Isaya 61 - Ebibulia 2001

Amakuru garungi g'okuchungurwa kwa Isiraeli

¹ Mwoyo w'Omukama Ruhanga asingiire ahali inye, kuba Omukama ankozire amajuta kuletera atuli omu naku amakuru garungi. Antumire kushemba engoga z'abahendekire emitima, endore kuzimanyisa okwo zaija kutaishurwa, n'abafungiirwe okwo baija kuruga bubohe.

² Omukama antumire kubatona okwo obukirobwe bwagoba, obukiro obwo Ruhanga waitu alikwija kweholeraho ababishabe; kandi antumire kumaramara bona atulikuchura.

³ Abali Sioni nibachura kambaihya omu naku, kubaha ebyera n'amashemelerwa, kubaragaza eijwi nkabajweka orukinga rw'amaua. Balekere kuchura mbahe amajuta, balekere kushuburugukwa mbahe ebebo nungi. Bashushe emialoni ey'Omukama ayebyaliire, bona bakore ebigorogokire, na Ruhanga ahaisilizibwe aha rwa byona ebyo akozire.

⁴ Balyombeka buhya ebigo ebitura bikambukire, ebigo ebitura gali matongo babimukye, ebigo ebyakambukire eirai babishemeze.

⁵ Abanyamahanga tulitulisiza amahyo ganyu g'entaama, batulimire mara babe bakozi omu ndimiro zanyu z'emizabibu.

⁶ Nawe inywe mulyetwa bakuhani b'Omukama, abantu tulibeta bakozi ba Ruhanga waitu. Eitunga ly'amahanga liliba lyanyu, libe lyanyu mugire ekitinwa.

⁷ Enshoni n'ebihemu bilibahwaho. Mulitura omu nsi eyanyu nyabwanyu, kandi eitunga lyanyu lilyeyongera emirundi ebili; n'ebyera byanyu biliba by'eirai lyona.

⁸ Kuba inye Omukama ngonza amazima, ntamwa omuntu kunyaga abandi akashuba akagira ekihongo ky'okwokibwa. Abantu bange ndibaha erongoro esaine, kandi nkore nabo endagano ey'eirai lyona.

⁹ Abaana babo tulimanyika omu mahanga, na baijukuru babo kwakwo, bona atulibabona tulikiliza okwo tuli ihanga ely'Omukama yahaire omugisha.

¹⁰ Omukama ndimushemelerwa muno munonga, kuba anjwekire ebijwaro by'okundokora, obugorogoki niyo kanzu eyo antairemu. Nashusha kishwera ayelengize n'orukinga rw'amaua; nashusha omugore ayelengize n'amabare g'eiguzi.

¹¹ Nk'okwo ebintu biruga omw'itaka bikamera, n'empambo ezibibirwe omu bulime okwo zimera, nikwo omu bushobora bw'Omukama Ruhanga amahanga gona galimanya obugorogoki gamusingize.