Isaya 40 - Ebibulia 2001

Ebigambo by'eshuubi

¹ Ruhanga wanyu nagamba ati, Eihanga lyange mulimaramare, mulimaramare.

² Atuli Yerusalemu mubagaruremu akoyo. Mugambire okwo bashasire omwanya gurai, mbwenu bagarulirwa amafu gabo. Mbaire mbabonabonyize geigeigei aha rw'amafu gabo.

³ Hulira eiraka lihango niligamba liti, “Omukama mumutekatekere omuhanda omw'irungu, Ruhanga waitu mumusheleze oburabo!

⁴ Buli ruhanga murutabire, kandi amabanga mugateme mugaseleeze, n'enshozi kwakwo. Ahataiganiraine haiganirane, ahali habi muhaseleeze.

⁵ Nirwo ekitinwa ky'Omukama kiliboneka, abantu bona balimubona omu kitinwakye; kuba Omukama wenene n'iwe ayegambire atyo.”

⁶ Eiraka likangambira liti, “Ogambe muno.” Inye nti, “Kihai ekyo ndagamba muno?” Eiraka linshubamu liti, “Ogambe muno okwo abantu bona tulikushusha obunyasi, n'oburungi bwabo bwona nibushusha orwakyo rw'ebikamba.

⁷ Obunyasi bwoma, orwakyo ruhotoka, orwo Omukama asindika omuyaga gukabihuta. Mazima abantu nabo tibarama, nibashusha obunyasi.

⁸ Obunyasi bwoma, orwakyo ruhotoka, nawe ekigambo kya Ruhanga waitu, kirama eirai lyona.”

⁹ Iwe Yerusalemu, ogye aha ibanga eiguru otone abantu amakuru garungi. Iwe Sioni otungike eiraka, otone abantu amakuru garungi! Ogambe muno mara otatina, ogambire ebigo bya Yuda oti, “Leba Ruhanga wanyu yaija.”

¹⁰ Ruhanga Omukama w'ekitinwa yaija, omutwazi omushobora, n'abo yachungwire yabaleta.

¹¹ Obuhyobwe bw'entaama arabulisa okwo omushumba agira, obwana bwazo abushombokeze hamoi, mara abutore omu mikonoye; n'emihagazi agihabure kurungi.

¹² N'ohai aramaliire amaizi g'enyanja omu kiganja, anga eiguru lyona kulipimisa ekiganja ekyo? Haliho ayakukwata eitaka lyona ly'ensi akalimalira omu kikompe, anga akakwata amabanga n'obushozi akabipima aha munzani?

¹³ Ow'okuhanulira Omukama eky'arakora aliho? Isi n'ohai ayakumwegesa anga akamutegekera?

¹⁴ N'ohai owo Ruhanga arayehanwizeho kubona kugira ekyo yamanya anga kushobokerwa okwo aratwaza ebintu?

¹⁵ Ahali Ruhanga amahanga nigashusha eitonyia ly'amaizi lirugire aha ndoo; gali nk'oruchuchu aha munzani; ebizinga byona wenene nabishushanisa eitaka kushai.

¹⁶ Ebigunju byona omu bibira bya Lebanoni, tibilikumara kutambwa kitambo kimoi kya kwokibwa, n'emiti yamwo telikumara kuhembwa muliro.

¹⁷ Ahali wenene amahanga gona tigainamu kantu, nagabona nk'agataliho.

¹⁸ Ruhanga mwakumushushanisa ohai, anga mwakumulenga kintuki?

¹⁹ Mumushushanise ekihuuku? Manya ekyo kikakorwa omuntu! Omuhesi w'ezahabu akisiiga ezahabu, ashuba akiheshera emikofu y'efeza.

²⁰ Omuntu omunaku, arondaho ekiti ekyo abona tikijunde. Aho ahiga omubuya, amubaiziramu ekishushani ekitakumbe, aba nikyo ahonga.

²¹ Isi timulikumanya? Anga timukahuliraga? Kwema akarai kona tibakabagambiraga? Kuruga ensi etonzirwe timukashobokerwaga?

²² Ekatondwa olinya asingiire aha nketo omu rwerwerwe; abantu atuli omu nsi abona nibashusha obusisi. Eiguru akalishanshurura nk'epazia, yalikora nk'eihema ly'okuturamu.

²³ Abatwazi b'amani abafutika, abakama b'ensi abamara eijegu, balebera.

²⁴ Nibashushana amamera, baganyukulira gatakagizire mizi. Omukama k'asindika omuyaga, niho honkai goma, omuyaga gugaharaza nk'ebinyasi.

²⁵ Inye nimundeng'ohai? Habayo omuntu wena wena anshusha? Inye Omutakatifu nimbaza.

²⁶ Raramira eiguru! Enyanyinyi ez'olikubona zikatondwa ohai? Ni Ruhanga azitwara okwo batwara eihe, nazimanya orubara, buli emoi agyeta eibara! Obushobora agira bungi, taliho nyanyinyi emubura aha maisho.

²⁷ Iwe Yakobo, ningira iwe Isiraeli, kubaki noyeboroboita ngu Omukama yakunagirana, nogira ngu nakushasira bushai kyonkai takufireho?

²⁸ Tokamanyaga? Isi tokahuliraga? Omukama aba Ruhanga nyakumelera; n'iwe yatonzire ensi yona. Wenene talemwa, tasindwa. Kandi ebitekelezobye taliho abimanya.

²⁹ Abalemirwe abaha amani, n'abalemirwe abalemuura.

³⁰ N'abakyali bato nibaija kulemwa, n'abasigazi nibaija kulemwa bakagwa enture.

³¹ Kyonkai abesiga Omukama alibalemuura. Baliharara nk'enkwaju, tuliiruka batalemirwe; n'okugenda tuligenda kyonkai okulemwa chei.