Luka 22 - Ebibulia 2001

Enaama y'okwita Yesu

¹ Ekiro kikuru ky'Omukate Ogutatumbisiibwe, ekyetwa Pasika kikaba kiraliire kugoba.

² Aho abakuhani bakuru n'abeegesa b'Amateka bashangwa nibahiga okwo baraita Yesu. Kyonkai bakaba nibatina abantu.

Yuda naikiliza kwita Yesu

³ Aho Sitani abanda Yuda Isikariote ayabaire ali omoiho omw'ikumi na babili.

⁴ Akwata omuhanda agenda afumora n'abakuhani bakuru n'abakuru b'abalinzi ba Rwensinga okwo arashobora kumubakwasa.

⁵ Bashemelerwa mara bagamba kumuha empiha.

⁶ Kityo Yuda aikiliza mara ahiiga obushango bw'okumubakwasa embaga etaliho.

Yesu natekateka kulya Pasika

⁷ Omu biro bikuru by'Omukate Ogutatumbisiibwe nimwo baitiraga akataama k'okulya ahali Pasika.

⁸ Aho Yesu atuma Petero na Yohana nabaragira ati, “Mugende mututekatekere Pasika twije tugilye.”

⁹ Bamubaza bati, “Nogonza tugitekateke nkahai?”

¹⁰ Abahorora ati, “Orwo murataha omu kigo muratanganwa omuntu ayetwekire emuga y'amaizi. Mumuhondere. Enju ey'aratahamu mube nimwo mutaha.

¹¹ Mugambire mukama w'enju muti, ‘Omwegesa nakuubaza ekiyumba ky'abagenyi mbali aralira Pasika hamoi n'abegesibwabe.’

¹² Araboleka ekiyumba kihango omu gorofa kyatekatekirwe, omwo mube nimwo mushemeza.”

¹³ Bagenda babishanga okwo yabibagambira. Batekateka Pasika.

Omukama nalya Pasika

¹⁴ Orwo esaa yagobire, Yesu ashuntama n'abegesibwabe kuragira.

¹⁵ Abagambira ati, “Mbaire nayegombire kulya Pasika hamoi nainywe ntakashasire.

¹⁶ Mbagambirege, tindishuba kugilya rundi kuhika orwo elimanyika enshonga yayo omu Bukama bwa Ruhanga.”

¹⁷ Akwata ekikompe. Kayamazire kusiima agamba ati, “Mutore ekikompe eki munyweho inywena.

¹⁸ Kambagambire: Tinkishuba kunywa divai kulemwa kugoba orwo Obukama bwa Ruhanga buligobelera.”

¹⁹ Akwata n'omukate. Kayamazire kusiima, agubegura, agubaha nagamba ati, “Ogu mubili gwange ogulikwija kutambilirwa inywe. [Mukorega mutyo okunyijukiraho.”

²⁰ Kabamazire kuragira akwata ekikompe nagamba ati, “Eki kikompe ky'obwamba bwange oburashesheka aha rwanyu, niyo ndagano empya y'obwamba bwange.]

²¹ Kyonkai muraleba, alikwija kumbanja ataire omukono aha meza nitulya hamoi.

²² Omwana w'Omuntu naija kuba nk'okwo kyakahangirwe. Kyonkai alikwija kumubanja alibona!”

²³ Aho abegesibwa babanza kubazangana bonene bonkai, kumanya n'ohai omuli bonene alikwija kukora atyo.

Obukuru bw'omwiru

²⁴ Omu begesibwa haimukwamu empaka, benzire kumanya omukuru kushaaga bona n'ohai.

²⁵ Yesu abagambira ati, “Abakama b'abanyamahanga abatwarwa babo babatwaza eikama. Kandi abatwazi benda kwetwa ‘Ngonza z'abantu.’

²⁶ Kyonkai omuli inywe bitaliba bityo. Omukuru wanyu bwoli abe n'iwe aba muto wanyu bwoli. Omutwazi abe mukozi wanyu.

²⁷ N'ohai omukuru kushaaga ondijo: Ayashuntama kulya anga omukoziwe? Manya omukuru n'ogwo ayashuntama kulya. Kyonkai inye omuli inywe mba mukozi.

²⁸ “Inywe ninywe mwangumireho omu matangwa gange.

²⁹ Nk'okwo Tata yampaire obukama nanye kwakwo nimbubaha,

³⁰ mwije omu bukama bwange mulye, munywe, mushuntamire enketo muramure amahanga 12 ga Isiraeli.

Yesu nabasha okwo Petero aramwetonga

³¹ “Simoni, Simoni! Sitani ashabire muno kuberura nk'engano.

³² Kyonkai inye nkushabiire okwesiga kwawe kutakuyuga. Kandi iwe k'oraba wangarukireho, barumuna bawe orabagumisa.”

³³ Petero agambira Yesu ati, “Mukama wange, inye nibatufunga hamoi, n'okufa nitufa hamoi.”

³⁴ Yesu agamba ati, “Kankugambire Petero, kir'eki enkoko etakakokoromire, oraba wanyetongire kashatu okw'otalikummanya.”

Enfulebe, omufuko n'embanda

³⁵ Yesu abaza abegesibwabe ati, “Orwo nabatumire mukagenda mutaina nfulebe ya mpiha anga mufuko anga nbiratwa, mwina ekyababuzireho?” Bahorora bati, “Tikiliho.”

³⁶ Aho abagambira ati, “Mbwenu araba aina enfulebe y'empiha agikwate; n'omufuko kutyo. Kandi ataina mbanda aguze ebeboye agure embanda.

³⁷ Kambagambire, ekyahandikirwe kyaija kugobeelera omu birabaho, bati, ‘Bakamukwatirana n'abafakare.’ Manyasi ebyo bampandikireho nibija kugobeelera.”

³⁸ Abegesibwa bagamba bati, “Rugaba, waitu leba embanda niz'ezi ibili.” Yesu abagambira ati, “Katulekelere aho.”

Yesu nashoma enshara aha Ibanga ly'Emizeituni

³⁹ Yesu aturuka, agya aha Ibanga ly'Emizeituni nk'okwo yakagiraga. Abegesibwabe bamuhondera.

⁴⁰ Kayagobireyo abagambira ati, “Mushome enshara, mutakugwa mu bilengeso.”

⁴¹ Abarugaho akatambi akasaine mbali wakurasha eibare likagoba, abandama, ashoma enshara ati,

⁴² “Tata, k'oraba noyenda onjune ekikompe eki. Kyonkai tikwo inye ndikwenda, shana okwo iwe olikwenda kibe nikwo kiba.” [

⁴³ Aho omumalaika aruga omw'iguru amubonekera kumugumisa.

⁴⁴ Kayabaire ali omu kubanganwa omwoyo ashoma enshara n'amani gangi kushagaho. Ahitana empita elikushusha amatonya g'obwamba, empita egyo emagalika ahansi.]

⁴⁵ Kayarugire kushoma enshara, agoba abegesibwabe ashanga banagiziibwe obujune.

⁴⁶ Ababaza ati, “Kiki nka mwanagira? Mwimuke mushome enshara mutaija mukagwa omu bilengeso.”

Yesu nakwatwa

⁴⁷ Yesu kayabaire akyali omu kugamba atyo, aijwa embaga eyebembeirwe omuntu alikwetwa Yuda, omoiho omw'ikumi na babili. Ailira ahali Yesu kumunywegera.

⁴⁸ Kyonkai Yesu amubaza ati, “Iwe Yuda, nonywegera Omwana w'Omuntu kumubanja?”

⁴⁹ Abo yabaire ainabo kabaaboine ebyaija kubaho, babaza Yesu bati, “Rugaba, waitu tutemese embanda?”

⁵⁰ Omuli bonene harugwamu omoi agiteza omwiru w'Omukuhani Nyamukuru amutemaho okutwi kwa bulyo.

⁵¹ Kyonkai Yesu amugambira ati, “Lekelera aho!” Akwata omwiru ogwo okutwi amukiza.

⁵² Yesu abaza abakuhani bakuru, n'abakuru ba Rwensinga, n'abagurusi ababaire bamuzinzire, ati, “Mwanzinda nk'omushuga, mwaija n'embanda n'enkoni z'erungu?

⁵³ Orwo nkasiiba nainywe buli kiro omuli Rwensinga timukankwataga. Kyonkai mbwenu esaa yanyu niy'egi orwo mwina amani g'omwilima.”

Petero nayetonga Yesu

⁵⁴ Bakwata Yesu bamukurukumbya bamutwete ow'Omukuhani Nyamukuru. Petero amuhondera nasigara enyuma.

⁵⁵ K'abantu babaire bahembire omuliro omu ndaragati ya nyakabuga, bakashuntama kwota, Petero nawe abashuntamamu.

⁵⁶ Omuzana kayamuboine okwo ashuntamire aha muliro, amulebage amwekomya, agamba ati, “Omushaija ogu nawe yaba aina Yesu.”

⁵⁷ Kyonkai Petero ayetonga okwo yaba ainawe, agamba ati, “Iwe mukazi, Yesu ogwo tindikumumanya.”

⁵⁸ Ahanyuma kake omuntu ondijo nawe amubona, agamba ati, “Naiwe kwakwo oli wabo.” Kyonkai Petero ahorora ati, “Iwe mushaija, inye tindi wabo.”

⁵⁹ Esaa ehinguraho nk'emoi, omuntu ondijo aija ataho akakumu ati, “Mazima, omushaija ogu nawe yaba aina Yesu; aha rw'okuba Munyagalilaya.”

⁶⁰ Ndi Petero ahorora ati, “Iwe mushaija tindikumanya by'olikugamba.” Orwo yabaire akyagamba atyo, enkoko ekookoroma.

⁶¹ Omukama akubuka aleba Petero. Petero aijuka ekigambo ky'Omukama, okwo yabaire amugambiire ati, “Kir'eki enkoko etakakokoromire, oranyetonga kashatu.”

⁶² Nikwo Petero kuturuka aheru akalira muno.

Yesu nibamujaamya nibamutera

⁶³ Abashaija ababaire bakwete Yesu bamujaamya, bamutera.

⁶⁴ Bashuba bamubunda aha maisho bamugambira bati, “Baasha! Ayakutera n'ohai?”

⁶⁵ Bamurogotaho n'ebindi bingi, bamushekelera.

Yesu omu rukiiko rw'abagurusi

⁶⁶ K'obwire bwakeire abagurusi b'embaga bahurura, abakuhani bakuru n'abeegesa b'Amateka babulimu. Bamutwara omu rukiko, bagamba bati,

⁶⁷ “K'oraba oli Kirisito otugambire.” Yesu abagambira ati, “Kandabagambira timunyikilize,

⁶⁸ kandi kandababaza timumporore.

⁶⁹ Kyonkai kuruga mambwenu Omwana w'Omuntu naija kusingira aha bulyo bwa Ruhanga Omushoborabyona.”

⁷⁰ Bona bamubaza bati, “Ahosi iwe oli mwana wa Ruhanga?” Yesu abahorora ati, “Inywe n'inywe mwakigamba okwo ndiwe.”

⁷¹ Bagamba bati, “Tukyayetaga bujuliziki obushagiire aha? Ekyo yagamba twakyehulilira nikiruga omu kanwake.”