Isaya 56 - Ebibulia 2001

Amahanga gona galijwangana n'eihanga lya Ruhanga

¹ Omukama nagamba ati, “Mube bagorogoki, mube bantu b'amazima. Kuba ndi haihi kubarokora, ningya kubaiha omu naku.

² Muberwa omuntu arahikya ekigambo eki, akakyekomya, akashemeza ekiro kya Sabato atakihagaize, kandi akelinda buli kimoi ekili kibi.

³ Omunyamahanga araba aikilize edini y'Omukama atakugira ati, ‘Omukama naija kumbinga omw'ihangalye;’ kandi n'omukobe atakugamba ati, ‘Leba, inye ndi muti gwomire.’

⁴ Aha rw'enshonga abakobe atulikushemeza ebiro bya Sabato, bakanshemeleza, bakekomya endagano yange

⁵ abo tulijukwa omuli Rwensinga yange n'omw'ihanga lyange ebiro bingi kushaga orwo bakuzaire abaana. Ndibaha eibara elitalichweka eirai lyona.

⁶ Kandi abanyamahanga atulikwikiliza edini y'Omukama, bakamugonza, bakamukolera buli omoi akashemeza ekiro kya Sabato, atakihagaize, akekomya endagano yange,

⁷ aba ndabaleta Sioni aha rushozi rwange orutakatifu, mbahe ebyera omuli Rwensinga yange, bantambire ebihongo by'okwokibwa n'ebitambo ahali alutare yange mara mbitore.”

⁸ Omukama Ruhanga wa Isiraeli omu buzahe akamugarura omuka nagamba n'okwo aragarura n'abandi abakyali omu buzahe, baije babe bamoi n'abo agarwire mbere.

Okutasimwa kw'abebembezi ba Isiraeli

⁹ Inywena bikaaka by'omw'ishwa n'omu bibira, rugayo mulye abantu bange. Atuli b'okulinda eihanga lyange bahumire amaisho, bona titulikumanya kantu.

¹⁰ Bona batita nk'embwa ezitaina gamoka. Babyamire kushai, babaanage aha kusomba, nibarota.

¹¹ Embwa zilya muno, taliho orwo zihaga. Abashumba nabo titulikushobokerwa kantu. Bona nibakora ebyo tulikwenda, buli omoi naitanira amagobage.

¹² Nibagamba bati, “Mwije tunywe edivai, tunywe amarwa agalikutamiza! Na nyenkya tunywe nka mbwenu, tushageho muno.”