesize.

³¹ Azigambira ati, “Mwije nywenkai mbali abantu batali, mwikyeho kake.” Nobona abaijaga aba nibagenda bakaba bali bangi, n'akanya k'okulya tibakukaboine.

³² Bagenda bonkai omu bwato bagya mbali omwaga gutali.

³³ Abantu bangi bababona nibagenda mara babekomya, baruga omu bigo byona bairukire, batwarwa ogw'amaguru babagoberayo mbere.

³⁴ Yesu aruga omu bwato agya aha mwaro abona embaga y'amani, abaganyibwa aha enshonga bakaba bali nk'entaama ezitaina mushumba. Abanza kubegesa bingi.

³⁵ Eizoba kalyalengire abegesibwabe bamugoba bamugambira bati, “Aha mbali tuli karungu, mara n'eizoba lyalenga.

³⁶ Obataishure bagye omu byaro ebili hagufi bagure akakulya.”

³⁷ Wenene abahorora ati, “Inywe mube n'inywe mubaha ak'okulya.” Bamubaza bati, “Ichwe tugende tugure omukate gw'edinari 200, tube nigwo tubaha kulya?”

³⁸ Ababaza ati, “Mwina emikate engahai?” Bagya kuleba bamugambira bati, “Etanu n'enfuru ibili.”

³⁹ Aragira embaga yona kushuntama aha bunyasi omu bichweka.

⁴⁰ Bashuntama omu bichweka, 100 omu 100, 50 omu 50.

⁴¹ Yesu akwata emikate egyo etanu n'enfuru ibili, araramira eiguru, asiima, abegabegura emikate egyo, agiha abegesibwa kabagabira abantu. N'enfuru zombili azibagabira zona.

⁴² Bona balya baiguta.

⁴³ Bashombokya entukuru 12 z'obubeguka by'emikate n'enfuru.

⁴⁴ Abaliire omukate ogwo bakaba bali bantu 5,000.

Yesu natambuka aha maizi

⁴⁵ Yesu ayanguha agambira abegesibwabe kusabara omu bwato bakamwebembera buseli, Betisaida, oku nataishura embaga kutaha.

⁴⁶ Kayabaire yarugangaineho nabo atemba omw'ibanga kushoma enshara.

⁴⁷ Eizoba kutobera obwato bushangwa buli omu nyanja, kandi wenene ali wenkai aha mwaro.

⁴⁸ Abona okwo balikubuga nibyanga. Omuyaga gukaba nigwija gubataahiremu n'amani. Omu kichweka ky'okwema esaa mwenda kwija kukeisa obwire nimwo Yesu yabagobeireho, natambuka aha maizi omu nyanja. Akaba agendeleire kubahingura,

⁴⁹ kyonkai kabamuboine natambuka aha maizi bamulenga kuba muzimu, bakunga;

⁵⁰ nobona bona bakamubona batina. Ayanguha abagambira ati, “Mugume, n'inye; mutatina.”

⁵¹ Ataha omu bwato abashanga, n'omuyaga guchulera. Batangara muno munonga,

⁵² kuba ekyakozirwe aha mikate bakaba batakishobokeirwe aha rw'emitima yabo kugumangana.

Yesu nakiza omurwaire Genezareti

⁵³ Orwo bamazire kushaabuka bagoba Genezareti, basiiga bagoromora obwato.

⁵⁴ Kabamazire kuruga omu bwato, abantu banguha bamanya Yesu.

⁵⁵ Bagenda nibairuka omu byaro ebili haihi, babanza kuleta abarwaire aha machera, nibabamushangisa hona hona mbali bamuhulizaga.

⁵⁶ Orwo yakaijaga omu byaro n'omu bigo, baleta abarwaire nibababyamika omu katare, bamutagiliza buzima kukwata aha mukugiro gw'ekijwarokye kushai. Bona abakwatagaho bakiraga.