Isaya 65 - Ebibulia 2001

Omukama naramura amahanga

¹ Omukama akagamba ati, “Nkaba nyetekatekire kuhorora abantu bange, nawe tibanshabire. Nkaba nyetekatekire kabampiga bakambona, kyonkai tibampigire. Eihanga elitanshabire nkaligambira nti, ‘Leba, ndiho ndi aha!’

² Omushana gwona nasibaga nyimukize emikono kwakilira eihanga elitalikunshengera, abakora ebitalibyo, shana ebyo bonene benzire.

³ Eihanga elyo nilinnigaza buli kanya. Nibatamba ebitambo by'ekitakansi omu busitani, nibotera obunuma aha alutare z'ekitakansi.

⁴ Omu kiro nibagya omu nyanga n'omu mpako kuraguza aha bizimu by'abafu. Omu bikwato byabo nituliramu enyama y'engurube n'okunyweramu omuchuzi gw'enyama y'ebitambo eby'ekitakansi.

⁵ Nibagambira abandi bati, ‘Mutwilire harai, muramanya mutatukwataho, kuba tuli batakatifu!’ Abantu aba ngeli egi inye tindikubemera. Ekiniga kyange ahali bonene kili nk'omuliro ogutarara.”

⁶ “Naramwire ekibonabonio ekyo ndabaha, mara ekibonabonio ekyo kihandikirwe. Ebyo bakozire nimbyekomya; ndababonabonyia

⁷ aha rw'amafu gabo n'aga baish'enkurubo. Boteire obunuma omu buju bw'ekitakansi omu nshozi bashuba bangamba kubi. Kityo ninyija kubabonabonyia kuhonderana n'amafu gabo ago bakozire.”

⁸ Omukama nagamba ati, “Nk'okwo edivai eshangwa eli omu zabibu, bakagira bati, ‘Ezabibu ezo mutakuzita, aha rw'okuba zinamu omugisha,’ nanye nikwo ndagira aha rw'abairu bange, timbaite bona.

⁹ Abaisiraeli ab'oruganda rwa Yuda ndibaha omugisha, kandi baijukuru babo tulilya ensi yange ey'amabanga. Eihanga lyange elironkwa, elinkolera, tulitura omwo.

¹⁰ Balinfukamira, entaama zabo n'ente zabo barazilisizaga omu muteleka gwa Sharoni, n'omu Ruhanga rwa Akori nimwo zilibyama.

¹¹ Kyonkai inywe abansigireho mukebwa n'eibanga lyange elitakatifu, mukafukamira Gadi na Meni baruhanga ab'omugisha n'ebasha,

¹² ndabaanaga aha mbanda; inywe barabakindura. Kuba nkabeta timwamporoire; nagamba timwahulira, mwangokera, mwakora ebilikuntaama.

¹³ Aha rw'ekyo leba, abairu bange baranywa balye, kyonkai inywe mwitwe enjara n'eiliho. Barashemelerwa kyonkai inywe enshoni zirabaita.

¹⁴ Baragira ebyera bazine, kyonkai inywe mugire obujune n'obushasi bungi muno muchure muboroge.

¹⁵ Omu ndonkwa zange inywe muliba baraamwa, inye Omukama Ruhanga ninyija kubaita inywe. Kyonkai abairu bange ndabeta eibara elihya.

¹⁶ Omuntu omu nsi aligonza omugisha, aligushaba ahali Ruhanga Omwesigwa. Kandi wena wena aligonza kunahira, alinahira obuso bwa Ruhanga Omwesigwa. Enaku ez'eirai zilihwa mara zebeke.”

Eiguru elihya n'ensi empya

¹⁷ Omukama nagamba ati, “Leba, naija kutonda eiguru elihya n'ensi empya. Ebyabaireho ruli tibikiijukwa rundi.

¹⁸ Shana ekiliho mushanduke, mushemelerwe ebyo naija kutonda. Yerusalemu empya eyo naija kutonda eraba y'ebyera bingi, kandi n'abantu bamwo baragira amashemelerwa.

¹⁹ Na inye nyenene Yerusalemu eranshemelera, n'abantu bamwo baraba byera byange. Omuli Yerusalemu takihulirwamu kuchura na kutaga.

²⁰ Tihakifamu nkelemeke, nangu n'omugurusi atakuzire akahangara chei. Omuntu arataga kufa aina emyaka kikumi, kyonkai abafakare abaramwa emyaka kikumi tibagigobyega.

²¹ Barayombekaga amaju bagaturemu, babyare emizabibu bagilyeho ebiraba.

²² Tibalyombeka maju ga kwija kuturwamu bandi; titulibyara mizabibu kandi ezabibu zikalibwa bandi. Abantu bange barahangaraga nk'emiti, kandi endonkwa zange zilishemelerwa ebyo zekoleire ebiro birai.

²³ Ebyo tulikora titulihendekera bushai, kandi abaana babo titulibona kabi. Bonene na baijukuru babo ndabahaga omugisha amakiro gona agalija.

²⁴ Nangu batakamanyire kunshaba inye ndiba nabahoroire, batakamazire kugamba inye ndiba nabahuliire.

²⁵ Omushega gulilya n'omwana gw'entaama, kandi entare elilya obunyasi nk'ente. Kyonkai enjoka egyo eralyaga eitaka. Taliho kilihutaza kinu omuli Sioni, eibanga lyange elitakatifu.”