Isaya 5 - Ebibulia 2001

Oruhoya rw'endimiro y'emizabibu

¹ Kampoyere omugonzibwa wange oruhoya rw'engonzi aha ndimiroye y'emizabibu. Omugonzibwa wange akaba aina endimiro y'emizabibu, orushozi orwina einura lingi muno.

² Yalima orushozi orwo yarwihyamu amabare, yarubyaramu emizabibu emirungi muno. Omugati y'endimiro yayombekamu omunara gw'atulinzi, yagutamu eijungiro. Yagutegeleza kuraba ezabibu, kyonkai gwonene gwaraba ezabibukibira.

³ Mbwenu inywe bataka ba Yerusalemu na inywe bantu ba Yuda, nimbatagiliza mundamure inye n'endimiro yange y'emizabibu.

⁴ Halihoki ekishagireho eky'okukolera endimiro yange y'emizabibu, ekyo ntagikoleire? Orwo nagitegeleize kuraba ezabibu, kubaki yarabire ezabibukibira?

⁵ Mbwenu kankugambire ekyo ndikwija kukolera endimiro yange y'emizabibu. Ndagikamburaho orugo, endimiro egyo eyonwe. Eboma yayo ngiteme, endimiro egyo elibatilirwe.

⁶ Ngiite omwebuura, teligomolerwa anga kulimwa, emerwe orukwatango n'amahwa; nshube ntange n'ebichwi, enjura teligwa mu ndimiro egyo ya mizabibu.

⁷ Endimiro y'emizabibu y'Omukama w'amahe, nilyo ihanga lya Isiraeli nibo bantu ba Yuda, nibo mizabibuye emirungi. Akategeleza amazima, kandi leba, kwaba okwita abantu; yategeleza obugorogoki, kyonkai oraleba, kwaba okuchura.

⁸ Bagwerwa atulikwongera enju aha ndijo, endimiro nibagyongera aha ndimiro, ebintu bikalemwa bikaburwa obugyo, omu nsi mwaragirwa kuturamu inywenkai.

⁹ Omukama w'amahe akarahira nimpulira, ati, “Mazima amaju agangi galiba ndaara, amaju agahango ag'omulembe tigaliturwamu bantu.

¹⁰ Eheka ikumi z'endimiro y'emizabibu zilirugwamu elita munana z'edivai. Ekilo bikumi binai mwatanu z'embibo zilirugwamu ekilo ikumi.”

¹¹ Zabalya abaimuka omu rukyakya, bagiire kuhiga amarwa, nibarara nibanywa, nibatamira edivai!

¹² Tibaina kindi shana enanga n'eningili, akadiika n'omulere n'edivai aha mayaga gabo. Ebyo Omukama akora tibabyetaireho, titulikubibona.

¹³ Niyo nshonga bakatwarwa omu buzahe, aha rw'obuburwa magezi. Abakunirwa babo nibaitwa enjara, kandi embaga neitwa eiliho.

¹⁴ Aha rw'ekyo Sheoli amairu nigagiita, eyashamwire enshaya yazimarayo, abakunirwa ba Yerusalemu, embaga ya nyamutaba, nibasongoka bagiire omwo, abantu b'ekitinwa aba Yerusalemu n'akagonza ekigo ekyo.

¹⁵ Omuntu yainikire omutwe, abashaija bachwirwe eishaija, ab'eikuru enshoni zababunzire.

¹⁶ Kyonkai Omukama w'amahe nahaisilizibwa aha rw'amazimage, Ruhanga Omutakatifu, obutakatifubwe nabumanyisiza omu bugorogokibwe.

¹⁷ Aho obwana bw'entaama buralya nk'okwo buliira omu malisizo gabwo, enyana zigomokire n'obwana bw'embuzi biliire omu matongo.

¹⁸ Bakagwamu abakuruza entambara emiguha y'ebishuba, abakurura obufu okw'obona egali nibagikuruza emiguha,

¹⁹ abagamba bati, “Arahuke, ayanguhe omulimogwe tugubone. Omugendelero gwa Isiraeli gwije, gwije tugumanye!”

²⁰ Babona abakwata ekibi bakakyeta kirungi, ekirungi bakakyeta kibi; aha mwanya gw'omushana bataho mwilima, aha mwanya gw'omwilima bataho omushana, mtuli hali akashalira bataho akanura, mtuli hali akanura bataho akashalira!

²¹ Bagwerwa abebona okwo tuli bamanyi, bakemanya okwo tuli bagezi.

²² Zabalya abagira obumanzi bw'okunywa edivai, abamanzara kurunga amarwa.

²³ Balya rushwa bataishura alikukwatwa omushango, kandi nyakatetere ogwo bamwaka ehakiye.

²⁴ Aha rw'ekyo okwo endimi z'omuliro zirambaramba ekishagate, kandi okwo ebinyasi byomire bibutama omu muliro, nikwo omuzi gwabo gulijunda, n'orwakyo rwabo rulitumuuka nk'echuchu; aha rw'enshonga bakanga Amateka g'Omukama w'amahe, bagaya ekigambo ky'Omutakatifu wa Isiraeli.

²⁵ Nikyo Omukama yanigaliire abantube, akakoza obushoborabwe akabaita, amabanga gakatengeta, n'emitumbi yabo omu mbarabara z'ekigo yashusha omwejuno. N'orwo bili biti ekinigakye tikikachuleire, n'omukonogwe akyagwimukize kubabonabonyia.

²⁶ Eihanga elili harai aliliteraho akamanyiso, alitelere omutuliza alyete kuruga aha ndekelero y'ensi, mara aho n'aho liliija lirukire akalitango.

²⁷ Omw'ihanga elyo taliho alikulemwa anga kusitara, taliho alikusomba anga kunagira, taliho alikukomorogoka mutindikiro, anga nkaito kugutuka rukoba.

²⁸ Emyambi yabo eina obwogi, amata gabo gona galegire. Ebinono by'efarasi zabo nibishusha enyondobare, n'entaro z'amagali gabo nizishusha akazimu.

²⁹ Nibasinda bundi ntare, nibasinda nk'ebyana by'entare; nibaruruma nibakwata obwite, obwite babutwaliire kimoi, ow'okubunyaguruza taliho.

³⁰ Kir'ekyo tuliruruma tulibatiire obwite obwo, emirurumire yabo elishusha akahiliro k'enyanja. K'omuntu alinagira ensi amaisho, leba omwilima n'enaku; kandi ebichwi bilitanga omushana kujwa.