Isaya 47 - Ebibulia 2001

Eiramu lya Babiloni

¹ Iwe Babiloni, oruge aha nketo oshuntame omw'itaka. Enketo ogirugeho iwe Babiloni ekigo ky'Abakalidayo. Eby'okugyaho okechuma okagoijagira byahwa.

² Ojure ekihundwi aha mutwe, ohigikilire orubengo ose oburo. Ojure egauni, n'amaguru ogashemburure, orabe omu mwiga ohwage amaizi.

³ Osigare rutondore, bakubone enjuro. Kandi ninkwehoroza, tindikusigaho muntu.

⁴ Omuchunguzi waitu eibaralye aba Mukama w'amahe, n'iwe aba Mutakatifu wa Isiraeli.

⁵ Oshuntame omu mwilima mara oyesize, iwe Babiloni. Aha rw'okuba tibakikweta mukama wa mahanga.

⁶ Nkanigalira eihanga lyange, nababona nk'abatakili bange; nabakunaga omu mikono kyonkai tiwabaganyiire. Abagurusi abo okababonesa enaku ezitali za kugambwa.

⁷ Ebi ebyo wakoraga tiwabitekagaho mutima anga kwijuka okwo biligira ndekelero; watekelezaga kwikara oli mukama ebiro byona.

⁸ Mbwenu aha rw'ekyo, iwe mufakare agoijagira, otekeleze ekigambo eki iwe atakeleza oti, “Inye n'inyemalira, ow'okunshaga taliho; tindiferwa ibanye, kandi tindiferwa baana.”

⁹ Ebigambo ebi byombili nibija kukubaho omu kanya kamoi, omushana gumoi: Oferwe abaana na baro eizoba likuzobagilire, olikaba omanya otai kuzinga n'okuroga!

¹⁰ Okufakara wakwebugaga okwese: “Taliho alikumbona.” Amagezi gawe n'obumanyi bwawe byakunaga, watekeleza oti, “Inye n'inyemalira, ow'okunshaga taliho.”

¹¹ Kyonkai enaku nizija kukutera; olikaba ozinga orazinga bibure nshai. Enaku zirakutera kibandagara otazetegeire.

¹² Gendelera kuzinga n'okuroga nk'okwo wakamanyiire kwema oli musigazi, rundi wakwihyamu akabu otinisa ababisha bawe.

¹³ Bakutegekeire bingi byakubumbulikya. Atulikukutegekera katulebe nka barakurokora! Abo abamanya kuleba enyanyinyi n'emishusire y'eiguru, abaabona okwezi kwayema bakagamba ebirabaho.

¹⁴ Nibashusha ebishagate ebyokibwa omuliro. Tibyakwehungya aha muliro gutabyokya. Taliho rwo birugwamu makara muntu akota muliro anga muliro gwonene kuba nigwo ayota!

¹⁵ N'ab'otura nofafalikana nabo nibashusha ebishagate ebyo, ab'otura noyehuuba nabo kwema muli basigazi. Bona bayemalire emihanda ow'okukurokora taliho.