Isaya 66 - Ebibulia 2001

¹ Omukama nagamba ati, “Eiguru niyo nketo yange, kandi ensi niko katebe ako mpumuzaho amaguru. Ni njuki egyo eyo mulikwija kunyombekera? Isi ni mwanyaki ogwo ndikwija kuturamu?

² Ebi byona n'inye nabitonzire mara byona byange. Kyonkai inye omuntu n'iwe ndikuhiga, omwetohya, alikwechuza amafuge, alikuhulira ekigambo kyange akajugumba.”

³ “Abantu nibakora okwo bonene tulikwenda; ebigoko byabo nibyo tulikushemelerwa. Ahali bonene okutamba ente n'okutamba omuntu nikyo kimoi. Kutyo okutamba omwana gw'entaama n'okutamba embwa talimu nshororo. Balikatamba myaka anga bwamba bwa ngurube nibabona byona birungi; kutyo tulikotera bunuma anga tulikashoma nshara aha kihuuku.

⁴ Kityo ndabateza ebibundo, ebyo batina nibyo ndabasindikira. Kuba nkabeta tibayetaba; nagamba tibahulira. Bakangokera bakora ebilikuntaama.”

⁵ Muhulire ebyo Omukama alikugamba inywe abamutina, inywe abamuhulira. Nagamba ati, “Abanyaruganda banyu atulikubanoba n'okubazira nibabatura inye, bagambire bati, ‘Omukama nayoleke okwo aba muhango abarokore, tulebe nimushemelerwa.’ Kyonkai atulikwija kushemelerwa ni bonene.

⁶ Murahulira! Orwasho omu kigo! Eyombo omuli Rwensinga! Omukama nabonabonyia abamunoba!”

⁷ “Ekigo kyange nikishusha omukazi azara omwana atetegeire, n'okurumwa atarumirwe.

⁸ N'ohai arahuliire ekyab'eki? Ebya ngeli egi arabiboine n'ohai? Eihanga lyona lirazairwe omu kiro kimoi? Lyakuzarwa omu kanya kamoi? Leba, Sioni telikwija kurumwa, eshube ezare eihanga.

⁹ Mutakutekeleza muti eihanga lyange ninyija kuligobya aha kanya k'okuzarwa nshube nditange kuzarwa.”

¹⁰ Inywena abatura Yerusalemu mwihukye ekigo eki! Mukihukye mbwenu aha, inywena abatura nimukichulira!

¹¹ Mwonke Yerusalemu mwigute, amabere gayo gabagaruremu akoyo, munywe muno aha kitinwa kyayo ekingi, mushemelerwe.

¹² Manya Omukama nagamba ati, “Leba, Yerusalemu ndigyongera eitunga elilembeire nk'amaizi g'omwiga ogulikugera. Yerusalemu elibonkya, ebaheke, ebatore nebaguragurukya.

¹³ Nk'okwo nyinamuntu mwana amaramara omwanawe, nikwo nanye ndimaramara inywe, omuli Yerusalemu mulibonamu eky'okubamaramara.

¹⁴ Orwo mulibona okwo ebi byabaho, mulishemelerwa, muligeija nk'obunyasi. Aho mulimanya okwo inye Omukama, njuna abampulira, kandi abannoba mbabonabonyie.”

¹⁵ Kuba leba, Omukama alija omu muliro. Alija anigaire kubi omu gali elikushusha embuyaga, aije kubonabonyia ababishabe, kandi k'alikabuka tulimanya ndimi z'omuliro.

¹⁶ Eiramulye aha bantu bona kuliba kubokya n'omuliro n'okubatemesa embanda. Ab'Omukama aliita tuliba bangi.

¹⁷ Omukama nagamba okwo atulikweshemeza kugya kufukamira baruhanga abatakansi, nibatera enjuru bagiire omu busitani z'ekitakansi, atulikulya enyama y'engurube n'ebibebaishwa n'emiziro endijo, abo tulifa eiturampungu.

¹⁸ Omukama nagamba ati, “Ebyo tulikukora n'ebyo tulikutekeleza nimbimanya. Ninyija kuhuruza amahanga gona gaije gabone ekitinwa kyange,

¹⁹ mara amahanga ago garamanya okwo n'inye ngabonabonyia. Kyonkai abandi omu mahanga ago ndibaganyira, omu mahanga bagobe na Tarishishi, Puti na Ludi omu barasi b'emyambi, bahike Tutuli na Yavani, n'ensi z'emyaro ezili harai muno, mtuli batakabonaga kitinwa kyange anga kuhuliza iraka lyange. Aba abo ndatuma baramanyisa amahanga ekitinwa kyange.

²⁰ Baraihya barumuna banyu bona omu mahanga gona babalete aha farasi omu magali, aha ngamia n'aha nyumbu, abandi baije babahekire, babalete nk'ebihongo aha Mukama omuli Yerusalemu aha ibangalye elitakatifu, nk'okwo Abaisiraeli baleta ekihongo kyabo ky'emyaka omuli Rwensinga omu bikwato ebirungi.

²¹ Kandi abandi ndabarondamu babe bakuhani n'Abalevita.”

²² “Nk'okwo ensi n'eiguru elihya birama omu bushobora bwange, nikwo na baijukuru banyu n'eihanga lyanyu bilirama.

²³ Ahali buli kiro kikuru okwezi kwemire, na buli Sabato, abantu bona baraijaga kunfukamira.

²⁴ Kandi tulituruka kuleba emitumbi y'abanshengire. Enzito ezilibalya tizilifa, n'omuliro ogulibokya tigulirara. Buli muntu alibaleba nasheshemukwa.”