Isaya 37 - Ebibulia 2001Hezekia nayehanuza ahali Isaya ( 2Ab 19:1-7 ) 1 Omukama Hezekia kayahuliire amakuru ago, yatagura enyambarwaze, yajwara orugunia, yakwata omuhanda yagya Rwensinga. 2 Atuma Eliakimu omugelezi mukuru omu kikaare, na Shebuna omuhandiki, n'abakuhani abakuzire, abatuma bajwete engunia ow'Omurangi Isaya eya Amozi. 3 Kabagobireyo bagambira omurangi ogwo bati, “Omukama Hezekia nagamba ati, ‘Kir'eki rwabara; twabona ekibonabonio mara twagoka. Tuli nk'omukazi araliire kuzara, kyonkai agasindikira gayanga. 4 Omukama wa Asiria atumire Rabushake kukeena Ruhanga Asingire. Omukama Ruhanga wawe asinge amanye okwo Rabushake yamukena mara amubonabonyie. Mbwenu abantu abakyarora obatelere omushango ahali Ruhanga.’ ” 5 Orwo abairu b'Omukama Hezekia bagobire Isaya, 6 Isaya yabagambira ati, “Mugye mugambire omukama wanyu muti, ‘Ebyo wahulira, ebyo abairu b'omukama wa Asiria banjuma, bitakunena. 7 Kityo Senakeribu ndamuha okuhulira engungungu, agaruke owabo, kandi omu nsiye ndamunagisa aha mbanda.’ ” Abaasiria nibashuba kutinisa Abaisiraeli ( 2Ab 19:8-19 ) 8 Rabushake akwata omuhanda ashubayo, agya ashanga omukama Senakeribu narashanisa ekigo kya Libuna. Orwo yamazire kuhulira okwo Senakeribu atakili Lakishi, nikwo kumuhondera Libuna. 9 Omukama Senakeribu ahuliza okwo Tirihaka omukama wa Etiopia yaimukize kumutatulira. Kumara kuhuliza ekigambo ekyo atumwa entumwa ahali Hezekia ati, 10 “Mugende mugambire Hezekia omukama wa Yuda muti, ‘Ruhanga wawe ow'oyesiga atakubeiya kukushuubiza ngu Yerusalemu tegwe mu mikono ya mukama wa Asiria. 11 Wahuliire okwo abakama ba Asiria baraisire ensi zona bakazisilikya limoi limoi. Iwe oije obe n'iwe okira? 12 Baruhanga ab'amahanga, amahanga gabo baragarokoire? Tugambe amahanga ago batat'enkuru basilikize, nka Gozani, Harani, Rezefu n'aba Edeni omuli Telasari? 13 Abakama ba Hamati, Arupadi n'ekigo kya Sefarivaimu, Hena anga owa Iva tuli nkahai?’ ” 14 Entumwa ziheleza Hezekia ebarua egyo, agishoma. K'amara kugishoma akwata omuhanda agya Rwensinga agishanshurulira Omukama. 15 Amutakira ati, 16 “Waitu Mukama w'amahe, Ruhanga wa Isiraeli, iwe asingiire aha bakerubi, n'iwe wenkai oba Ruhanga, engoma zona z'ensi n'iwe oba mukama wazo. Eiguru n'ensi ayabitonzire aba iwe. 17 Singa ompe amatwi ompulire, waitu Mukama. Olebe, oshube ohulire byona ebyo Senakeribu alikugamba, ebyo yatuma entumwa kujuma Ruhanga Nyamurora. 18 Omu mazima, Mukama wange, abakama ba Asiria baraisire amahanga gona, n'amataka gabo baragaisire omwebura. 19 Bakakwata baruhanga b'amahanga ago babokya aha rw'okuba bakaba batali baruhanga kwo. Bikaba bili bintu ebikorano kushai, biti n'amabare. Nikyo baitirwe. 20 Kityo mbwenu, waitu Mukama Ruhanga waitu, singa otukize omu mikono ya Senakeribu, engoma zona omu nsi zimanye okwo iwe wenkai n'iwe oba Mukama.” Isaya natumaho Hezekia ( 2Ab 9:20-37 ) 21 Ahanyuma Isaya eya Amozi atumaho Hezekia ati, “Omukama Ruhanga wa Isiraeli nagamba ati, Orwo wantakaho nonshaba kankujuna ahali Senakeribu omukama wa Asiria, 22 mbwenu oraleba okwo ndikumugamba: ‘Senakeribu, Yerusalemu yona nekushekelera, telikukubonamu kantu. 23 Ow'oliho nojuma nojamya nomumanya? Inye Ruhanga Omutakatifu wa Isiraeli onkunukurwize. 24 Otumire abairu bawe kunshekelera nogamba okwo orugire kutera Lebanoni okagigoba n'omu mabanga eiguru. Wayeshalingya okwo ogwisize emielezi emiraimirai n'emisonobari emirungi muno, ebibira wabishenshera wabigoba omugati. 25 Wayesiima okwo ogobire omu mahanga okalimayo amaziba okaganywaho amaizi, n'okwo okandagiliire emigera yona ya Misiri okagyomesa.’ ” 26 “Tokahuliraga okwo ebyo byona nkabigendelera kwema karai? Mbwenu ndemirwe nagobesheleza entegeka zange. Nkuhaire obushobora wasilikya ebigo bina by'eboma byaba matongo. 27 Abantu ababaire nibatura omu bigo ebyo bajegaire, batina mara bahujuuma. Bashusire obunyasi buto omu rweya anga omwata ogumera aha rushwi okwo gushusha gwomesiibwe omushana.” 28 “Mbwenu inye ninkumanya obwiziizi. Eby'olikukora nimbimanya, na mtuli olikugya nimpamanya. Ninkumanya okwo olikunnoba kubi. 29 Amakuru g'okunoba kubi kwawe n'eikuru lyawe nabihuliire. Aha oramanya, naija kukurabya ekifunga omu nyindo n'orukoba omu kanwa, nkugarure owanyu. Omuhanda ogukulesire nigwo ndakurabyamu ninkugarurayo.” 30 Aho Isaya agambira omukama Hezekia ati, “Ebilikwija kubaho akamanyiso nik'aka: Mwaka ogu n'oguraija muralya engano eyemelize. Kyonkai mwaka guli mulibiba bubiba mara mweze, mulibyara n'emizabibu mulye n'ebiraba byayo. 31 Aba Yuda atuliruhonokaho, tuligeija nk'ebimera ebiina emizi eli okuzimu, ebiraba. 32 Omuli Yerusalemu n'aha Ibanga lya Sioni abantu titulifa bona; abandi tulisigaramu, kuba Omukama w'amahe oku nikwo alikwenda muno kabiba.” 33 “Aha rw'ekyo Omukama nagamba ati ahali Senakeribu omukama wa Asiria: Senakeribu talikwija kutaha Yerusalemu, handiki kugitera mwambi. Talikwija kukwata ngabo akagigoba, anga kugizingoza rusinde kugibunda akagikwata. 34 Omuhanda gwamulesire nigwo guramutwara, kandi ekigo eki talikwija kukitahamu. 35 Inye ekigo ndakilinda mara nkirokore aha bwange n'aha bwa Daudi omwiru wange.” 36 Omumalaika w'Omukama agya omu rusisira rw'Abaasiria aitamu abaisherukare 185,000. Bukeire bunu omu mambya bakaba bafire bona! 37 Nirwo Senakeribu omukama wa Asiria yashubire omuka, akatura Ninive. 38 Ekiro kimoi aliho nafukamira ruhangawe Nisiroki omuli Rwensinga, abatabani babili, atulimu Adarameleki na Sharezeri bamwisa embanda bashuba bairukira omu nsi ya Ararati. Omutabani, ondijo eibaralye Esarihadoni n'iwe yaliire engoma, akamusikira. |
Ruhaya DC Bible © Bible Society of Tanzania, 2001.
Bible Society of Tanzania