Isaya 34 - Ebibulia 2001

Ruhanga alibonabonyia ababishabe

¹ Inywe mahanga mwilire haihi muhulire; inywe mahanga mutege amatwi; ensi ehulire n'ebikagilimu byona, na byona ebikagirugamu.

² Omukama anigaliire amahanga gona n'amahe gago, amahanga ago yagaramwire kugaita limoi limoi.

³ Emitumbi yabo teliziikwa, shana okwikaraho ekajunda ekanuka. Abantu tuliitwa bangi; tuligwa omu mabanga.

⁴ Eizoba, okwezi n'enyanyinyi bilikuntuka byona ahansi bisinjagulike. Eiguru lilihwaho okw'obona nibazinga orupapuro. Kandi enyanyinyi zilitongoka okw'obona amababi nigakunkumuka aha muzabibu anga aha mutini.

⁵ Omukama omw'iguru yatekatekire embandaye kwija kwita Edomu; manyasi bantu abo yaramwire kwasha.

⁶ Obwamba bwabo n'ebishaju byabo nibija kukwata aha mbanda bitali bike, bingi nk'obwamba bw'entaama n'embuzi n'ebishaju byazo aha kutambwa ekitambo. Ekitambo eki Omukama nakitambira omu kigo kya Bozira, abantu aba ekinje nabaita omu nsi ya Edomu.

⁷ Abantu nibaija kufa nk'embogo n'enumi zito, ensi eijurwe obwamba n'ebishaju.

⁸ Ako niko kanya ak'Omukama ararokoleraho Sioni, mara akehoroza ababisha b'ekigo ekyo.

⁹ Emiiga ya Edomu elihinduka lami, n'eitaka lyamwo lihinduke buganga. Ensi yona elihya okw'obona elami.

¹⁰ Erahyaga kiro na mushana, kandi omwika gulichunka omu nsi egyo ebiro byona. Amakiro gona ensi egyo eliba ishwa, kandi telirabwamu muntu rundi.

¹¹ Ensi egyo eliturwa akahumi n'ekishegeshe, ensindizi n'ebikona. Omukama alishuba ahindure ensi egyo ebe irungu elyomookire, nk'okwo yabaire eli etakatonzirwe.

¹² Ensi telibona mukama wa kugitwara, n'abatwazi bayo tulihwaho bona.

¹³ Buli hantu nangu n'omu bigo by'eboma, halimerwa amahwa n'amatoju n'enyawaija, haliba buturo bw'ensindizi n'emboigora.

¹⁴ Ebikaaka n'empumi bilishamangira omwo, haliba buturo bw'amasitani nangu n'ekinyamugenge ky'ekiro, nimwo kirahigaga ah'okuhumulira.

¹⁵ Nimwo ensindizi zirayalikaga, zikatiliramu ebyana zikabikulizamu, n'amahungu garateraniraga omwo.

¹⁶ Mushome ekitabo ky'Omukama muhenjuze, ebihandikiremu byona taliho kiliburamu, buli kishaija na kikazi kyakyo. Omukama wenene n'iwe yahanga, mara wenene wenene n'iwe alibahuruza.

¹⁷ Omukama alibagabira ensi, buli omoi abone mwategwe. Balitwara ensi egyo ebiro byona, kandi eliba yabo amakiro gona.