Mariko 16 - Ebibulia 2001Okuhimbuka kwa Yesu ( Mat 28:1-8 ; Luk 24:1-12 ; Yoh 20:1-10 ) 1 Bukeire bwa Sabato, Maria Magadalena, na Maria nyina Yakobo, na Salome, bagura emibazi y'omugaju kugenda kugisiiga Yesu. 2 Aha kiro kya mbere ky'Eilimansi eizoba kalyashabukire bagya aha nyanga. 3 Bagenda nibabazangana bati, “Aratuhilingisiza eibare kulihya aha nyanga n'ohai?” 4 Kugya kunaga amaisho babona okwo eibare lyahilingisire, likaba lili lihango muno. 5 Kabatahire omu nyanga babona omusigazi ashuntamire rubaju orwa bulyo, ajwete ekanzu elikwera. Batangara. 6 Abagambira ati, “Mutatangara. Manya nimuhiga Yesu owa Nazareti, owo babambire. Tali hanu, yahimbukire, mulebe na mbali babaire bamubyamikire. 7 Mugende mugambire abegesibwabe na Petero okwo Yesu yabebembera Galilaya, niyo muramubonera, nk'okwo yabagambiire.” 8 Baruga omu nyanga bairukire. Bakatangara muno bagwa omu rujugumbo. Tibaina kyo bafumoire, nobona bakaba baina obutini bungi. [ Yesu nahabukira Maria Magadalena ( Mat 28:9-10 ; Yoh 20:11-18 ) 9 Ekiro kya mbere bwankya karai orwo Yesu yahimbuka, akabanza yahabukira Maria Magadalena, owo yabaire abingiremu Amasitani mushanju. 10 Magadalena agenda agambira abegesibwa ba Yesu, bali omu kuchura nibalira. 11 Kyonkai kabahuliire okwo Yesu alikurora n'okwo Magadalena yamubona, banga kwikiliza. Yesu nahabukira abegesibwa babili ( Luk 24:13-35 ) 12 Ahanyuma Yesu abonekera abegesibwa abandi babili omu mishusire endijo, bakaba nibataha omu kyaro. 13 Bagaruka bagambira abandi abasiigaire, kyonkai tibabaikiliize. Yesu nahabukira eikumi n'omoi ( Mat 28:16-20 ; Luk 24:36-49 ; Yoh 20:19-23 ; By' 1:6-8 ) 14 Obugenda bw'eirai Yesu ahabukira eikumi n'omoi, bakaba nibalya. Abakunganisa aha rw'okutaikiliza kwabo n'obugumangani bwabo bw'emitima, enshonga abamuboine ahimbukire tibabaikiliize. 15 Abagambira ati, “Mugende omu nsi zona, murangire abantu bona evangeli. 16 Aliikiliza akabatizibwa alirokoka. Kyonkai aliba ataikiliize ogwo aliramurwa. 17 Abalinyesiga balimanyikira aha bubonero obu: Balibinga Amasitani omw'ibara lyange, baligamba endimi ezihya, 18 balikwata enjoka. N'orwo balinywa eky'okubaita tikilibakoraho kantu. Balitekaho abarwaire emikono bakire.” Yesu natemba omw'iguru ( Luk 24:50-53 ; By' 1:9-11 ) 19 Aho Omukama Yesu kayamazire kubafumolera atyo, atemba omw'iguru, asingira aha bulyo bwa Ruhanga. 20 Abegesibwa baimukya bagenda, baranga evangeli buli hantu. Omukama akaba nabemamu, n'ebyo bagambaga yabihamisaga n'obubonero obwo kubijulira.] |
Ruhaya DC Bible © Bible Society of Tanzania, 2001.
Bible Society of Tanzania