Malaki 2 - Ebibulia 2001

¹ Omukama w'amahe nagamba ati, “Inywe bakuhani nimbaha omuhango ogu.

² Kamutahuliire mukaguta aha mutima mukampa kitinwa, nimbataho omuraamo, n'ebyo mwinabyo mbiraame. Omu mazima nabiraamire, enshonga ebyo ndikubaragira timulikubiteka aha mutima.

³ Ndibonabonyia abaana banyu, nainywe mbasiige obushai omu maisho, obushai bw'ebitunganwa ebyo mulikumpongera, nshube mbabinge mulekere kunkolera.

⁴ Nirwo mulimanya okwo mbahairekwo omuhango ogu, endagano yange n'abakuhani baijukuru ba Levi etalichweka.”

⁵ “Omu ndagano yange na baijukuru ba Levi nkabaraganisa oburora n'emilembe, mara nkabibahakwo kabantina, bashuba bantinakwo, bampa ekitinwa.

⁶ Bakaba begesa ebilikwo mara tibagambaga kubi. Tukatura hamoi kurungi bashuba baba bulebero aha bandi nabo balekera kukora entambara.

⁷ Buba buragirwa bw'omukuhani kwegesa eby'amazima ahali Ruhanga, n'abantu nibaragirwa kubekwata bakabegesa, enshonga abakuhani baba ntumwa zange inye Omukama w'amahe.”

⁸ “Kyonkai inywe bakuhani mulekeire kukora kurungi. N'abantu mubegesize ebitalibyo mwabasitaza; mwachwa endagano eyo nakozire na Levi.

⁹ Mbwenu kambagahise mbashonaze omu bantu bona orwo mutalikukora byondikubaragira, kandi n'ebikwete aha Mateka nimugira ekigonzi omu bantu.”

Obutesigwa bw'abantu ahali Ruhanga

¹⁰ Ichwena tuli b'eish'emoi. Ruhanga omoi niwe yatutonzire. Mbwenu aho kubaki mutalikukolerangana mazima, n'endagano eyo Ruhanga yakozire na batatenkurw'ichwe titulikugikunira.

¹¹ Abantu ba Yuda bagokeire Ruhanga bakora eihano omuli Yerusalemu na Isiraeli yona. Rwensinga y'Omukama ey'agonza bagihagaize, abashaija bashwera abanyamahangakazi abafukamira baruhanga ab'aheru.

¹² Abalikukora batyo Omukama asinge abachwe omw'ihanga lya Isiraeli, mara atalibajubura kumuletera bihongo eby'eihanga lyaitu limuletera.

¹³ Kandi nimushuba nimukora n'eki: Alutare y'Omukama mwagijobesa amalira, nimuchura nimutaga kuba takikunda bihongo byanyu na mashemelerwa; takibitora.

¹⁴ Nimubaza muti, “Kubaki atalikubitora?” Talikubitora kuba namanya okwo iwe Isiraeli ogokeire mukazi wawe owo wayebohoire. Atura aba mukazi wawe, wamugokera, n'orwo waragaine omu maisho ga Ruhanga omukazi ogwo kumugilira obwesigwa.

¹⁵ Ruhanga omumoi tiyakujwangainyie na mukazi ogwo mukaba rugingo rumoi, mutima gumoi? Akagendeleraki kugir'atyo? Akagonza kamuzara abana abalibakwo bantube. Kityo muramanya, omuntu atagokera mukaziwe owo yayebohoire.

¹⁶ Omukama Ruhanga wa Isiraeli nagamba ati, “Okutanukana kw'abali omu bushwere ninkutamwa kubi. Omuntu kukolera ati mukaziwe obukatili, ekigiro ekyo tindikukyenda n'akati. Kityo mwelinde mutagoka.”

Ekiro ky'eiramu kili haihi

¹⁷ Omukama mumugambire mwamulemesa. Nimushuba nimugira muti, “Twamulemesa tutai?” Nimumulemesa orwo mulikugamba muti, “Buli omoi alikukora kubi murungi aha Mukama, namushemelerwa.” Nimumulemesa orundi orwo mulikubaza muti, “Ruhanga ow'amazima ali nkahai?”