Isaya 53 - Ebibulia 2001

¹ N'ohai alikwikiliza ebyo tuhuliire tukagamba? N'ohai aboine obushobora bw'Omukama akabwikiliza?

² Omu maisho g'Omukama akakura nk'ekimera kito, yashusha omuzi oguranda omw'itaka elyomangaine. Omwiru w'Omukama ogwo akaba ataina kitinwa, kandi akaba atali murungi wa kulebwa bantu. Akaba atainamu ka bushemere obw'omuntu kugonza kumubona.

³ Omwiru ogwo w'Omukama yabaga mushashe, mujune, abantu bakamugaya mara bamwanga; akashusha omuntu owo abantu batagonza kuleba, tukamugaya twashuba twamukunukuruza.

⁴ N'ichwe twakushasire, wenene yashasha aha bwaitu. N'ichwe twakushasire, wenene yashasha aha bwaitu, nawe ichwe tukatekeleza tuti, “Ruhanga amuteire, amubonabonyize, yamukora omulimo.”

⁵ Kyonkai okuhutara akazira amafu gaitu, entambara zaitu nizo zamuteize. Ekibonabonyio kyoyaboine nikyo kyatukilize, tukakizibwa okuterwakwe.

⁶ Ichwena tukabuliira omw'ishwa nk'entaama, buli omoi yagenda muhandagwe. Ekibonabonyio ekyakubaire kyaitu Omukama akakiteka ahali wenene.

⁷ Bakamutera, bamushasa, kyonkai wenene tiyayatwire kigambo. Akajondeera nk'entaama nibagitwara kugiita, yashusha entaama eyesilize nibagishara obwoya, nikwo na wenene atayatwire kigambo.

⁸ Bakamukwata, bamuramura, bashuba bamutwara kumwita, kyonkai taliho muntu yamuramuliire. Bakamwita bamutura amafu g'eihanga lyaitu.

⁹ Bakaba benzire kumuziika nk'omufakare, kyonkai yaziikwa omu nyanga y'omutungi, mara okwo bambi akaba atakaitaga muntu anga kugamba kishuba.

¹⁰ Kyonkai Omukama n'iwe yagondize kumushasa, akamubonesa enaku. Omwiru ogwo w'Omukama akehindura kitambo ky'enyatano y'amafu, mara nikyo aligilira n'abaijukuru, alihangara, ekyo yagendeleire alikigobesheleza.

¹¹ K'oburorabwe obw'enaku buliba bwahoire alibona ebyera. Omwiru wange ogwo omugorogoki, enakuze zilimuha okurokora abantu bangi, alifa kwatilira amafu gabo.

¹² Aha rw'ekyo ndimutulirana omu bantu ab'ekitinwa, abegane n'ab'amani eminyago, kuba akahayo oburorabwe kugoba aha kufa, yaboneka nk'omufakare. Akafera abafakare bangi, yabatelera omushango.