Isaya 50 - Ebibulia 2001

¹ Omukama nabaza ati, “Kanatambize nyinainywe, nkamuha baruaki ey'okumutambya. Elihai? Anga n'ohai ayabaire nantonga kugira muti nkamubaguza? Okugya omu buzahe mukaturwa amafu ganyu. Na nyinainywe okutambibwa akazira entambara zanyu.

² Kubaki orwo naizire tinaboine muntu? Orwo nayesire ow'okunyetaba nk'atazokire? Tinkiina bushobora bwa kubachungura? Anga amani g'okubarokora nigo ntainago? Leba, kandikwatanguka, enyanja eyoma, emiiga liba irungu ly'omushenye, enfuru ezaba zili omu miga egyo ziburwa amaizi, zitwa eiliho, zinuka.

³ Ninshobora kwiraguza eiguru likashusha elyaferwa, oti nilichulira ayafa.”

Omuhuliro gw'omwiru w'Omukama

⁴ Omukama Ruhanga ampaire okugamba nk'omuntu ayegire, nshobore kugambira alemirwe, kumugumisa. Buli bwankya Omukama anyimukya, mutega amatwi nk'omwegesibwa.

⁵ Omukama Ruhanga anyigwire amatwi; kandi nanye tinamushenga anga kumuhwamu.

⁶ Abanteire nkabatega omugongo; banyurura omuleju nabatega n'emba. Bakanchwera banjangura, kyonkai tinayebunzire aha maisho.

⁷ Omukama Ruhanga n'iwe aba mujuni wange; niyo nshonga nchuleire ntekaine; aha maisho naguma nk'enkangabuye, mara nimanya okwo ntalishonara.

⁸ Andamulira ali haihi, n'ohai ow'okukwatangana nanye? Tutoijanyie! Omubisha wange n'ohai, angobe!

⁹ Leba, Omukama Ruhanga n'iwe aba mujuni wange; ow'okunkwata omushango ali nkahai? Bona abalikumpatiika balihwaho, tulishusha omwendo guliirwe enyenje.

¹⁰ Okwo muli n'ohai alikutina Omukama, akahulira n'ebyo omwiruwe alikugamba? Omuntu alikusigiilira eby'amazima akakora ebitalibyo, ayesige Omukama, ayekwate Ruhangawe.

¹¹ Leba, inywena nimuhemba omuliro, mwakize enkanzi! Omuliro ogwo mwahemba gubaakize mugende, mugende mukwete enkanzi ezo mwahemba! Omu bushobora bwange ndibabonabonyia. Mulifa kubi.