Isaya 49 - Ebibulia 2001

Isiraeli orumuli rw'amahanga

¹ Mumpulilize inywe nsi z'emyaro, mumpulilize inywe mahanga agali harai. Omukama akanyeta nkyali nda; akanduka n'eibara nkyali omu nda ya mawe.

² Akanshoboza kugamba ebilikushara nk'obwogi bw'embanda, yandinza obushoborabwe. Akampindura mwambi guhyoire, yansheleka omu kilimba kya wenene.

³ Yashuba yangambira ati, “Isiraeli oli mwiru wange, amahanga galimpaisiliza aha rw'enshonga yawe.”

⁴ Kyonkai inye nkagamba nti, “Nkozire muno byabura nshai; amani gange ngakolize gafa bushai; nawe kandi nyesiga Omukama, Ruhanga wange n'iwe alindongora.”

⁵ Omukama akandonda ntakazairwe; yandonka kuba mwiruwe kugarura eihangalye ahali wenene, kugarura Abaisiraeli abahweleire omw'ishwa. Omukama antungire ekitinwa; n'iwe ntabuko y'amani gange.

⁶ Omukama angambiire ati, “Mwiru wange, ndikukwasa omwoga ogushagireho. Abaisiraeli abashagireho olibabonesa eibara, kyonkai kandi ndikuhindura rumuli rw'amahanga, nirwo ensi yona elirokoka.”

⁷ Omukama, Omuchunguzi wa Isiraeli, Omutakatifu wa Yakobo, nagambira omwiru w'abakama, owo amahanga galikugayuruza gakanuga ati, “Abakama tulikubona bemelere, abatwazi tulikubona babandame, bahe Omukama omwesigwa ekitinwa, Omutakatifu wa Isiraeli ayakuronkire.”

Okugarulirwa kwa Yerusalemu

⁸ Omukama nagambira eihangalye ati, “Orwo obukiro bw'okubarokora buligoba, ndibagilira ekisha mbajune orwo mwikara nimuntakira. Nditulinda mbemere, nshube ndabe ahali inywe nkore endagano n'amahanga gona. Ndibagarura omu nsi yanyu esilikire kanya aka.

⁹ Nditaishura embohe; n'atuli omu mwilima mbete baije mtuli omushana guli! Balishusha entaama ezilikuliira aha bushozi;

¹⁰ tituligira njara rundi, anga iliho. Omushana n'eilimbe ly'omw'irungu tibilibashasa, kuba abagonza aliba abebembeire. Alibatwara aha nchuro z'amaizi.

¹¹ “Omu mabanga gange gona nditemamu omuhanda, na nyaihanda zange zibe ruranganwa.

¹² Abantu bange tuliruga harai, tuliruga bikara n'obugwaizoba, tuliruga n'omu nsi ya Sinimu mukono ogwa kasi.”

¹³ Iwe iguru oshemelerwe; oshanduke iwe nsi. Inywe mabanga mushanduke nimuhoya! Kuba Omukama yamaramara eihangalye; abashashe ba wenene naija kubagilira embabazi.

¹⁴ Kyonkai aba Sioni bagambaga eti, “Omukama atunagiraine, Omukama waitu atwebirwe.”

¹⁵ Nikyo Omukama alikuhorolera ati, “Omukazi yakwebwa omwanawe alikwonka, aburwe kugilira embabazi omwana owo ayezaliire?” N'orwo abakazi bakwebwa abaana babo, t'inye nakwebwa inywe.

¹⁶ Leba, Sioni nkakuhandika aha biganja byange, na eboma zawe nyikara nzilebire.

¹⁷ Atulikwija kukwombeka buhya tulibinga abakusilikize, abakwisire omwebuura bakurugemu bagende.

¹⁸ Inunura amaisho olebe embaju zona; abantu bawe bakugarukira nibagaruka omuka. Mazima okwo inye ndi Ruhanga asingire, abantu bawe olibebuga, okwo omugore ayebuga amabere ga wenene ag'eiguzi.

¹⁹ Ensi yawe ekafa omwebuura, yaba ndaara, kyonkai mbwenu atulikwija kugituramu telikwija kubamara. N'abakusilikize tulikugya harai muno.

²⁰ Abantu abazaliirwe omu buzahe tulikugambira bati, “Ensi egi telikutumara, otuhe ahandi mtuli turatura.”

²¹ Aho olyebaza oti, “Abantu aba bona bakazarwa nkahai? Kanafeleirwe abaana tinazaire bandi? Bakantwara omu buzahe mbwenu abantu aba bakazarwa bahai? Inye nkasigara nyenkai; mbwenusi abantu aba barugirehai?”

²² Omukama Ruhanga nagamba ati, “Ninyija kuha amahanga akabonero, amahanga ago galileta batabani bawe gabashutulire omu kifuba, bahara bawe babalete aha mabega.

²³ Abakama tulibabera baisheinywe, n'abakamakazi tulibabera banyinainywe babonkye. Balibafukamira balebire ahansi, babarambe n'echuchu aha maguru. Nirwo mulimanya okwo n'inye Mukama, abanshuubira titulishonara.”

²⁴ Wakwaka omwisherukare eminyago? Isi entwagu wakugyaka endore zayo?

²⁵ Ego, Omukama nahorora ati, “Nangu n'omwisherukare tulimwaka endore ezo yakwata, n'ab'entwagu yanyaga tulibagihya omu mikono, kuba ababarashanisa ndirashana nabo, ndokore abaana bawe.

²⁶ Abakubonesa enaku tuliitangana balyangane; omuntu atamiire obwamba bwa mutahiwe nk'ayatamiira edivai. Aho abantu bona balimanya okwo n'inye Mukama Omurokozi wanyu, Omuchunguzi wanyu Omushobora wa Yakobo.”