Isaya 9 - Ebibulia 2001

¹ Kyonkai omukazi ogwo ayaboine enaku, ahali wenene ekiire tikilibaho. Eirai Ruhanga akagayisa ensi ya Zebuluni n'eya Nafutali, nawe omu makiro agalikwija omuhanda gw'aha nyanja araguha okuba gw'ekitinwa, niyo nsi ya Galilaya, buseli bwa Yordani eturwamu Abanyamahanga, bwolekera bw'Enyanja.

² Abantu abaikaraga omu mwilima, baboine omushana gungi; na tulinya abaturaga omu nsi ey'omwilima elindindi, omushana gubajweleire.

³ Eihanga olikanyisize, walyongera amashemelerwa, omu mabona gawe nibeshanda, nk'okwo bashemelerwa nibagesha, nk'okwo abashaija beshanda nibabegana eminyago.

⁴ Nk'okwo eirai wasingiire eihe lya Midiani, nikwo ohenzire enkomo yabasikiliraga n'enkoni eyabateraga amabega; waba nikwo osinga otyo eihanga, elyababonesaga enaku, likabaka n'ebyabo.

⁵ Aha rw'okuba ebikwato byona eby'omurashani ogenda nabyo omu ndashana, n'ebijwaro ebikurungirwe omu bwamba, birahembwa nk'enkwi.

⁶ Twazalirwa Omwana, twahabwa Omwana w'omwojo. Engoma eramugya aha mabega, n'eibaralye arayetwa “Mutegeki katangaza, Ruhanga Omushobora, Isheichwe ow'eirai lyona, Omukama w'emilembe.”

⁷ Obutwazibwe n'emilembe biraikaraga nibyeyongera, obuzira ndekelero. Aliguma aha nketo ya Daudi atware engomaye, agitwaze amazima n'obugorogoki, kwema mbwenu kuturuka eirai lyona. Eki, Omukama w'amahe akigendeleire, alikikora.

Omukama alibonabonyia Isiraeli

⁸ Omukama atumireho Yakobo namutatira, mara ekigambo ekyo kiligobelera ahali Isiraeli.

⁹ Abantu bona tulimanya ekigambo ekyo, hamoi n'Abaefuraimu n'abatuzi ba Samaria, abagira eituli n'eitulikizi batatekeleize bati,

¹⁰ “Amatofari gakumbire, kyonkai turayombekesa amabare agabaizire. Emisikomori bagitemire, nawe omu mwanya gwayo turatamu emielezi.”

¹¹ Kityo Omukama naija kubasindikira ababisha, ababisha babo abateekemu akaliro.

¹² Abasiria bemire oburugaizoba, kandi Abafilisiti bemire obugwaizoba, bashamwire akanwa kulya Isiraeli, ebyo byona n'orwo bili bityo Omukama akyabanigaliire, n'omukono akyagwimukize kubabonabonyia.

¹³ Isiraeli takechulize n'orwo Ruhanga amubonabonyize, Omukama w'amahe tibakamwitaniire.

¹⁴ Nikyo Omukama alikwizira, kutemaho Isiraeli omutwe n'omukira, akatema amatagi g'omukindo n'orubingo ekiro kimoi.

¹⁵ Omutwe nibo bagurusi n'abakunirwa, omukira nibo barangi abegesa ebishuba.

¹⁶ Aha rw'okuba abebembera eihanga eli nibalihabisa, kandi abebemberwa abantu aba nibafa nibahwaho.

¹⁷ Aha rw'ekyo batabani babo titulikushemelera Mukama, kandi Omukama wenene talikugilira ntabwa zabo n'entumbwakazikazi zabo mbabazi, kuba buli omoi mubi mara mufakare, bona nibagamba ebikabire. Ebyo byona n'orwo bili bityo, Omukama takalekeire kubanigalira, kandi n'omukono akyagwimukize kubabonabonyia.

¹⁸ Kuba ekibi kyaka nk'omuliro, kyokya nk'orukwatango n'amahwa, kyokya n'ekibira ekisibinkijainyie, kihya kitumuka omwika.

¹⁹ Ensi nehya nezira ekiniga ky'Omukama w'amahe, n'abantu b'ensi egyo nibashusha ensi z'okuhembesa omuliro, n'ow'okuganyira omurumuna taliho n'omoi.

²⁰ Nibashakashakura obwakulya omukono gwa bulyo, kyonkai enjara bakyainayo, nibashakashakura obumosho, nawe narwo titulikwiguta, buli omoi nalya abaanabe.

²¹ Manase nalya Efuraimu, Efuraimu nalya Manase, kandi bombili nibalya Yuda; kyonkai ebyo byona n'orwo bili bityo, Omukama takalekeire kubanigalira, n'omukono akyagwimukize kubabonabonyia.