Isaya 63 - Ebibulia 2001

Omukama nasinga amahanga

¹ Ogwo n'ohai alikuruga Bozira omuli Edomu, ajwete ebijwaro katuku? Ogwo ajwete emyendo ey'ekitinwa, natambuka bundi mukama w'ekitinwa n'amani? N'inye ningamba okwo ndisinga ababisha bange, kandi eihanga lyange nkalirokora.

² Kubaki emyendo yawe netukura, ebijwaro byawe nibishusha eby'omujungi w'edivai?

³ Omukama nahorora ati, “Amahanga inye ngajungiliire nyenkai, taliho anjunire. Amahanga ngalibasize ekiniga, gajwa obwamba bwatuntira ebijwaro byange, emyendo yange yona yagira ebibara.

⁴ Kuba mbaire nintekeleza ekiro ky'okwehora ababisha bange, n'omwaka ogwo nataireho gwagoba ogw'okuchunguliramu eihanga lyange.

⁵ Nkaleba ow'okunjuna, tiyazokire; nkatangara kubona okwo hataliho wa kumpwera. Endashana nkagisinga omu bushobora bwange nyenkai, ekiniga kyange nikyo kyonkai ekyanjunire.

⁶ Nkanigara najungilira amahanga, nagabuza amagezi, nagasilikya.”

Obufura bw'Omukama ahali Isiraeli

⁷ Inye ndyebuga ekisha ky'Omukama n'ekitinwakye, kuhonderana na byona ebyo atutungire. Atungire Abaisiraeli omugisha gungi muno aha rw'enshonga y'obuganyizibwe n'ekishakye ekingi muno.

⁸ Omukama akagamba ati, “Omu mazima bonene abo baba bantu bange; baana bange abataligira bugobya.” Mara wenene yashuba yaba Murokozi wabo.

⁹ Omu naku zabo, wenene tiyabashasize. Kandi ti mumalaika shana Omukama wenene n'iwe yabarokoire. Akabagilira engonzi n'obufura yabachungura. Kwema akarai kona n'iwe yatulindaga.

¹⁰ Kyonkai bakamugomera bamujunaza Omutakatifu, aho nawe yaba mubisha wabo yabarashanisa.

¹¹ Ahanyuma baijuka amakiro ag'eirai, aga Musa omwiru w'Omukama. Bayebaza bati, “Mbwenu Omukama alihai ayarabize abatwazi b'eihangalye omu nyanja? Alihai Omukama ayabahaire Mwoyowe Omutakatifu?

¹² Alihai ayahaire Musa obushobora kukora eby'okutangaza? Alihai Omukama ayabasiize enyanja, kwema aho akabona eiranga elitalihwaho eirai lyona,

¹³ akabarabya omu nyanja engundu?” Bakashusha okwo efarasi eraba omw'irungu, tibasitaire.

¹⁴ Mwoyo w'Omukama akabatunga emilembe, nk'okwo basongora ente omu ruhanga rw'eitonjo. Akebembera abantube abone kuhaisa eibaralye ekitinwa.

Enshara y'okushaba obuganyizi n'obujuni

¹⁵ Waitu Mukama, osinge oyeme omw'iguru, omu businge bwawe obutakatifu mara obw'ekitinwa otulebe. Ekihika kyawe eky'otugilira n'amani gawe bili nkahai? Tokitugonza, kandi tokitugilira mbabazi.

¹⁶ Kuba iwe oba isheichwe. Aburahamu na Isiraeli titulikutumanya, kyonkai iwe, waitu Mukama, ni iwe oba Isheichwe, kwema karai eibara lyawe tukweta “Muchunguzi waitu.”

¹⁷ Waitu Mukama, watuleka twasigilira entwaza zawe, watugumanganisa emitima twalekera kukutina? Singa ogaruke, twakutaho abairu bawe, eihanga lyawe nyabwawe.

¹⁸ Ichwe eihanga lyawe elitakatifu. Yerusalemu ekaba yaitu akanya kagufi. Mbwenu nekandagilirwa ababisha baitu.

¹⁹ Twashusire oti tokabaga Mukama waitu, oti titukabaga bantu bawe.