Isaya 8 - Ebibulia 2001

Akamanyiso ka Maherishalalihashibaazi

¹ Aho Omukama yangambira ati, “Kwata ekishate kihango ky'eibare, okihandikeho omu nyuguta zihango oti, ‘Ebya Maherishalalihashibaazi.’ ”

² Nshuba nkwasa abajulizi babili abesigwa ab'okunjulira, atulimu Uria omukuhani na Zekaria eya Yeberekia.

³ Ebiro kabyarabireho, omukazi wange omurangi atwara enda azara omwana w'omwojo. Ahanyuma Omukama angambira ati, “Eibara omwete Maherishalalihashibaazi;

⁴ ahakuba orwo omwana aliba atakamanyire kugamba ati, ‘Tata’ anga ‘Mawe,’ eitunga lya Damasiko anga eminyago ya Samaria bilitwarwa omukama wa Asiria, agende nabifunya.”

⁵ Omukama ashuba angambira ati,

⁶ “Orwo abantu aba bangire amaizi ga Shiloa agalikugera mpora, bakatina Rezini na mutabani wa Remalia,

⁷ leba, Omukama naija kubasindikira engezi y'amani y'amaizi ga Efurati, engezi egyo n'iwe mukama wa Asiria n'ekitinwakye kyona. Amaizi ago garaijura gashage enyato zago n'ebisa byago byona,

⁸ gagende nigakukumba buli kantu gatahe Yuda, gaijure gamareho ensi yona, gagobe omu bikya, gagobe buli hantu gamareho ensi yawe yona, iwe Emanueli.”

⁹ Muchure inywe mahanga, muhahanwe, tega amatwi inywe nsi ezili harai; mwekome enfufu, muhahanwe, mwekome enfufu, muhahanwe.

¹⁰ Mutense, nawe birabura nshai, n'ebyo muragamba birafa bushai, manyasi Ruhanga twinawe.

Omukama natanga omurangi

¹¹ Kuba Omukama Omushobora muno akantanga kurondora amahanga, ati,

¹² “Ekyo abanyamahanga tulinya bona tulikweta bushengi, muleke kukyeta bushengi. Kandi ekyo tulikutina mutakitina, mutakugira bwoba.

¹³ Shana Omukama w'amahe mube n'iwe muha ekitinwa aha rw'obutakatifubwe, mube n'iwe mutina, abe n'iwe abagiza obwoba.

¹⁴ Aliba bwirukiro, abe ibare elilyangwa, abe rwazi rw'okusitarwaho engoma za Yuda na Isiraeli, kandi abatuzi ba Yerusalemu ababere mutego n'ekitimba.

¹⁵ Atuli bangi tulimusitaraho; bagwe bahendeke, bakwatwe omutego, mara babatware endore.”

Okutaraguza aha bafu

¹⁶ Hamisiza kimoi Amateka aga, okomeleze abegesibwa bange bagakwate.

¹⁷ Omukama takinagira nju ya Yakobo lisho, kyonkai inye ndindiliire wenene, nimwesiga.

¹⁸ Leba, inye n'abaana abo Omukama yantungire bali bumanyiso, mara bitangazo ebitairweho Omukama w'amahe, asingiire aha Ibanga lya Sioni.

¹⁹ Kandi kabarabaragira kuraguza aha tulikugambisa ebizimu n'aha bafumu atulikunywigya nibagambira omu matama, timulikumanya okwo abantu baragiirwe kwehanuza ahali Ruhanga? Abantu atulikurora babaragulize aha bafire?

²⁰ Emiku n'ebyo babegesa mube nibyo mwehanuzaho! Mazima aha rw'ekigambo eki ekyo tulikugamba titulibona mambya.

²¹ Baragenderaga elyo kushai, baina obushasi bungi n'enjara. Mara orwo barabaga baina enjara, baragiraga n'ekiniga kingi, bakene omukama wabo na Ruhanga wabo. Baliraramira eiguru

²² anga balebe ahansi, babure eky'okubona, shana obushasi n'omwilima n'ekire ekisikiire. Ahanyuma tulinagwa omu mwilima elindindi.