Isaya 48 - Ebibulia 2001

Ruhanga Mukama w'amakiro agalikwija

¹ Hulira ekigambo eki ihanga lya Yakobo, inywe abetelerwa aha ibara lya Isiraeli; hulira inywe baijukuru ba Yuda. Munahira obuso bw'Omukama, mwebuga Ruhanga wa Isiraeli, kyonkai ebyo mugamba tibyo mukora.

² Mwebuga okwo muli bazarwa b'ekigo kitakatifu, mugamba okwo mwesiga Ruhanga wa Isiraeli, ayetwa Omukama w'amahe.

³ “Ebirabaireho nkaba mbigambire karai aka karai, nkabigamba inye nyenene nabimanyisa omu bantu, mara byaija byabaho kibandagara: Nkabikorakwo!

⁴ Nimbamanya inywe okwo mutalikugambirwa, nimugumangana emitima nk'ekyoma, emitwe mwina ey'omulinga.

⁵ Ebigambo ebi nkabibagambira bugambira kwema karai bitakabaireho, omuntu ataija ahanyuma akagira ati, ‘Bikakorwa ekihuuku kyange, ekishushani kyange ekibaijano anga ekiheshano nikyo kyabihangire bikabaho.’ ”

⁶ “Otura obihulira, mbwenu obilebe byona: N'aha tolikubikiliza? Kuruga kanya aka ndata kukugambira ebihya byonkai, ebishelekire eby'otamanya.

⁷ Bibaireho juba, ti bya irai: Kulemwa kugoba mambwenu obaire otakabihuliraga; otakugamba oti, ‘Mbaire nimbimanya.’

⁸ Kwema akarai kona toina ky'orahuliire, togira ky'omanya, okaigara amatwi. Namanyaga okwo otaliba mwesigwa n'akake, n'okwo oliba mushengi kushagulirana kwema kuzarwa.

⁹ “Nyetanga ekiniga kulinda ekitinwa kyange. Tinigara kukubonabonyia nkakuchwa omu nsi nirwo abantu tulinsingiza.

¹⁰ Leba, nkujugusire nawe tinkujugusire nka feza; nkubonesize enaku ezilikushusha etanuru y'omuliro nakulenga.

¹¹ Ebyo nimbikora aha rw'ekitinwa kyange, aha rw'ekitinwa kyange kyonkai; tinakukunda kukunukuruzibwa; taliho ondijo asaine kuhabwa kitinwa ekili kyange inye nyenkai.”

¹² “Mpuliliza iwe Yakobo, iwe Isiraeli ompulilize, nkakweta! N'inye Nyakubaho, ndi wa mbere, ndi wa nzindo.

¹³ Ensi ekatondwa inye nyenene, n'eiguru likatondwa omu bushobora bwange. Kanyeta ensi eija, kanyeta eiguru lija.”

¹⁴ “Muhurure inywena, muhulire! Ni ruhangaki arabagambiire ebigambo ebi? Endonkwa egyo Omukama nagigonza. Endonkwa egyo Omukama agitaireho kutatulira Babiloni, atere Abakalidayo.

¹⁵ N'inye nagambire mara nkamweta. Mulesire, mara ebyo arakora byona biragenduka.

¹⁶ Mungobe muhulire ekigambo eki: Kwema obutwe ngamba akature, amakiro gatakabaireho inye mbaho. (Mbwenu Omukama Ruhanga antumire, na Mwoyowe anyemiremu.)

¹⁷ Omukama, Omuchunguzi wawe, Omutakatifu wa Isiraeli, nagamba ati, N'inye Omukama Ruhanga wawe, alikukwegesa eby'omugasho, n'inye ndikukwoleka mtuli olikuragirwa kuraba.

¹⁸ Isi noobe wahuliire emihango yange! Manya wakugizire emilembe elikushusha omwiga ogutayoma; wakubaire mugorogoki ogira amani nk'amayengo g'enyanja.

¹⁹ Oruzaro rwawe rwakushusire omushenye, na baijukuru bawe bakushusire omushenye ogwo baseire. Mara tibakuchwekire, nanye tinakubasilikize.

²⁰ Muruge Babiloni musingwe, muruge Kalidea, mutere empundwi nimugamba amakuru aga, mugamanyise ensi yona; mugambe muti, ‘Omukama yasinga yachungura Yakobo omwiruwe.’

²¹ Orwo Omukama yarabyaga eihangalye omu marungu, tibagiraga iliho: Akabaha amaizi galikugera nigaruga omu rwazi; akagaarura orwazi rwafumukwamu amaizi.

²² Kyonkai Omukama nagamba ati, ‘Abafakare tibaina milembe.’ ”