Isaya 42 - Ebibulia 2001

Omwiru w'Omukama

¹ Leba omwiru wange owo ndamira, endonkwa yange, enganzi yange. Ogu n'iwe nshemelerwa, mwijuze Mwoyo wange, n'iwe alimanyisa amahanga gona amazima.

² Talitaka kandi talyomba. Eirakalye tililihulirwa mu kigo.

³ Orubingo oruhutaire taliruhenda, anga orutambi orulikwaka ekisiliira taliruraaza, shana aliba mwesigwa akore eby'amazima.

⁴ Talilemwa anga kwenanukwa, kuhika orwo alibona amazima n'obugorogoki byaba omu nsi; n'ensi ezili harai buseli bw'enyanja zikegomba k'azegesa.

⁵ Ruhanga Omukama, ayatonzire eiguru akalishanshurura, ayatanturwire ensi akatonda n'ebikagilimu, n'abantu bamwo akabatunga oburora n'amani, nagamba ati,

⁶ “Inye Omukama nkakweta k'oba mugorogoki, nakujuna mara nakulinda; nakutaho k'oba ndagano y'amahanga, mara mushana gw'enganda;

⁷ ohumurure empume, n'abafungiirwe omu mwilima obataishure.

⁸ Ndi Mukama, nilyo ibara lyange, ekitinwa kyange tindikunda kabakiha ruhanga ondijo, kandi ebihuuku titulibihaisiliza, shana inye nyenkai.

⁹ Ebyo nagambire obubere byabaho, mbwenu nimbagambira ebihya, mbibamanyise bitakabonekire.”

¹⁰ Muhoyere Omukama oruhoya oruhya; ahaisilizibwe omu nsi zona. Enyanja ehilire na byona ebigilimu, n'ensi z'emyaro n'abakazituramu bona.

¹¹ Eirungu n'ebigo byamwo bisingize Ruhanga, n'abatura Kedari bamuhaisilize. Abataka ba Sela bahoye n'ebyera, bashanduke bemire aha mabanga eiguru.

¹² Bahe Omukama ekitinwa, bamuhaisilize omu nsi z'emyaro.

¹³ Omukama natabara nk'emanzi, nabumbuura nk'omurashani. Nayeshanda, nayebuga, nakoleeza ababishabe.

Ruhanga naragana kujuna eihangalye

¹⁴ Ntuura nyegumisiliize eibanga lirai, nayesiza nanena elino. Kyonkai mbwenu naija kutaga nk'omukazi alikurumwa, ntake, nshemeeke.

¹⁵ Nsilikye amabanga n'enshozi, ebimera byamwo mbyomese. Emiiga ngihindure bizinga, n'ebitunga mbyomese.

¹⁶ Abaigazi b'amaisho ndabarabya omu muhanda ogwo batalikumanya; mbebembere omu buhanda obwo batalikumanya. Omwilima ogwo baturamu nguchwe, habeho omushana, n'ensi eyemire kubi ngitebekanise. Ebi nibyo ndikwija kukora, tindikwija kubileka.

¹⁷ Abesiga ebishushani ebibaijano, ndababinga enshoni zibaburabuze, abo abagambira ebishushani ebiheshano bati, “Muli baruhanga baitu.”

¹⁸ Hulira inywe abafi b'amatwi, burura mubone, inywe mpume!

¹⁹ Haliho aigaire amaisho nk'omwiru wange? Isi haliho omwigazi w'amatwi nk'entumwa yange? N'ohai ahumire amaisho nk'endonkwa yange, anga nk'omwiru w'Omukama?

²⁰ Isiraeli eby'oraboine biba bingi, kyonkai bikutambaki? Amatwi g'okuhulira ogagira, kyonkai orahuliireki?

²¹ Aha rw'okuba Omukama aba mugorogoki, akakuza Amatekage yagaha ekitinwa.

²² Kyonkai eli ihanga elinyagirwe, bona bakwatiire omu mishoina, bashelekirwe omuli jela. Bahindukire bwite ataliho wa kubarokora, bahinduka minyago ataina wa kubanyaguruza.

²³ N'ohai omuli inywe arakunda kuhulira ekigambo eki? Nimushobora kuhulira n'obwegendeleza kwema mwaha?

²⁴ N'ohai ayanagire Yakobo omu mikono y'abanyagi? Isi Isiraeli omu mikono y'abashuga? Ti Mukama owo twafakaliire, owo bayangire kukolera ebyo ayenda, bakanga kuhulira Amatekage?

²⁵ Kityo akatunigalira yatubonabonyia kubi, yatusindikira endashana. Akanigalira Isiraeli yona yagibubuura nk'omuliro, ebyo Isiraeli tiyabyetaireho, taliho kyoyayegiremu.