Isaya 55 - Ebibulia 2001

Obuganyizi bwa Ruhanga

¹ “Buli omoi aina eiliho aije anywe amaizi, n'ataina mpiha aije agure ekyakulya alye! Mwije mugure edivai n'amata, taliho alikubenza mpiha, taliho kugira mpiha.

² Kubaki empiha zanyu nimuzigura ebyo mutalye, nimuchwazikanira ebitabaiguse? Mumpulilize kurungi, mulye ebirungi, mushemelerwe ebishaire.

³ Mutege amatwi mungobe, muhulire, nirwo muragira oburora; nyije nkore nainywe endagano ey'eirai lyona, mbagilire ekisha, engonzi z'amazima ezo nagondize Daudi.

⁴ Leba, nkamutaho kuba bulebero bw'amahanga, yayebembera amahanga ago yagatwara.

⁵ Leba, mulyeta amahanga ago mutamanya, n'amahanga agatabamanya galibagoba nigairuka, aha rw'okugonza Omukama Ruhanga wanyu, Omutakatifu wa Isiraeli, aha rw'okuba abahaire ekitinwa.

⁶ Muhige Omukama orwo akyaboneka, mumutakire akyali haihi.

⁷ Omubi alekere emizeye, omufakare alekere emitekelerezeye. Agaruke aha Mukama amuganyiire, agaruke ahali Ruhanga waitu, kuba aramugarulira byona.”

⁸ Omukama wenene nagamba ati, “Okwo inywe mutekeleza tikwo inye ntekeleza, n'ebyo inywe mukora tibyo inye nkora.

⁹ Ahakuba okwo eiguru lili harai kukira ensi, nikwo entwaza zange zilikukira ezanyu, n'emitekelereze yange elikukira eyanyu.

¹⁰ Nk'okwo enjura n'eseluji biruga eiguru bikagwa, mara tibigarukayo shana kwitilira ensi, ebintu bikamera, bikageija, omubibi akabona empambo, n'omuntu akabona eby'okulya,

¹¹ nikwo ekigambo kyange kiliba, tikyakubura kyo kyakora; kiligobesheleza ekyo ngendeleire, kikore ekyo nkitumire kukora mara kigoshoke.

¹² Muliruga Babiloni nimushemelerwa, ow'okubebembera abebembere omu milembe. Amabanga n'enshozi ebituli omu maisho bilishemelerwa nibihoya, n'emiti yona omu nshozi elitera oruganja.

¹³ Mtuli amahwa gali halimerwamu emisonobari, na mtuli orukwatango ruli halimerwamu emihadesi, ebyo nibyo Omukama araijukiragaho, ako niko kaliba kabonero k'eirai n'eirai akatalichweka.”