Isaya 44 - Ebibulia 2001

Omukama n'iwe Ruhanga wenkai

¹ Mbwenu hulira, iwe Yakobo omwiru wange. Hulira iwe Isiraeli owo naronkire.

² Ebi nibyo Omukama alikugamba, ayakutonzire akakubumba omu nda ya nyoko, mara omujuni wawe, ati, “Mwiru wange Yakobo, otatina, otatina iwe ndonkwa yange.

³ Kuba ndigwisa enjura omu nsi eyomangaine, ensi eyomangaine etabukwemu emigera, baijukuru bawe ndibaijuza Mwoyo wange, oruzaro rwawe ndiruha omugisha.

⁴ Balimera nk'obunyasi bw'aha mugera, tulishusha omunyansano ogumezire aha maizi.

⁵ Omoi aligira ati, ‘Inye mba wa Mukama,’ n'ondijo alyeyetelera ahali Yakobo, ondijo ayehandike aha kiganja ati, ‘Inye mba wa Mukama.’ Ashube ayeyetelere ahali Isiraeli.”

⁶ Omukama, Omukama wa Isiraeli, Omukama w'amahe, Omuchunguzi wa Yakobo nagamba ati, “N'inye wa mbere kandi wa nzindo, taliho ruhanga ondijo shana inye.

⁷ N'ohai alikunshusha? Agambe, ayature, angambiire. N'ohai arabaasire kwema karai ebilibaho? Nibatugambire ebilikwija kubaho!

⁸ Mutatina, mara mutahahanwa mitima! Tinkabagambiraga kwema karai? Mara inywe timuli bajulizi bange? Ruhanga ondijo atali inye abayo? Rwazi tabayo; tinyinayo wena wena owo ndikumanya.”

Okufukamira ebihuuku bigiro bya katozi

⁹ Bona abakora ebihuuku tibaina mugasho. N'ebihuuku byonene ebyo ebilikubashemelera tibina nshonga. Atulikubifukamira titulikubibona, titulikumanya kantu, kandi ahanyuma tulitwa enshoni.

¹⁰ Omuntu kubaija ekishushani kya ruhanga anga kukihesha naba akozire ekintu ekitaina mugasho.

¹¹ Batahibe bona tulikwatwa enshoni, kuba ababuya babyo bantu nyabuntu. Ka bona bakwija bakemelera aho, oija obona okwo obutini butuli kubi, enshoni ziraliire kubaita.

¹² Omuhesi akihesha akijuguta omu muliro. Akiteza enyondo, akikondeka n'ebyara; enjara emuruma, alemwa, amaizi g'okunywa tagabona, arambabara.

¹³ Omuselemara akipimisa epimafuti, akirabyaho ekalamu. Akitera eranda, akirabyaho ekompasi; akibaija kishusha omuntu, akilengya bundi muntu, kiba ky'okutura omu nju.

¹⁴ Atema emielezi, anga arondamu omuzo anga omwaloni omu kibira aguleka gukura gugira amani, abyara n'omwelezi gunywa amaizi g'enjura.

¹⁵ Ahanyuma omuntu agushenya enkwi, ayota, achumba omukate, ashuba agubaijamu ekihuuku akifukamira, akibaijamu ekishushani akifukamira.

¹⁶ Ekichweka ky'omuti akihemba; ekindi akyokesa enyama agilya agihaga; kandi omuliro ogwo ashuba agwota nagira ati, “Otyo! Natagatirwa wewe, embeho yampwamu!”

¹⁷ Ahanyuma ekichweka ekyasigaraho akibaijamu ekishushani akyeta ruhangawe, mara ekyo kishushani ekibaijano kushai, akifukamira, akishaba ati, “Nkiza, ahakuba oba ruhanga wange.”

¹⁸ Tibaina kyobalikumanya kandi tibagira kyobashobokerwa, aha rw'okuba Ruhanga akabaigara amaisho, titulikushobora kubona, yabahumya n'amagezi, tibaina kushobokerwa.

¹⁹ Taliho muntu alikutekeleza, taliho alikumanya anga kushobokerwa, akagira ati, “Ekichweka ky'omuti nkihembire, amakara nagokesa omukate, nagokesa n'enyama nagilya, mbwenu ekisigaireho nkibaijemu ekihuuku, mbandamire ekichweka ky'omuti nkifukamire?”

²⁰ Omuntu nk'ogwo alya eijwi, amagezi gafire gamunaga; talikushobora kwerokora handiki kugir'ati, “Ekyo nkwete omu mukono gwa bulyo kintu kushai kili aho!”

Omukama Omutonzi mara Omurokozi

²¹ Iwe Yakobo, oijuke ebigambo ebi. Iwe Isiraeli, ijuka okwo oba mwiru wange. Nkakutonda, oba mwiru wange; Isiraeli tindikwebwa.

²² Nkugaruliire entambara zawe zakuhwaho nk'ekichwi, amafu gawe gakuhwaho okw'obona oruho. Ongarukeho aha rw'okuba nkakuchungura.

²³ Iwe iguru, oshemelerwe oshanduke, na iwe nsi okuzimu oshanduke; inywe mabanga muhoye, na inywe bibira n'emiti ebilimu. Kuba eki kikakorwa Omukama orwo yachungwire Yakobo, mara arahaisilizibwaga omuli Isiraeli.

²⁴ Omukama omuchunguzi wanyu, ayabatonzire kwema omu kubakwa enda, nagamba ati, “N'inye Mukama ayatonzire ebintu byona, eiguru lyona n'inye nyenkai ayalitonzire, n'ensi yona ekatondwa inye. N'ohai owo nabaire nyemire nawe?

²⁵ Ebyo embandwa ziragura mbisheshamu amaizi, n'ebyo ababuya b'enyanyinyi bagamba nzora okwo bitainamu kabu. Abamanyi bagamba mtulibisa Obwo baba nibeta bumanyi nzora okwo buli bufera.

²⁶ Kyonkai omwiru wange k'agira ekyo yaranga, nkatuma entumwa yange kugamba ebyo ndikwija kukora, ebyo bagamba byona mbigobesheleza. Ngambira Yerusalemu okwo abantu tulishuba bakatura omu kigo ekyo, n'ebigo bya Yuda mbigambira okwo bilyombekwa buhya. Ebigo ebyo biliruga omu matongo.

²⁷ Ngamba kimoi enyanja eyoma, n'emiiga elikutahamu kwakwo.

²⁸ Ngamba okwo Koreshi aliba mushumba wange, aligobesheleza byona ebyo ndikwenda; aliragira Yerusalemu k'eyombekwa buhya, na Rwensinga ekombekwa omusingi.”