Isaya 52 - Ebibulia 2001

Ruhanga alirokora Yerusalemu

¹ Sioni imuka, imuka manzara, Yerusalemu, ekigo kitakatifu jwara emyendo yawe emirungi, aha rw'okuba tokitahwa banyamahanga abahagaire.

² Iwe Yerusalemu, ndore iwe, imuka oyeteratere omuchuuchu, oyekomerore enkomo omu ngoto, iwe Sioni, iwe ndore iwe.

³ Kuba Omukama nagamba ati, “Mukagurwa obuzira mpiha, na mbwenu nimwija kuchungurwa obuzira mpiha.”

⁴ Omukama Ruhanga wenene nashuba nagamba ati, “Orwo obubere mwabaire mufurukiire Misiri, mukaba mufurukiireyo buli bweyendezi bwanyu. Kyonkai Abaasiria bakabatwara rwamani, buzima kutali kugir'oti n'okubagura bakabagura.

⁵ Mbwenu ekintekire aha kiki, kubona eihanga lyange nitulitwara bati kushai kushai? Abatwazi banyu nibeshalingya; omushana gwona nibasiba nibangaya.

⁶ Nikyo eihanga lyange lilimanyira; kuba kir'ekyo tulimanya okwo ebi n'inye nabigamba; leba, n'inye nyenene.”

⁷ Garungi gatai aha mabanga, amaguru g'ogwo alikuleta amakuru garungi, alikutona abantu emilembe nabatona ebirungi! Natona abantu okwo balirokoka, nagambira Sioni ati, “Ruhanga wawe n'iwe Mukama.”

⁸ Hulira atulinzi bawe nibatungika amaraka, nibashemelerwa, nibahoya, kuba nibebonera bubona okwo Omukama yasinga akagaruka Sioni.

⁹ Mushemelerwe inywena nimuhoya, inywe matongo ga Yerusalemu; kuba Omukama yachungura Yerusalemu, yamaramara eihangalye.

¹⁰ Omukama yakoza obushoborabwe obutakatifu, omu maisho g'amahanga gona; kandi ensi yona erabona okwo Ruhanga waitu yaturokora.

¹¹ Mugende, mugende, muruge Babiloni, mutakwata aha kintu ekihagaire; inywe abashutwire ebikwato by'Omukama, mushohore Babiloni mweshemeze.

¹² Kuba timulirugamu nimwirukairuka, kandi timuligenda nk'atulikusingwa, kuba Omukama n'iwe alibebembera, Ruhanga wa Isiraeli n'iwe alibagenda enyuma natulinda.

Obushasi bw'omwiru

¹³ Omwiru wange eby'alikora biliramuuka, tulimukunisa, bamuhe ekitinwa, aliba muhango muno.

¹⁴ Abantu bangi tulimutangalira, kuba tulimuhutaza muno, taliho alimulenga muntu, titulimanya kwo ali muntu nka bandi.

¹⁵ Nikwo alitangaza amahanga gangi; abakama katulimubona tituligamba kigambo; kuba tulibona ekyo aliba batakagambirwaga bashobokerwe ekyo tuliba batakahuliraga.