Isaya 59 - Ebibulia 2001

Omurangi natamwa amafu g'abantu

¹ Leba, obushobora bw'Omukama tibukakeyaga, kugir'oti tiyakurokora muntu. Takafaga na matwi kugamb'oti taina kuhulira.

² Kyonkai inywe amafu ganyu nigo gabatanisize na Ruhanga wanyu. Timukimubona aha rw'enshonga y'entambara zanyu, niyo nshonga atalikubahulira.

³ Mwina ebishuba n'ebiboyo, kandi nimwita abantu, nimugamba kubi omu kanwa.

⁴ Nimugya omw'iramuliro kugamba ebishuba, entoija yanyu ti ya mazima. Nimuhangilira, nimugamba ebitalibyo, nimutokya banu, muli omu kulimira abantu obwina.

⁵ Nimwatira amahuli g'empili, nimuruka enju y'orububi. Alikulya amahuli gomwayatira afa, kandi eihuli lyomulikwata nilirugwamu enchwera.

⁶ Embubi ezo barukire tiziibe myendo bakazijwara. Ebyo tulikukora tibabyeshweke. Ebikorwa byabo mafu gashai, nibaboya kushai.

⁷ Ebibi nibyo tulikutegeka, nibategeka kwita abataina ntambara. Nibatekeleza amafu gonkai, okwita abantu bakababonabonia nikwo tulimu.

⁸ Tibategeka bya milembe; n'ebyo tulikukora tibinamu mazima. Ebyo tulikukora bishobire; alikukora ebyo tainamu milembe.

Abaisiraeli nibejuma amafu gabo

⁹ Ahanyuma nikwo abantu kugamba bati, “Tituli bantu ba mazima kandi tituli bagorogoki n'ak'okuziza. Nituhiga omushana kyonkai leba omwilima n'ekiire.

¹⁰ Nitukarakanja kuhiga mtuli orukuta ruli, nitukarakanja nk'abataina maisho. Nitusitara omw'ihangwe okw'obon'oti kalembabazana. Omuli tulinya abaina amani ichwe nitushusha abafire.

¹¹ Nitusinda nk'edubu, nitutaganyia nk'obwiba. Tulebire Ruhanga nk'aratwihya omu naku kyonkai taliho shubi. Tulebire nk'araturokora byabura nshai.

¹² Kuba tukufakalire muno, waitu Mukama, amafu gaitu nigaturopa. Entambara zaitu nituzishobokerwa, amafu gaitu nitugamanya.

¹³ Tukakufakalira, twakwetonga, waitu Mukama Ruhanga twayanga kukugumaho, tukashasa abantu, na iwe twakugomera, twatekeleza ebishuba, nibyo tugamba byonkai.

¹⁴ Amazima tigakiliho, n'obugorogoki tibukimanyika n'akati. Ebilikukolerwa nyakabuga tibinamu mazima, n'obugorogoki tibukirangwamu.

¹⁵ Obwesigwa tibukiliyo, nangu n'omuntu alikulekera kufakara, ababi nibamunoba.” Ebi byona Omukama yabiboine mara talikushemelerwa kubona amazima gataliho.

Omukama natekateka kurokora eihangalye

¹⁶ Yaboine n'omuntu ow'okutelera banu omushango okwo atalikuzoka. Kityo wenene arakoza obushoborabwe abarokore mara asinge ababishabe. Obugorogokibwe nigo manige.

¹⁷ Obugorogoki niyo ngabo y'ekyoma eyo alijwara omu kifuba, kandi okusinga ababishabe niyo helumeta eyo alijwara omu mutwe. Nagonza muno kutebekanisa ebintu, kubonabonia atulikushasa abantu, atulikubonesibwa enaku abeholere.

¹⁸ Alibarongora kuhonderana n'ebikorwa byabo. Ababishabe ababonabonyie, ababuze emihanda. Nangu n'ensi ez'aharai alizigira atyo.

¹⁹ Aho ab'oburugaizoba tulitina Omukama, n'ab'obugwaizoba tulibona ekitinwakye. Alija nk'omugera ogw'engezi y'amani n'embuyaga omu kanya kamoi.

²⁰ Omukama nagambira eihangalye ati, “Ndaija Sioni, nchungure ab'omu ka ya Yakobo bona abarayechuza entambara zabo.”

²¹ Nashuba nagamba ati, “Egi niyo ndagano yange eyo ndakora na inywe: Obushobora bwange n'ebyo mbegesize, mwikarega nimubigamba n'abaana banyu, na baijukuru banyu, kwema mbwenu n'amakiro agalija.”