Isaya 58 - Ebibulia 2001

Okusiiba okw'amazima

¹ Omukama nagamba ati, “Oyatanguke, otakemelera iraka, oyatanguke nk'enzamba. Ogambire eihanga lyange Isiraeli entambara zalyo, ogambire eka ya Yakobo amafu gayo.

² Nibanfukamira buli kiro. Nibagamba okwo tulikugonza kumanya entwaza zange n'okuhulira Amateka gange, okw'obon'oti tuli ihanga eligorogoki, elitakachwaga migenzo ya Ruhanga walyo. Nibagamba okwo tulikugonza kambateraho Amateka garungi n'okwo tulikushemelerwa kunfukamira.”

³ Nibabaza bati, “Kubaki tusiibe? Orwo tulikusiiba Omukama nk'atalikutusiima? Twayeshasa, kyonkai ekyo talikukibonamu kantu!” Omukama nabahorora ati, “Omu mazima kamulikusiba, nimuba nimukora ebili byanyu, mara nimushasa abakozi banyu.

⁴ Omu kusiiba kwanyu, nimugira obukatili, nimukungana, nimurwana. Okusiiba kwanyu okwa kakyo aka tikubarugiremu kutaka kwanyu kungoba kunu mw'iguru.

⁵ Orwo mulikusiiba, nimweletera obushasi. Nimubwarama ahansi nk'obunyasi, nimwara engunia, nimuzanjaraho eijwi nimulibyamamu. Okwo nikwo mulikweta okusiiba? Inywe nimulenga muti ebyo nibinshemelera?

⁶ Okusiiba okwo ndikwenda nikw'oku: Mulekere kubonesa abantu enaku n'okubashasa, abo mutura mubonesa enaku mubaleke bagiire emilembe.

⁷ Abaina enjara mubahe eby'okulya; abaanaku atulikubunga mubahe obuturo. Abataina kakujwara mubahe emyendo, kandi ab'amakwatane ganyu mutaburwa kubajuna.

⁸ Aho ndibashemelerwa okw'obon'eizoba nilishabuka, n'amahuta ganyu galikira bwangu. Buli kanya ndiikara nainywe mbarokore, inye Omukama w'ekitinwa mbeme enyuma mtulinde.

⁹ Mulinshaba mbahorore, kamulitaka ndibetabuka. Kamulilekera kubonesa banu enaku, mukalekera eikuru, mukalekera okugamba kubi;

¹⁰ abajara mukabaha ebyakulya, mukashumbusha abaanaku, aho omwilima oguliba gubazingoire gulihinduka mushana gw'eihangwe.

¹¹ Ndibahabura buli kanya, mbahe n'ebintu ebirungi. Ndibaha amani n'emilembe. Mulishusha ebusitani y'amaizi gangi, mulishusha enchuro etayomera.

¹² Isiraeli alyombeka buhya amaju agakambukire, ashube ayombeke aha misingi yonene yonene eya karai. Mulimanyika okwo ni inywe mwayombekire buhya enkuta z'eboma n'amaju agakambukire mukagaturamu.”

Erongoro aha rw'okwekomya Sabato

¹³ Omukama nagamba ati, “Kamulilekera kuhagaza ekiro kya Sabato, mukalekera kukora emilimo aha kiro kyange ekitakatifu, mara mukamanya okwo kili kiro kitakatifu mukakikunisa mutagizire ngendo, mutakozire milimo, anga kusiba mu fumoro za katozi;

¹⁴ aho mulibona okwo okunkolera kurugwamu ebyera. Ndibaha ekitinwa omu nsi yona, n'ensi eyo nahaire Yakobo shw'nkurw'inywe, eliba yanyu. Alikugamba n'inye Omukama.”