Isaya 45 - Ebibulia 2001

Omukama naronda Koreshi

¹ Omukama akozire Koreshi amajuta! Amutaireho kutera amahanga; yamutuma kwihya abakama aha ngoma. Ebihigi by'ebigo Omukama naija kubimukingulira. Omukama wenene nagambira Koreshi ati,

² Ndakwebembera, nsanisilize amabanga, enyigi z'omulinga nzase, n'emihingo y'ebyoma ngiteme;

³ nkuhe eitunga elishelekiire omu mwilima, eitunga elitalikumanyika; nirwo oramanya okwo Omukama aba inye; Ruhanga wa Isiraeli akwesire akakwatura eibara.

⁴ Nkwesire nakwatura eibara, nakuruka eibara lya kabili n'orwo otalikummanya, aha rw'omwiru wange Yakobo, Isiraeli endonkwa yange.

⁵ Omukama aba inye, ondijo taliho; inye nyenkai n'inye Ruhanga, taliho ondijo. Akuha amani aba inye, n'orwo otalikummanya;

⁶ kwema oburugaizoba n'obugwaizoba, bamanye okwo Omukama aba inye, tabayo ondijo.

⁷ Omushana n'omwilima n'inye mbitonda, emilembe n'enaku biruga ahali inye. Omukama n'inye akora ebyo byona.

⁸ Omurokozi aliruga omw'iguru nk'enjura, aletere ensi emilembe, agire obwegeleere n'amazima, eshemere; ebyo byona biliruga ahali inye Omukama.

Omukama w'amakiro, Omutonzi

⁹ Zamulya ogwo asimtulira Omutonziwe, ekikwato ky'eibumba kusimtulira ayakibumbire. Eibumba liratulize alikulikaata liti, “Nokoraki?”

¹⁰ Yagwerwa abaza ishe ati, “Okanzaliraki?” Anga kubaza nyina ati, “Norumwa kuzaraki?”

¹¹ Omukama, Omutakatifu wa Isiraeli, ayamutonzire, wenene ogwo, Ruhanga ategeka eby'omu maisho nagamba ati, “Iwe toina kumbaza aha bikwete baana bange, anga kungambira byo ndakora!

¹² Ensi n'inye nagitonzire, nashuba natonda abantu kugituramu. Eiguru lyona nkalitonda omu bushobora bwange, nshuba ngelera eizoba, okwezi n'enyanyinyi.

¹³ Inye nyenene n'inye ntairemu Koreshi amani g'okukora ebili by'obugorogoki. Kandi byona ebyo arakora ndabigoshora, ekigo kyange kya Yerusalemu arakyombeka buhya, n'eihanga lyange elili omu buzahe alitaishure. Taliho muntu amwinikire kukora omulimo ogwo anga kumuha rushwa. Inye Omukama w'amahe n'inye ndikugamba.”

¹⁴ Omukama nagambira Isiraeli ati, “Eitunga lya Misiri na Etiopia liliba lyawe, n'abashaija ba Seba ebishoka, tuliba bairu bawe, tulikuruga enyuma tuli omu mpingo, bakufukamire nibagamba bati, ‘Ruhanga akulimu, mara n'iwe Ruhanga wenkai.’ ”

¹⁵ Waitu Ruhanga wa Isiraeli, Omurokozi, mazima oba Ruhanga ataboneka.

¹⁶ Bona abakora ebishushani baliitwa enshoni, bashoberwe, bona babumbulikwe.

¹⁷ Kyonkai Abaisiraeli Omukama alibarokora, alibarokora eirai lyona; eirai lyona timulishonara anga kushoberwa.

¹⁸ Omukama akatonda eiguru, n'iwe aba Ruhanga! N'ensi n'iwe yagitonzire, akagigumisa yarama. Tiyagitonzire lili ishwa, akagitonda k'eturwamu abantu. Niwe alikugamba ati, “N'inye Mukama taliho ondijo.

¹⁹ Tinkagambiraga mu kyama anga kusheleka ebyo ndikwija kukora. Tinkagambiraga Baisiraeli kumpiiga mw'ishwa. N'inye Mukama, mara ngamba amazima; ebilikwo nibyo ndikubamanyisa.”

Omukama w'ensi yona, n'ebihuuku bya Babiloni

²⁰ Omukama nagamba ati, “Muhurure inywe mahanga, inywe abahonokire orwo engoma ekambukire; mwije muramurwe! Inywe bantu atulikutera enjuru mugiire aha bihuuku by'emiti, kushaba aha bihuuku ebitaina kubarokora.

²¹ Murugeyo mwetonganire omw'iramuliro, nimutoijerwa, mbwenu mutegeke okwo murahorora. Ni ruhangaki ayagambiire karai ebilibaho? Ti'inye Omukama? Kandi ruhanga ondijo atali inye taliho, Ruhanga omugorogoki mara Omurokozi aba inye. K'atali inye, ondijo taliho.

²² Inywe bantu b'ensi yona, mwije ahali inye mbarokore! Aha rw'okuba Ruhanga aba inye ondijo taliho.

²³ Inye ndagana ekilikwo, mara tindihindura. Okwo nyemire nikwo ndikurahira: Buli muntu alija anfukamire, andaganise okuba mwesigwa ahali inye.

²⁴ Baligamba bati, Omukama wenkai n'iwe agira obugorogoki n'amani. Abamunobaga bona tulimugarukaho mara bashonare.

²⁵ Omukama wenene alirokora baijukuru ba Yakobo, mara balimusiima.”