Isaya 43 - Ebibulia 2001

Ruhanga naragana kurokora eihangalye

¹ Isiraeli, Omukama ayakutonzire nagamba ati, “Otatina, ndakurokora. Nkakwetelera aha ibara lyange, oba wange.

² Orwo orabaga noraba omu nyanja, turabaga tuli hamoi, kandi n'orwo oliba noraba omu miiga telikutwara. K'oliraba omu muliro tolihya. N'endimi zagwo tizilikwokya.

³ Kuba inye n'inye Mukama Ruhanga wawe, n'inye Omutakatifu wa Isiraeli, Omurokozi. Misiri niyo eraba kitambo ky'okukuchungura, Etiopia kwakwo na Seba ebulimu.

⁴ Oba w'eiguzi lingi ahali inye, oli mukunirwa mara ninkugonza. Amahanga gona galiba bitambo by'okukurokora.

⁵ Otatina, kuba tuli hamoi, abaana bawe ndabaihya oburugaizoba n'obugwaizoba, mbagarure mbateke hamoi.

⁶ Ndaragira bikara ebataishure, na kasi ngigambire etabatanga. Abantu bange baruge omu nsi ezili harai, buli hantu omu nsi barugeyo.

⁷ Baba bantu bange nyabwange, nkabatonda kabampa ekitinwa.”

Isiraeli omujulizi w'Omukama

⁸ Ruhanga nagamba ati, “Mwete abantu bange omw'iramuliro. Amaisho bainago kyonkai bahumire. Baina amatwi kyonkai titulikuhulira.

⁹ Mwete amahanga garamurwe. Ni ruhangaki omunyamahanga ayakubaasha ebilija? Ni ruhangaki omunyamahanga ayabaasire ebilikubaho mwaha? Baruhanga aba bagambe tumanye okwo tulikugamba amazima, ebyo tulikugamba bimanyike okwo bilikwo.”

¹⁰ Omukama nagamba ati, “Inywe Baisiraeli muli bajulizi bange, nkabaronka kamuba bairu bange, mukamanya mara mukanyesiga, mara mukashobokerwa okwo inye nyenkai niinye Ruhanga. Atali inye taliho Ruhanga ondijo; takabagaho mara talibaho.

¹¹ Inye niinye Mukama. Atali inye Omurokozi taliho.

¹² Ebilibaho nkabigamba karai, nashuba naija kubajuna. Taliho ruhanga omunyamahanga arakozire atyo, inywe muli bajulizi bange.

¹³ Inye ndi Ruhanga, mara ndikara ntyo, kandi taliho yakunyihya kintu mu mikono; n'ohai ayakuntanga kukora ekyo nyenzire?”

¹⁴ Omukama Omuchunguzi wanyu, Omutakatifu wa Isiraeli, nagamba ati, “Ndasindika eihe litatulire Babiloni mbone kubarokora; emihingo yona ngihende, Abakalidayo barachura kushai, baraba batakizina.

¹⁵ Omukama n'inye, Omutakatifu wanyu, n'inye Omutonzi wa Isiraeli, Omukama wanyu.”

¹⁶ Eirai muno Omukama akatema omuhanda omu nyanja, yagutema omu maizi galikuhinda.

¹⁷ Akashohoza amagali n'efarasi, yashohoza eihe n'abaisherukare, orwo bagwerangaine tibaimukire, bakarara nk'orutambi.

¹⁸ Ebyahingwire mutabijuka, ebya karai muleke kubyetaho.

¹⁹ Muraleba ekihya ekyo naija kukora; nangu kyabaireho, timulikukibona? Ndatema omuhanda omw'irungu, n'emiiga omw'irungu.

²⁰ Ebikaaka birampa ekitinwa, n'emiha n'enyonjo kutyo, aha rw'okuleta amaizi omw'irungu, n'emiiga omw'irungu, kunyoisa eihanga lyange elironkwa.

²¹ Eihanga elyo natonzire kuba lyange, kwija bakampaisa ekitinwa.

Obufu bwa Isiraeli

²² Kyonkai iwe Yakobo tiwantakiire, iwe Isiraeli okansindwa!

²³ Tiwandeteire ntaama zawe, kuzintambira bihongo bya kwokibwa, tontambiire bitambo kumpa kitinwa. Tinkulemesize na kukwenza bihongo, nangu n'obunuma obulikunukage, chei!

²⁴ Tokanguliraga bunuma, anga kuntambira bishaju bya bitunganwa byawe nkabihaga. Shana iwe n'iwe onfakaliire okandemesa; wanfakalira wangobya aha kanya.

²⁵ Kyonkai n'orwo kili kityo, inye n'inye Ruhanga akugarulira, mara eki ninkikora aha rw'okuba nikwo ndi; amafu gawe tindigaijuka.

²⁶ Onyijukye, tuhororane, otoije, bakuramure osinge.

²⁷ Shwenkuru owa mbere na mbere akafakara, n'abakuteleraga omushango nabo bakanfakalira.

²⁸ Nangu n'abatwazi bawe bakahagaza ahatakatifu hange, manyasi nikyo nasilikiize Yakobo, Isiraeli namukwasa enshoni bamushekelera.